Read new_tumbuka_bible MaSalimo 94 Bible Online

MaSalimo 94 - new_tumbuka_bible bible

MaSalimo 94

¹Imwe FUMU, ndimwe Chiuta wakuwezgera nduzga. Imwe Chiuta, mwaŵeneimwe mukuwezgera nduzga, mujirongore.

²Wukirani muchanya, mwe mweruzgi wa charu, muŵawezgere njombe yawo awo ŵakujikuzga,

³Mwe FUMU, kasi ŵaheni ŵati ŵasekerere mpaka pauli? Kasi ŵaheni ŵakondwenge mpaka pauli?

⁴Iwo ŵakuyowoya mwakujikuzga, wose awo ŵakuchita uheni, ŵakujitukumura.

⁵Ŵakuteketa ŵanthu ŵinu, Mwe FUMU, na kuyuzga chiharo chinu.

⁶Ŵakukoma vyokoro na ŵakupanjwa mu charu chawo, ŵakukomaso ŵana ŵalanda.

⁷Ŵakuyowoya ŵakuti, “FUMU kuti yikutiwona chara, Chiuta wa Israele kuti wakulorako chara.”

⁸Tegherezgani mwa ŵazereza kwakuruska imwe, vindere imwe, kasi mwamkuŵa na mahara pauli?

⁹Kasi uyo wakalenga khutu, wakupulika chara? Kasi uyo wakalenga maso, wakuwona chara?

¹⁰Uyo wakulanga mafuko, asi ndiyo wakuchenya? Kasi uyo wakusambizga ŵanthu, wangaŵavye vinjeru?

¹¹FUMU yikumanya maghanoghano gha ŵanthu, kuti ndi muvuchi waka.

¹²Mwe FUMU, ngwa kutumbikika munthu uyo mukumulanga, mweneuyo mukumusambizga marango ghinu.

¹³Mukumupa chipumulo mu mazuŵa gha visuzgo, lisuke dindi la ŵaheni lijimike.

¹⁴Pakuti FUMU kuti yiti yiŵataye ŵanthu ŵakhe chara, nanga nkhuŵasida ŵanthu ŵakhe na ŵakhe.

¹⁵Weruzgi wakunyoroka uwererenge ku ŵarunji, ndipo awo mbakunyoroka mu mtima ŵati ŵawurondezge.

¹⁶Kasi ndi njani wati wawuke kundovwira kwimikana na ŵaheni? Kasi ndi njani wali pamoza nane kwimikana na awo ŵakuchita uheni?

¹⁷FUMU yirekenge kundovwira, mzimu wane mphanyi uli kuruta kale ku malo gha ŵakufwa.

¹⁸Para nkhati, “Lundi lane likuteremuka,” chisungusungu chinu, Mwe FUMU, chikandifighilira.

¹⁹Para nkhukweŵeka chomene mu mtima wane, imwe mukundikondweska na visangurusko vyinu.

²⁰Kasi ŵeruzgi ŵaheni ŵangakoreranako na imwe, awo ŵakunozgera uheni kwizira mu marango?

²¹Iwo ŵakukoreranako kuti ŵimikane na ŵanthu ŵarunji, ndipo ŵakweruzga kuti ŵambula kafukwa ŵakomeke.

²²Kweni FUMU ndiyo linga lane, Chiuta wane ndiyo jarawe lane lakuphokweramo.

²³Iyo wati waŵalange chifukwa cha uheni wawo, ndipo wati waŵamare petu chifukwa cha ubendezi wawo. Nadi, FUMU, Chiuta withu wati waŵamare petu.