Read new_tumbuka_bible Zintharika 17 Bible Online

Zintharika 17 - new_tumbuka_bible bible

Zintharika 17

¹Nkhuwemiko kurya phiri yomizo na kufwasa, kuruska kuŵa pa chiphikiro mu nyumba umo muli mphindano.

²Muzga uyo wakuchita vinthu mwa mahara, wati wawuse mwana uyo wakukhozga soni. Muzga uyu wati wagaŵane nawo chiharo nga njumoza wa ŵana.

³Siliva ŵakumuyezgera mu chiŵiya cha moto, golide ŵakumuyezgera mu ng'anjo ya moto, kweni FUMU ndiyo yikuyezga mitima ya ŵanthu.

⁴Uyo wakuchita uheni wakutegherezga ku mayowoyero ghaheni, uyo ndi mutesi wakutegherezga ku ivyo nvya utesi.

⁵Munthu uyo wakunyoza mukavu, wakutuka Mlengi wakhe, ndipo uyo wakusekerera para munyakhe wachita soka, wati walangikenge.

⁶Ŵazukuru ndi mphumphu ya ŵachekuru, ndipo uchindami wa ŵana ndi ŵawiskewo.

⁷Kayowoyero kaweme kuti nkhakwenerera wakupusa chara. Kwakuruska, kuyowoya utesi, kuti nkhwakwenerera karonga chara.

⁸Chimbundi chili nga ndi chinthumwa mu maghanoghano gha uyo wakuchipereka. Kose uko wakwenda, vinthu vikumwendera makora.

⁹Munthu uyo wakugowokera pa icho chabudika wakupenja chitemwa, kweni uyo wakusunga makani ku singo wakupatula mubwezi wakhe.

¹⁰Munthu wa mahara wakupulika kamoza pera para wachenyeka kuruska chindere nanga chingatimbika kanandi chomene.

¹¹Munthu muheni wakukhumba uchigaruka pera, ndipo ŵati ŵamutumire thenga la nkhaza kulimbana nayo.

¹²Nchiweme kukumana na nkharamira iyo yapokeka ŵana ŵakhe, kuruska kukumana na chindere icho chakorera mukondo.

¹³Usange munthu wakuwezgera uheni pa uweme, uheni kuti ufumengemo mu nyumba yakhe chara.

¹⁴Kwamba kwa mphindano kuli nga ndi kujulira maji. Ntheura reka mphindano pambere mbembe yindayambe.

¹⁵Munthu uyo wakurunjiska muheni, na uyo wakususka murunji, wose ŵaŵiri, mbukazuzi kwa FUMU.

¹⁶Kasi pali uweme uli, kuti chindere chiŵe na ndarama zakugulira mahara apo icho chilije vinjeru?

¹⁷Mubwezi wako ndiyo wakukutemwa nyengo zose, ndipo ŵabali wako wakababika kuti wakovwirenge pa visuzgo.

¹⁸Wambula mahara wakupangana kupereka ngongole mu malo gha yunji, ndipo wakuŵa chikhole cha mungezgani wakhe.

¹⁹Munthu uyo wakutemwa uheni wakutemwa mphindano, uyo wakuyowoya mwakujikuzga wati waparanyike.

²⁰Munthu wa mtima wakubendera wakusanga uweme chara, ndipo uyo wakuteta wakuwa mu visuzgo.

²¹Mwana muzereza wakupa chitima ŵawiske, ndipo wiske wa mwana uyo ngwa kupusa wakukondwa chara.

²²Mtima wakukondwa ndi munkhwara wakuchizga kweni mtima wakugongowa ukuthiska lusoko.

²³Muheni wakupokerera chimbundi cha mu chibisibisi mwakuti wabendezge nthowa za weruzgi wakunyoroka.

²⁴Munthu wa umanyi wakuŵika mtima pa mahara. Kweni munthu uyo nchindere maghanoghano ghakhe ghakuwurawura waka mu charu chose.

²⁵Mwana uyo nchindere wakupereka chitima ku ŵawiske, ndipo wakuŵinyiska mtima ŵanyina awo ŵakamubaba.

²⁶Nchiweme chara kumulipiska munthu uyo ngwambula kafukwa. Nkhuweme chara kuŵathyapula ŵanthu ŵa nkharo ziweme.

²⁷Munthu uyo wakujikora mu kayowoyero kakhe wa mahara, ndipo uyo ngwa mtima wakuziza wakumanyiska tunthu.

²⁸Chindere icho chikukhara waka chete chikupimika kuti nchamahara. Para chajara mlomo wakhe, munthu wakuchipima kuŵa cha vinjeru.