Read new_tumbuka_bible Zintharika 10 Bible Online

Zintharika 10 - new_tumbuka_bible bible

Zintharika 10

¹Izi ndi ntharika zinyakhe za Solomoni. Mwana wa mahara wakukondweska ŵawiske, kweni uyo nchindere, wakupereka chitima ku ŵanyina.

²Vyuma vyakusangira mu ubendezi vilije chandulo, kweni urunji ukuthaska ku nyifwa.

³FUMU yiti yimureke munthu murunji kuti wafwe na njara chara, kweni munthu muheni yiti yimukanire kumupa icho wakukhumba.

⁴Munthu mukata wakujikavuska, kweni munthu wakutokatoka wakusambazgika.

⁵Mwana uyo wakuvuna pa nyengo ya chihanya ngwa mahara, kweni uyo wakugona tulo pa nyengo ya kuvuna wakukhozga soni.

⁶Vitumbiko vya FUMU vikuŵa pa munthu murunji, kweni mazgu gha munthu muheni ghakubisa vivulupi.

⁷Munthu murunji wakukumbukika nga ndi chitumbiko, kweni zina la muheni liti liruwike nga ndi chinthu chakuvunda.

⁸Munthu wa mtima wa mahara wasungenge marango, kweni chindere icho chikuŵereŵeta waka chiti chimarenge.

⁹Munthu uyo wakwenda mwakunyoroka wakwenda na kufwasa. Kweni uyo wakwenda mu nthowa zakubendera wamanyikwenge.

¹⁰Munthu uyo wakusinizga na jiso mu upusikizgi wakuwuska suzgo, kweni uyo wakususka[1] pakweru wakupereka mutende.

¹¹Mazgu gha munthu murunji ndi mbwiwi ya umoyo, kweni mazgu gha munthu muheni ghakubisa vivulupi.

¹²Tinkho likuwuska mphindano, kweni kutemwa kukubenekerera kwanangirana kose.

¹³Munthu uyo wakumanyiska tunthu wakuyowoya vinthu vya mahara, kweni uyo nchindere wakutimbika na nthonga.

¹⁴Ŵanthu ŵamahara, ŵakujiŵikira umanyi. Kweni chindere kuŵereŵeta kwakhe maluŵiro kukumutorera ku pharaniko.

¹⁵Chuma cha musambazi ndicho chivikiriro chakhe. Kweni ukavu wa ŵasokwano ndiwo pharaniko yawo.

¹⁶Njombe ya ŵarunji yikurongozgera ku umoyo, kweni chandulo cha ŵaheni chikurongozgera ku kwanangiranangira.

¹⁷Munthu uyo wakupulikira chisambizgo wali mu nthowa ya ku umoyo, kweni uyo wakukana kususkika wakupuruka.

¹⁸Uyo wakubisa tinkho ndi munthu mutesi ndipo uyo wakusesa munyakhe nchindere.

¹⁹Para mazgu nganandi, kwananga kukuŵa mwenemumo, kweni uyo wakujikora mu kayowoyero ngwa mahara.

²⁰Mazgu gha munthu murunji ghakuyana waka na siliva lakwengeka makora. Maghanoghano gha munthu muheni nga wakawaka.

²¹Mazgu gha munthu murunji ghakusambizga ŵanandi, kweni vindere vikufwa chifukwa cha kuŵavye mahara.

²²Chitumbiko cha FUMU ndicho chikusambazgiska munthu, kutokatoka kwa munthu kukusazgirapo kanthu chara.

²³Chindere chikusekerera para chikuchita uheni. Kweni munthu uyo wakumanya vinthu wakusekerera para wakuchita vya mahara.

²⁴Icho munthu muheni wakopa ndicho chiti chimwizirenge, kweni munthu murunji wati wapokenge ivyo wakukhumba.

²⁵Para kavuruvuru wajumpha, ŵaheni ŵakuzgeŵerekera, kweni ŵarunji ŵakwimilira nganganga kwa muyirayira.

²⁶Umo vinyo lakusasa likunchanchamilira mu mino, ndiposo umo josi likuŵaŵira mu maso, ndimo waliri munthu mukata ku awo ŵakumutuma.

²⁷Kopa FUMU kukulutirizga umoyo, kweni ŵaheni ŵafwenge luŵiro.

²⁸Chigomezgo cha ŵarunji chikwiza na chimwemwe, kweni icho ŵaheni ŵakunwekera chikumara.

²⁹FUMU ndi linga la ŵanthu awo mbarunji, kweni yikuparanya ŵanthu awo ŵakuchita uheni.

³⁰Ŵarunji kuti ŵawuskikengemo muyirayira chara, kweni ŵaheni ŵakharengemo mu charu chara.

³¹Mlomo wa murunji ukuyowoya mazgu gha mahara, kweni lulimi lwakubendera lwamkudumulika.

³²Murunji wakumanya kuyowoya mazgu agho ngakwenerera. Kweni muheni wakuyowoya mazgu agho ngakupuruska.