Read new_tumbuka_bible Zintharika 15 Bible Online

Zintharika 15 - new_tumbuka_bible bible

Zintharika 15

¹Kuzgora na mtima wakuzika, kukuwezga ukari, kweni mazgu ghakofya ghakuwuska ukari.

²Mazgu gha ŵanthu ŵamahara ghakupa vinjeru, kweni vindere vikufumiska mazgu gha kupusa pera.

³Maso gha FUMU ghakulaŵiska palipose, ghakulaŵiska pa ŵaheni na ŵaweme.

⁴Mazgu ghakuzika ghali nga ndi khuni lakupa umoyo, kweni mazgu ghaheni ghakupweteka mtima.

⁵Chindere chikuyuyura visambizgo vya ŵawiske, kweni uyo wakupulikira kuchenyeka ngwa mahara.

⁶Mu nyumba ya murunji muli usambazi unandi, kweni chandulo cha ŵaheni chikuŵizira na suzgo.

⁷Mlomo wa ŵanthu ŵamahara ukwandaniska umanyi, kweni mitima ya vindere yikuchita ntheura chara.

⁸Sembe ya munthu muheni mbukazuzi kwa FUMU, kweni lurombo lwa munthu murunji ndilo lukumukondweska.

⁹Nthowa ya ŵanthu ŵaheni mbukazuzi kwa FUMU, kweni awo ŵakuchita urunji, FUMU yikuŵatemwa.

¹⁰Uyo wakureka nthowa yiweme wati walangike chomene. Uyo wakutinkha kuchenyeka wati wafwenge.

¹¹Malo gha ŵakufwa na gha pharaniko nvyambula kubisika kwa FUMU. Kasi kungaŵa uli sono mitima ya ŵanthu?

¹²Uyo wakunyoza, wakutemwa kuchenyeka chara. Iyo wakuruta ku ŵanthu ŵamahara chara.

¹³Mtima wakukondwa ukurongora chisko chakusangwa, kweni mtima wa chitima ukupweteka umoyo.

¹⁴Mtima wa munthu wa umanyi ukupenja mahara. Kweni mu mlomo mwa chindere mwazura vya uchindere pera.

¹⁵Munthu uyo ngwa kusuzgika mazuŵa ghakhe ghose ngaheni. Kweni mtima wa chimwemwe ukuŵa wakukondwa nyengo zose.

¹⁶Nkhuwemiko kuŵa na vinthu vichoko pamoza na kuchindika FUMU, kuruska kuŵa na vyuma vinandi pamoza na kuŵa mu visuzgo.

¹⁷Nkhuwemiko kurya mphangwe apo ŵanthu ŵakutemwana, kuruska kurya nyama ya mafuta apo pali kutinkhana.

¹⁸Munthu uyo wakukaripa luŵiro wakuwuska mbembe, kweni uyo wakuziwurika kukaripa, wakuchetamiska mphindano.

¹⁹Nthowa ya munthu mukata njakukhora na minga, nthowa ya munthu murunji ndi msewu ukuru na uweme.

²⁰Mwana wa mahara wakukondweska ŵawiske, kweni uyo nchindere wakuyuyura ŵanyina.

²¹Kupusa kukukondweska munthu uyo nchindere, kweni munthu wa mahara wakwenda mwakunyoroka.

²²Kwambula urongozgi, ivyo munthu wanozgera vikutondeka, kweni para ŵarongozgi mbanandi, vikwenda makora.

²³Kuzgora makora kukukondweska munthu, ndipo mazgu ghakuyowoyeka pa nyengo yakwenerera ghakuŵa ghaweme chomene.

²⁴Nthowa ya munthu wa mahara yikurazga kuchanya ku umoyo, kuti wareke kuruta kusi ku malo gha ŵakufwa.

²⁵FUMU yikubwangandula nyumba ya munthu wakujikuzga, kweni yikusungilira mphaka za vyokoro.

²⁶Maghanoghano gha ŵanthu ŵaheni mbukazuzi kwa FUMU, kweni FUMU yikukondwa na mazgu gha ŵarunji.

²⁷Uyo wakudokera kuŵa na chandulo chambula urunji, wakunjizga visuzgo mu mbumba yakhe, kweni uyo wakutinkha vimbundi wati waŵenge na umoyo utali.

²⁸Murunji wakughanaghana umo wangazgolera, kweni ŵaheni ŵakuyowoya mazgu ghaheni pera.

²⁹FUMU yili kutali chomene na ŵaheni, kweni yikupulika lurombo lwa ŵanthu ŵarunji.

³⁰Chisko cha chimwemwe chikukondweska mtima, ndipo uthenga uweme ukusanguruska munthu.

³¹Uyo wakuzomera kutegherezga para wakuchongeka, wati waŵe pamoza na ŵamahara.

³²Uyo wakukana kusambizgika wakujiyuyura yekha, kweni uyo wakupulika kuchenyeka wakusanga mahara.

³³Kopa FUMU kukusambizga vinjeru, ndipo nchindi zikwiza pamanyuma pakujiyuyura.