Read new_tumbuka_bible Zintharika 12 Bible Online

Zintharika 12 - new_tumbuka_bible bible

Zintharika 12

¹Munthu uyo wakutemwa visambizgo wakutemwaso umanyi, kweni uyo wakutinkha kuchenyeka nchindere.

²Munthu muweme wakupokera uchizi wa FUMU, kweni munthu uyo wakukhumba kuchita chiŵembu yikumulanga.

³Munthu kuti wakukhazikika chifukwa cha kuchita uheni chara, ndipo misisi ya ŵarunji yizgurikengepo chara.

⁴Muwoli wa nkharo yiweme wali nga ndi mphumphu ya mufumu wakhe. Kweni muwoli uyo wakukhozga soni mufumu wakhe, wali nga ndi nthenda yakuvundiska viwangwa.

⁵Maghanoghano gha ŵanthu ŵarunji ngakunyoroka, kweni urongozgi wa ŵaheni ngwa kupusika.

⁶Mazgu gha munthu muheni ndi chipingo chakukoma, kweni mazgu gha munthu murunji ghakuthaska ŵanthu.

⁷Ŵanthu ŵaheni ŵakuwiskikira pasi na kuruwika, kweni mbumba ya ŵarunji yikhalirirenge.

⁸Munthu wakurumbika kwakuyana na mahara ghakhe, kweni wa maghanoghano ghakubendera wakuyuyurika.

⁹Munthu uyo ngwa kujiyuyura kweni wakujiteŵetera yekha wali makorako, kuruska uyo wakujitukumura kweni wakusoŵerwa chakurya.

¹⁰Murunji wakupwererera umoyo wa vyakuŵeta vyakhe, kweni munthu muheni lusungu lwakhe ndwa nkhaza.

¹¹Munthu uyo wakulima munda wakhe wakuŵa na vyakurya vinandi. Kweni uyo wakurondezga vinthu vyawakawaka nchindere.

¹²Chigongwe chakukhora cha munthu muheni chiti chibwanganduke, kweni musisi wa munthu murunji uti upambike vipasi.

¹³Munthu muheni wakuwira chifukwa cha mazgu ghakhe, kweni munthu murunji wakuthaskika ku visuzgo.

¹⁴Munthu wakukhutiskika na vinthu viweme kufuma mu vipambi vya mazgu ghakhe, ndipo iyo wakupokera malipiro chifukwa cha milimo ya mawoko ghakhe.

¹⁵Chindere chikughanaghana kuti ivyo chikuchita nvyakurunjika, kweni munthu wa mahara wakutegherezga ku urongozgi wa ŵanyakhe.

¹⁶Kukwiya kwa chindere kukumanyikwa luŵiro, kweni munthu wa mahara wakuzerezga para watukika.

¹⁷Uyo wakuyowoya unenesko wakupereka ukaboni wakugomezgeka, kweni kaboni mutesi wakuyowoya utesi pera.

¹⁸Mazgu ghakuyowoyeka mwaluŵiro, kwambula kughanaghana ghakugwaza nga ndi lupanga, kweni mazgu gha munthu wa mahara ghakuchizga.

¹⁹Mazgu gha unenesko ghakukhalirira kwa muyirayira, kweni mazgu gha utesi ghakukhariska chara.

²⁰Mu mtima mwa awo ŵakunozgera uheni muli upusikizgi, kweni awo ŵakunozgera viweme ŵali na chimwemwe.

²¹Ŵanthu ŵarunji, uheni kuti ukuŵawira chara, kweni ŵaheni ŵakuŵa mu visuzgo nyengo zose.

²²Munthu mutesi mbukazuzi kwa FUMU kweni awo mbakugomezgeka ŵakukondweska iyo.

²³Munthu wakuchenjera wakubisa mahara ghakhe, kweni ŵakupusa ŵakurongora pakweru kupusa kwawo.

²⁴Ŵanthu ŵakutokatoka ŵati ŵawusenge, kweni mukata ŵati ŵachite mlimo wakuchichizga.

²⁵Mtima wakwenjerwa ukunyekezgera munthu pasi, kweni mazgu ghaweme ghakumusanguruska.

²⁶Munthu murunji wakutinkha uheni, kweni nthowa ya munthu muheni yikuŵapuruska.

²⁷Munthu mukata wangakora nyama chara kweni uyo wakutokatoka wakusanga usambazi wakuzirwa.

²⁸Nthowa ya urunji yikurazga ku umoyo, kweni nthowa ya uheni yikurazga ku nyifwa.