Read new_tumbuka_bible MaSalimo 98 Bible Online

MaSalimo 98 - new_tumbuka_bible bible

MaSalimo 98

¹Salimo. Yimbirani FUMU lusumu luphya, pakuti yachita vinthu vyakuzukumiska. Woko lakhe la maryero na woko lakhe lituŵa, ndivyo vikumupa kuvivya.

²FUMU yapharazga kuvivya kwakhe, yavumbula pakweru urunji wakhe panthazi pa ŵamitundu.

³Yakumbuka chisungusungu chakhe, na kugomezgeka kwakhe pa ŵaIsraele. Ŵanthu wose ŵa ku mphererekezgo za charu, ŵawona kuvivya kwa Chiuta withu.

⁴Chemerezgani na chimwemwe kwa FUMU, imwe charu chose cha pasi, yimbani sumu za chimwemwe za kurumba iyo.

⁵Yimbani sumu za kurumba FUMU na chiding'indi, lizgani chiding'indi pamoza na sumu zakunozga.

⁶Yimbirani mbata pamoza na kulira kwa lusengwe, chemerezgani na chimwemwe kwa FUMU, Karonga.

⁷Nyanja yipome na vyose ivyo vilimo, charu nacho pamoza na wose awo ŵakukhara mwenemumo.

⁸Mironga yikuŵe mapi, mapiri ghimbe pamoza na chimwemwe,

⁹panthazi pa FUMU, pakuti yikwiza, kwiza kayeruzga charu. Yizamkweruzga charu chose na urunji, ndiposo ŵamitundu kwambula kutemwera.