Read new_tumbuka_bible Zintharika 14 Bible Online

Zintharika 14 - new_tumbuka_bible bible

Zintharika 14

¹Mwanakazi wa mahara wakuzenga mbumba yakhe, kweni uyo ngwa kupusa wakuyipankhura na mawoko ghakhe.

²Uyo wakwenda mu kunyoroka wakuchindika FUMU. Kweni uyo wakwenda mwakubendera wakuyuyura FUMU.

³Kayowoyero ka chindere ndiyo ndodo yakuchithyapulira. Kweni mazgu gha munthu wa mahara ghakumuvikirira.

⁴Uko nkhaŵi zakulima kulije, vyakurya navyo, kulije. Kweni vyakurya vinandi vikusangika chifukwa cha nkhongono za nkhaŵi.

⁵Kaboni wakugomezgeka kuti wakuteta chara. Kweni kaboni mupusikizgi wakuyowoya vya utesi.

⁶Munthu uyo wakunyoza ŵanyakhe nanga wapenje mahara, kuti wakughasanga chara. Kweni kumanya vinthu nkhupusu kwa munthu wa umanyi.

⁷Wukapo apo pali chindere, chifukwa kwenekura usangengeko mazgu gha mahara chara.

⁸Mahara gha munthu wakuchenjera ghakumovwira kumanya nthowa yakhe, kweni uzereza wa ŵakupusa ukuŵapuruska ŵekha.

⁹Ŵakupusa ŵakupwererako chara vya kurapa zakwananga, kweni ŵarunji ŵakusanga uchizi wa Chiuta.

¹⁰Mtima ukumanya vyakuŵinya vyakhe na vyakhe, palije na yumoza uyo wakumanya kukondwa kwakhe.

¹¹Nyumba ya munthu muheni yiti yibwanganduke, kweni hema la murunji liyimenge nganganga.

¹²Pali nthowa iyo yikuwoneka nga njiweme ku munthu, kweni ku umaliro wakhe nja kurazga ku nyifwa.

¹³Nanga munthu waseke, mtima ukuŵa na chitima, ndipo umaliro wa chimwemwe nchitima.

¹⁴Munthu wambula kugomezgeka wati wapoke vya milimo yakhe yiheni, ndipo munthu muweme wati wapoke vya milimo yakhe yiweme.

¹⁵Munthu waka wakugomezga chilichose, kweni munthu wakuchenjera wakuwona umo wakwendera.

¹⁶Munthu wa mahara ngwa wofi ndipo wakupatukako ku uheni, kweni chindere chikujikora chara ndipo chikulorako kanthu chara.

¹⁷Munthu uyo wakukwiya luŵiro wakuchita vyakupusa, kweni munthu muryarya wakutinkhika.

¹⁸Ŵanthu wakupusa ŵakuzgoka vindere, kweni ŵamahara ŵakuvwarikika umanyi nga ndi mphumphu.

¹⁹Ŵanthu ŵaheni ŵizamkujikamira ŵanthu ŵaweme, ŵanthu ŵakubendera ŵizamkulambira ŵarunji pa vipata.

²⁰Mukavu ngwa kutinkhika na ŵazengezgani ŵakhe wuwo, kweni musambazi wakutemweka na ŵanandi.

²¹Munthu uyo wakuyuyura muzengezgani wakhe wakwananga, kweni ngwa kutumbikika uyo wakuŵachitira lusungu ŵakavu.

²²Kasi awo ŵakunozgera uheni ŵakupuruka chara? Kweni awo ŵakunozgera viweme ŵanthu ŵakuŵarongora chiwuravi na kugomezgeka.

²³Mu mlimo uliwose muli chandulo, kweni uŵereŵesi waka ukwiza na ukavu.

²⁴Usambazi ndi njombe ya ŵamahara, kweni kupusa ndi njombe ya ŵakupusa.

²⁵Kaboni wakugomezgeka wakuthaska umoyo, kweni uyo wakuyowoya vya utesi ndi mwendera mphiska.

²⁶Munthu uyo wakuchindika FUMU wali na chigomezgo chakukhora, ndipo ŵana ŵakhe ŵati ŵaŵenge na chakuphokweramo.

²⁷Kopa FUMU ndi mbwiwi ya umoyo, kuti munthu wamanye kulambalala vipingo vya nyifwa.

²⁸Uchindami wa karonga uli mu unandi wa ŵanthu. Kweni usange ŵanthu palije, ufumu wakhe ukumara.

²⁹Munthu uyo wakuziwurika kukaripa ngwa mahara chomene, kweni uyo wakuphya mtima luŵiro wakurongora kupusa kwakhe.

³⁰Mtima wa mutende ukupereka umoyo uweme ku thupi, kweni mtima wa sanje uli nga ndi nthenda ya kuvundiska viwangwa.

³¹Uyo wakutindiŵizgira pasi munthu mukavu, wakutuka Mlengi wakhe, kweni uyo ngwa lusungu kwa musokwano wakuchindika Mlengi wakhe.

³²Uyo wakuchita uheni wakumara chifukwa cha uheni wakhe, kweni uyo wakuchita urunji ŵakuvikiririka chifukwa cha uweme wakhe.

³³Mahara ghakukhara mu mtima wa munthu uyo wali na umanyi, kweni kuti ghakusangika chara mu mtima wa vindere.

³⁴Urunji ukukwezga fuko la ŵanthu, kweni kwananga kukukhozga soni fuko lirilose.

³⁵Karonga wakukondwa na muteŵeti uyo wakuchita mlimo wakhe mwa mahara, kweni ukari wakhe ukwiza pa uyo wakukhozga soni.