Read new_tumbuka_bible Zintharika 1 Bible Online

Zintharika 1 - new_tumbuka_bible bible

Zintharika 1

¹Izi ndi zintharika za Solomoni, karonga wa charu cha Israele, mwana wa Davide.

²Ntharika izi zikovwira ŵanthu kuti ŵaŵe ŵamahara na ŵakusambizgika, kuti ŵapulikiske mazgu gha muchindindi,

³kuti ŵapokere visambizgo vyakuchitira vinthu mu mahara, mu urunji, mu ŵeruzgi wakunyoroka ndiposo na kwambula kutemwera.

⁴Zikovwira ŵanthu ŵakupusa kuŵa ŵakuchenjera, ŵawukirano kuŵa na umanyi na kaghanaghaniro kaweme.

⁵Zikovwira wamahara kuti wazipulike na kusazgirako umanyi wakhe, ndipo munthu wakumanya vinthu waŵe na unkhwantha,

⁶ndipo kuti wamanyiske ntharika na viyerezgero, mazgu gha ŵamahara na vinthanguni vyawo.

⁷Kopa FUMU ndi jando la umanyi. Ŵakupusa ndiwo ŵakuyuyura mahara na visambizgo vyakhe.

⁸Mwana wane, pulikira ivyo ŵawuso ŵakukunjirikizga. Ungarekanga chara ivyo ŵanyoko ŵakukusambizga.

⁹Pakuti ivi vili nga ndi mphumphu ya utozi ya maluŵa ku mutu wako, ndipo nga ndi majuda gha mu singo yako.

¹⁰Mwana wane, usange ŵakwananga ŵakukupusika, ungazomeranga chara.

¹¹Iwo ŵamkuyowoya kuti, “Zanga, tiye tilindilire pa nthowa kuti tikome ŵanthu, tiye tiŵakhazge ŵanthu ŵambula kafukwa.

¹²Tiyeni tiŵamire ŵamoyo, nga ndi nyifwa, tiŵamire ŵa msuma, nga ndi awo ŵakukhilira ku malo gha ŵakufwa.

¹³Ntheura titi tisange vinthu vinandi vyakuzirwa, titi tizuzge nyumba zithu na ivyo taskogha.

¹⁴Iwe uŵe pamoza nase, vyuma tigaŵanenge tose.”

¹⁵Mwana wane, ureke kwenda pamoza na ŵanthu aŵa, ureke kwenda mu nthowa izo iwo ŵakwendamo.

¹⁶Pakuti ŵakuchimbilira kuya kachita uheni, wakuchimbilira waka kuya kakoma.

¹⁷Kuthya ukonde nkhwambula chandulo, uku tuyuni tukuwona.

¹⁸Ŵanthu aŵa ŵakujithyera ŵekha ukonde, ŵakujikhazgira umoyo wawo na wawo.

¹⁹Ntheura ndimo ziliri nthowa za wose, awo ŵakusanga usambazi pakuchita nkhaza. Ukukoma iwo, ŵeneawo ŵakuwusanga.

²⁰Mahara ghakuchemerezga mu misewu ya mu msumba, ghakuyowoya mwakukwezga mazgu mu misika.

²¹Ghakuchemerezga pachanya pa viliŵa, ghakuyowoya pa vipata vya msumba, kuti,

²²“Kasi imwe mwa ŵanthu waka mutemwenge kuŵa ŵakupusa mpaka pauli? Kasi ŵanthu ŵakuchonjora ŵatemwenge kuchonjora mpaka pauli, ndipo vindere vitinkhenge umanyi mpaka pauli?

²³Pulikiska para nkhukuchenya, nkhukhumba kukugaŵirako maghanoghano ghane, na kuti mazgu ghane ghamanyikwe kwa iwe.

²⁴Pakuti nkhamuchemani, kweni mukakana kupulikira. Nkhamuchewuzgani, kweni na yumoza wakalorako.

²⁵Mukazerezga urongozgi wane wose, ndipo mukakana kuchenya kwane chara.

²⁶Ntheura ine nane ndizamkumusekani, para mwizakaŵa mu visuzgo. Ndizamkumuhoyani para mwayungwa na wofi,

²⁷para wofi wamwizirani nga nchimphupuru, para soka lamwizirani nga ndi kavuruvuru, para visuzgo na vyakuŵinya vyamuwirani.

²⁸Penepapo ŵizamkundichema, kweni ndizamkuŵazgora chara. Ŵizamkundipenja chomene, kweni kuti ŵizamkundisanga chara.

²⁹Pakuti ŵakatinkha umanyi, ndipo ŵakasankha kureka kuchindika FUMU,

³⁰ŵakakana kupokerera urongozgi wane, ndipo wakayuyura kuchenya kwane kose.

³¹Ntheura, ŵizamkurya vipambi vya milimo yawo, ŵizamkukhuta na viheni ivyo ŵakanozgera kuchita.

³²Pakuti ŵanthu waka ŵakukomeka, chifukwa cha kuwerera nyuma kwawo. Ndipo vindere vikujimara vyekha, chifukwa chakuwura kupwererako kwawo.

³³Kweni uyo wakupulikira ine, wati wakharenge mu kufwasa, wati waŵe mu mutende, kwambula kopa kaheni kalikose.”