Read new_tumbuka_bible Zintharika 16 Bible Online

Zintharika 16 - new_tumbuka_bible bible

Zintharika 16

¹Mtima wa munthu ukunozgera icho uyowoyenge, kweni lulimi lukuyowoya icho FUMU yikukhumba.

²Mendero ghose gha munthu ngaweme kwa iyomwene kweni FUMU ndiyo yikupima vya mukati mu mtima.

³Pereka milimo iyo wanozgera kuchita mu mazaza gha FUMU, ndipo vyose ivyo ukukhumba kuchita vifiskikenge.

⁴FUMU yili kulenga chilichose kuti chiŵe na chakurata chakhe na chakhe, nanga ndi ŵanthu ŵaheni kuti ŵizakawone zuŵa la visuzgo.

⁵Munthu yose uyo wakujikuzga ndi mukazuzi kwa FUMU. Ipo manyani kuti wa ntheura warekenge kulangika chara.

⁶Munthu wakugowokereka zakwananga zakhe, chifukwa cha kutemwa na kugomezgeka. Munthu wakulambalala uheni chifukwa cha kopa FUMU.

⁷Para vyakuchita vya munthu vikukondweska FUMU, yikuchitiska kuti na ŵarwani ŵakhe wuwo ŵaŵe na mutende na iyo.

⁸Nkhuwemiko kuŵa na vinthu vichoko uku ndiwe murunji, kwakuruska kuŵa na usambazi unandi uku ulije urunji.

⁹Munthu wangaŵa na vyakuchita mu mtima wakhe kweni FUMU ndiyo yikurongozga ivyo wangachita.

¹⁰Karonga wakuyowoya na mazaza ghakufuma kwa Chiuta. Iyo kuti wakupuvya chara pakudumula mrandu.

¹¹FUMU yikukhumba miyeso na vipimo vya unenesko. Ndiyo yikanozga mawe ghose gha mu thumba.

¹²Kuchita uheni mbukazuzi ku ŵakaronga, chifukwa ufumu ukukhozgeka na urunji.

¹³Kuyowoya unenesko ndi chinthu icho ŵakaronga ŵakukondwera nacho, uyo wakuyowoya vya urunji ŵakaronga ŵakumutemwa.

¹⁴Para karonga wakaripa, nyifwa yili pafupi kweni munthu wa mahara wakuphepiska.

¹⁵Para karonga warongora chisko cha kuŵala ndi phangano la umoyo, ndipo kutemwa kwakhe kuli nga ndi maŵingu agho ghakwiza na vura yakudanga.

¹⁶Kusanga mahara nkhuweme chomene kwakuruska kusanga golide ndipo kusanga umanyi nkhuweme chomene kwakuruska kusanga siliva.

¹⁷Ŵarunji ŵakwenda mu msewu uwo ukupatukako ku uheni ndipo uyo wakupwererera mendero ghakhe wakusungilira umoyo wakhe.

¹⁸Kujikuzga kukuŵako pambere pharaniko lindize, ndipo mtima wakujitukumura ukuŵako pambere kuwa kundize.

¹⁹Nchiweme kuŵa wakujiyuyura pamoza na ŵakavu kwakuruska kugaŵana vyakuskogha na awo mbakujikuzga.

²⁰Munthu uyo wakutegherezga ku visambizgo wati wasakate, ndipo ngwa kutumbikika uyo wakugomezga mwa FUMU.

²¹Munthu wa mtima wa mahara ndi munthu wa umanyi, ndipo kayowoyero kaweme kakusazgirapo nkhongono yakupemberezgera ŵanthu.

²²Umanyi ndi mbwiwi ya umoyo kwa ŵeneawo ŵali na umanyi, kweni kupusa kukwiza na chilango kwa awo nvindere.

²³Mtima wa munthu wa mahara ukurongozga ivyo wangayowoya ndipo mazgu ghakhe ghakumanya kukopa ŵanthu.

²⁴Mazgu ghaweme ghali nga ndi chisa cha uchi nga kunowa ku mtima ndipo ghakuchizgaso thupi.

²⁵Pali nthowa iyo yikuwoneka nga njiweme ku munthu, kweni ku umaliro wakhe nja kurazga ku nyifwa.

²⁶Ku munthu uyo wakutokatoka khumbo la kurya ndilo likumuteŵeteska, njara ndiyo yikumuchiska kurutilira.

²⁷Munthu muheni wakunozgera kuchita uheni, ndipo kayowoyero kakhe ndi moto wakocha.

²⁸Munthu uyo ngwa kubendera wakwandaniska mphindano, ndipo uyo ndi mwendanato wakupatula awo ŵali pa ubwezi.

²⁹Munthu wa mbembe wakukopeka muzengezgani wakhe ndipo wakumurongozgera mu nthowa yiheni.

³⁰Munthu uyo wakusinizga na maso wakunozgera kuchita vinthu viheni, uyo wakukhara waka chete wakuzomerezga uheni kuti uchitikenge.

³¹Mbuha ndi mphumphu ya uchindami ndi njombe ya umoyo wa urunji.

³²Uyo ngwa kuziwurika mu ukari ndi muwemiko, kwakuruska kuŵa chinkhara, ndiposo nchiwemiko kuŵa wakuzizipizga kwakuruska uyo wakuthereska msumba.

³³Ŵanthu ŵakuchita mphenduzgo kuti ŵamanye khumbo la Chiuta, kweni FUMU ndiyo yili na udumuliro pera.