Read new_tumbuka_bible Zintharika 18 Bible Online

Zintharika 18 - new_tumbuka_bible bible

Zintharika 18

¹Munthu uyo wakujipatula ku ŵanyakhe, wakuchita ivyo iyo wakukhumba pera ndipo iyo wakususkana na chilichose icho ŵanyakhe ŵakumanya kuti nchiweme.

²Chindere kuti chikukondwera na umanyi chara, kweni chikutemwa kuyowoya ivyo chikughanaghana pera.

³Para uheni wiza pa munthu, msinjiro nawo ukwiza, para muyuyuro wiza pa munthu, kukhozgeka soni nako kukwiza.

⁴Mazgu gha munthu ghali nga ndi ndimba ya maji, ndipo mbwiwi ya mahara yili nga ndi mronga uwo ukupopoma.

⁵Nkhuweme chara pa mrandu kutemwera munthu muheni, nesi kureka kweruzga makora mrandu wa munthu murunji.

⁶Mazgu gha chindere ghakuwuska mphindano, ndipo pa mlomo pakhe pakumunjizga mu nthimbo.

⁷Chindere chikujipankhura na uŵereŵesi wakhe, ndipo mlomo wakhe ndicho chipingo ku umoyo wakhe.

⁸Mazgu gha mwendanato ghali nga ndi chakurya chakunowa. Ŵanthu ŵakughamira ghose mwakukondwa.

⁹Munthu uyo ndi mukata pa nchito yakhe wakuyana waka na uyo wakupankhura.

¹⁰Zina la FUMU ndi linga lakukhora. Ŵarunji ŵakuchimbilirako na kuthaskika.

¹¹Ŵasambazi ŵakupima kuti chuma chawo chili nga ndi msumba wakukhora, ndipo ŵakughanaghana kuti chili nga ndi linga litali ilo lingaŵathaska.

¹²Pambere pharaniko lindize mtima wa munthu ukujikuzga, kweni nchindi zikwiza pamanyuma pakujiyuyura.

¹³Para ukuzgora pambere undapulikiske, ncha uchindere na cha kukhozga soni.

¹⁴Mtima wa munthu ukumanya kuzizipizga matenda. Kweni para mtima wasweka, ndi njani uyo wangazizipizga?

¹⁵Mtima wa munthu wa umanyi ukusanga mahara. Khutu la munthu wa mahara likupenja umanyi.

¹⁶Chawanangwa cha munthu ndicho chikumutorera iyo mu malo ghakuzirwa ndipo chikumuŵika panthazi pa ŵanthu ŵakuzirwa.

¹⁷Munthu uyo wadanga kuyowoya pa mrandu wakuwoneka nga ndi murunji, mpaka munyakhe uyo wakumususka wize na kumufumba mafumbo.

¹⁸Kuchita mphenduzgo kukumara mphindano ndiposo kukudumula mrandu pakati pa ŵanthu ŵankhongono awo ŵakulimbana.

¹⁹Mubali uyo wovwirika wali nga ndi msumba wakukhora, kweni mphindano zikulingana waka na mphingirizgo zakujalira linga.

²⁰Munthu wakusanga makora panji chara kwakuyana na ivyo wakuyowoya. Iyo wakupokera njombe kwakuyana na mazgu gha mlomo wakhe.

²¹Lulimi ndilo luri na mazaza pa umoyo na nyifwa, ndipo awo ŵakutemwa kuyowoya ŵati ŵarye vipambi vyakhe.

²²Uyo wamusanga muwoli wasanga chinthu chiweme, ndipo wakupokera uchizi kufuma kwa FUMU.

²³Ŵakavu ŵakuŵeyerera pakuyowoya, kweni ŵasambazi ŵakuzgora mwa nkhaza.

²⁴Ŵabwezi ŵakuŵako awo ŵakujiŵikamo waka, kweni wakuŵapo mubwezi uyo wakuŵa pafupi kwakuruska na mubali.