Read new_tumbuka_bible Zintharika 11 Bible Online

Zintharika 11 - new_tumbuka_bible bible

Zintharika 11

¹Mweso wakupusika mbukazuzi kwa FUMU. Kweni mweso wakurunjika ndiwo ukukondweska iyo.

²Para munthu wamba kujikuzga, pamanyuma wakukhozgeka soni. Kweni para munthu wakujiyuyura, iyo wakuŵa na mahara.

³Kugomezgeka kwa ŵanthu ŵarunji kukuŵarongozga, kweni nkharo yakubendera ya awo mbapusikizgi yikuŵamara petu.

⁴Usambazi ulije chandulo mu zuŵa la ukari wa FUMU, kweni urunji ukuthaska ku nyifwa.

⁵Urunji wa munthu wambula kalema ukunyoroska nthowa yakhe, kweni munthu muheni wakuwa chifukwa cha uheni wakhe.

⁶Urunji wa munthu wakunyoroka ukumuthaska, kweni ŵaryarya ŵakukoreka uzga na makhumbiro ghawo ghaheni.

⁷Para muheni wakufwa, chigomezgo chakhe nacho chikumara, ndipo icho wakulindizga munthu wambula kopa Chiuta nacho chikuzgoka cha waka.

⁸Munthu murunji wakuthaskika ku visuzgo, kweni muheni ndiyo wakunjiramo mu visuzgo vira.

⁹Na mazgu ghakhe munthu wambula kopa Chiuta, wakumanya kumunanga muzengezgani wakhe, kweni munthu murunji wakuthaskika chifukwa cha umanyi wakhe.

¹⁰Para ŵarunji vinthu vikuŵayendera makora ŵanthu ŵa mu msumba wakusekerera, ndipo para ŵaheni ŵakumara ŵanthu ŵakuchemerezga na chimwemwe.

¹¹Vitumbiko vya Chiuta pa ŵarunji vikukwezga msumba, kweni mazgu gha ŵaheni ghakuwubwangandula.

¹²Munthu uyo wakuyuyura muzengezgani wakhe nchindere, kweni munthu wa vinjeru wakukhara waka chete.

¹³Munthu uyo ndi mwendanato wakuvumbula vya ku udesi. Kweni munthu uyo ngwa kugomezgeka, wakubisa vya ku udesi.

¹⁴Ŵanthu ŵakumara usange urongozgi kulije, kweni uko kuli ŵarongozgi ŵanandi, chivikiriro chikuŵako.

¹⁵Munthu uyo wakupangana kuperekera mulendo chikhole, wati wawe mu visuzgo, kweni uyo wakukana kumuperekera chikhole, wati waŵe mu kufwasa.

¹⁶Mwanakazi wa kaŵiro kaweme ŵakumupa nchindi, ŵanarume ŵankhaza ŵakusanga waka usambazi.

¹⁷Munthu uyo ngwa lusungu wakujitorera chandulo, kweni munthu wa nkhaza wakujipweteka yekha.

¹⁸Munthu muheni wakupokera njombe yawakawaka, kweni uyo wakuchita vya urunji wakupokera chandulo chenecho.

¹⁹Munthu uyo wakwima nganganga pakuchita urunji, wati waŵe na umoyo, kweni uyo wakurondezga uheni wafwenge.

²⁰Ŵanthu ŵa mitima yiheni, mbukazuzi kwa FUMU, kweni ŵanthu ŵambula kalema yikukondwera nawo.

²¹Panikizgani kuti munthu muheni warekenge kulangika chara, kweniso kuti ŵarunji ŵalangikenge chara.

²²Mwanakazi wakutowa, wambula mahara, wali nga ndi mphete ya golide pa mphuno ya nkhumba.

²³Khumbo la munthu murunji likumalira mu uweme pera, kweni icho muheni wakulindirira chikumalira mu ukari wa Chiuta.

²⁴Munthu munyakhe wakupereka mwa wanangwa, ndipouli wakukulirakulira mu usambazi wakhe. Munyakhe ndi mukaka pakupereka, ndipouli ŵakukavukirakavukira.

²⁵Munthu uyo wakupereka mu wanangwa wati waŵenge na vinandi. Munthu uyo wakovwira ŵanyakhe, nayo ŵanyakhe ŵizamkumovwira.

²⁶Ŵanthu ŵakumutemba uyo wakunora ŵanyakhe vyakurya, kweni wakutumbikika ndi munthu uyo wakuguliska vyakurya.

²⁷Munthu uyo wakupenjisiska uweme, wakusanga uchizi, kweni uyo wakupenjisiska uheni, uheni ukumwizira.

²⁸Munthu uyo wakugomezga usambazi wakhe wati wafotenge, kweni murunji wati watikitirenge nga ndi hamba liŵisi.

²⁹Munthu uyo wakusuzga ŵa mbumba yakhe wati waharenge kanthu chara. Ntheura chindere ichi chiti chiŵe muzga wa uyo ngwa mahara.

³⁰Chipambi cha munthu murunji ndi khuni la umoyo, kweni mbembe yikusakaza umoyo.

³¹Usange ŵanthu ŵaweme ŵakupokera pano pasi njombe izo zikuŵenerera, ipo ŵaheni na ŵakwananga nawo ŵamkupokera chilango icho chikuŵalindirira.