Read new_tumbuka_bible MaSalimo 99 Bible Online

MaSalimo 99 - new_tumbuka_bible bible

MaSalimo 99

¹FUMU ndiyo yikuwusa, rekani ŵamitundu ŵatentheme. Iyo yakhara pa chizumbe chakhe pakati pa ŵakerubi, rekani charu cha pasi chisunkhunyike.

²FUMU njikuru mu Ziyoni, yili pachanya pa mafuko ghose.

³Ŵanthu ŵarumbe zina linu likuru na lakofya. Iyo ndi Mutuŵa.

⁴Karonga ngwa nkhongono, wakutemwa weruzgi wakunyoroka. Imwe mwakhozga weruzgi wambula kutemwera, mwaŵika weruzgi wakunyoroka na urunji mwa Yakhobe.

⁵Rumbani FUMU, Chiuta withu, musopani panthazi pa chizumbe chakhe. Iyo ndi Mutuŵa.

⁶Mozesi na Aroni ŵakaŵa mukati mu ŵasofi ŵakhe. Samuele wakaŵa yumoza wa awo ŵakachema zina lakhe. Iwo ŵakaromba kwa FUMU ndipo yikaŵazgora.

⁷Yikayowoya nawo mu bingu lakuti waka pholi, iwo wakasunga vilayizgo vyakhe na marango agho wakaŵapa.

⁸Mwe FUMU, Chiuta withu, mukaŵazgora, mukaŵa Chiuta wa chigowokero kwa iwo, kweni wakuwezgera nduzga pa milimo yawo yiheni.

⁹Rumbani FUMU, Chiuta withu, sopani pa phiri lakhe lakupatulika, pakuti FUMU, Chiuta withu ndi Mutuŵa.