Read new_tumbuka_bible Zintharika 13 Bible Online

Zintharika 13 - new_tumbuka_bible bible

Zintharika 13

¹Mwana wa mahara wakupulikira para wiske wakumusambizga, kweni munthu wakunyoza wakuzomera chara para ŵakumuchenya.

²Munthu muweme ŵakurya viweme kufuma mu vipambi vya mazgu ghakhe, kweni mupusikizgi wakunwekera kuchita vivulupi pera.

³Uyo wakujikora mu kayowoyero, wakusungilira umoyo wakhe, kweni uyo ndi muŵereŵesi wakuparanyika.

⁴Munthu mukata wangadokera vinthu ndipo wakupokera kalikose chara, Kweni munthu wakutokatoka wakupokera vinandi.

⁵Munthu murunji wakutinkha utesi, kweni munthu muheni wakuchita vinthu vyakukhozga soni na vyakulengeska chomene.

⁶Urunji ukusungilira munthu wa mendero ghakunyoroka, kweni uheni ukuwiska munthu wakwananga.

⁷Ŵanthu ŵanyakhe ŵakujirongora kuti mbasambazi apo ŵalije na chilichose. Ŵanyakheso ŵakujirongora kuti mbakavu apo mbasambazi chomene.

⁸Usambazi wa munthu ukuwombola umoyo wakhe, kweni mukavu walije icho chingamuwombola.

⁹Ungweru wa ŵarunji ukuŵala chomene, kweni nyali ya ŵaheni yikuzimyika.

¹⁰Kujikuzga kukwambiska mphindano, kweni mahara ghali na awo ŵakupokera urongozgi.

¹¹Usambazi wakuwusanga mwaluŵiroluŵiro ukumara, kweni uyo wakuwunjika chuma pachokopachoko ndiyo chuma chakhe chandanenge.

¹²Para icho munthu wakuchinwekera chachedwa kwiza mtima ukugongowa, kweni para icho munthu wakunwekera chafiskika, chili nga ndi khuni la umoyo.

¹³Uyo wakuyuyura mazgu gha urongozgi wakujitorera pharaniko. Kweni uyo wakuchindika marango, wati wapokere njombe.

¹⁴Visambizgo vya munthu wa mahara ndi mbwiwi ya umoyo, kuti munthu wamanye kulambalala vipingo vya nyifwa.

¹⁵Munthu wa maghanoghano ghaweme wakusanga uchizi, kweni wambula kugomezgeka kuti wakukhalirira chara.

¹⁶Munthu wakuchenjera wakuchita vyose mwa mahara, kweni wakupusa wakurongora pakweru kupusa kwakhe.

¹⁷Thenga liheni likuŵanjizga ŵanthu mu visuzgo, kweni thenga lakugomezgeka likwiza na kuchizga.

¹⁸Munthu uyo wakuzerezga kusambizgika wakuŵa mukavu na wakukhozga soni, kweni uyo wakuzomera kuchenyeka wakuchindikika.

¹⁹Para icho munthu wakuchinwekera chafiskika chikukondweska mtima. Kweni vindere vikuwona kuti mbukazuzi kureka kuchita uheni.

²⁰Munthu uyo wakwenda pamoza na ŵamahara nayo wakuŵa wa mahara, kweni uyo wakwenda pamoza na vindere wati wapwetekeke.

²¹Soka likurondezga ŵakwananga, kweni usambazi ndi njombe ya ŵarunji.

²²Munthu muweme wakuŵasidira chiharo ŵazukuru ŵakhe, kweni usambazi wa munthu wakwananga ŵakuwupokera mbanthu ŵarunji.

²³Mu masara gha munthu mukavu mkuŵa vyakurya vinandi, kweni vikupokeka na ŵanthu ŵambula urunji.

²⁴Munthu uyo wakureka kuthyapula mwana wakhe, ndiko kuti wakumutinkha, kweni uyo wakumutemwa mwana wakhe, kuti wakuziwurika chara kumulanga.

²⁵Ŵarunji ŵali navyo vyakurya vyakukwana kuti ŵarye, kweni ŵaheni ŵakupulika njara.