Read new_tumbuka_bible Zintharika 19 Bible Online

Zintharika 19 - new_tumbuka_bible bible

Zintharika 19

¹Munthu mukavu uyo wakwenda mu kunyoroka ndi muwemiko kuruska uyo ngwa kubendera mu mayowoyero ndiposo nchindere.

²Nchiweme chara kuŵa na khumbiro lakuchita vinthu apo umanyi ulije panji nesi kuŵa mu luŵiro na kuwa mu suzgo.

³Kupusa kwa munthu ndiko kukumunjizga mu visuzgo, ndipouli mtima wakhe ukumukwiyira FUMU.

⁴Ŵanthu ŵasambazi nyengo zose ŵakusanga ŵabwezi ŵaphya kweni mukavu wakurekeka na mubwezi wakhe wuwo.

⁵Kaboni mutesi wati walangikenge, ndipo uyo wakuyowoya mautesi wati waphokwenge chara.

⁶Ŵanandi ŵakupenja kutemweka na munthu uyo ndi mwanangwa, ndipo munthu yose ndi mubwezi wa uyo wakupereka vyawanangwa.

⁷Usange mukavu wakukanika na ŵabali ŵakhe wose, asi ŵabwezi ŵakhe ŵati ŵamukanenge kwakuruska? Para wakuŵachema kuti ŵamovwire iwo kuti ŵakumupulika chara.

⁸Munthu uyo wakusanga mahara wakujitemwa iyomwene. Uyo wakupulikiska vinthu, wati wasakate.

⁹Kaboni mutesi wati walangikenge, ndipo uyo wakuyowoya mautesi wati wamare petu.

¹⁰Nchakwenerera chara kuti chindere chikharenge mu umoyo wakufwasa, ndipo kwakuruska chomene nchakwenerera chara kuti muzga ndiyo waŵawusenge ŵakaronga.

¹¹Munthu wa mahara ghaweme wakuziwurika kukaripa, ndipo kuzerezga kwananga ndiwo uchindami wakhe.

¹²Ukari wa karonga ngwakofya nga ndi kubangura kwa nkharamu kweni kutemwa kwakhe kuli nga ndi jumi pa utheka.

¹³Mwana uyo nchindere ndi soka ku ŵawiske. Muwoli wa mbembe wali nga ndi manthonyezi gha vura ya muswera.

¹⁴Munthu wakuhara nyumba na usambazi kufuma ku ŵawiske, kweni muwoli wa mahara wakufuma kwa FUMU.

¹⁵Ukata ukugoneka munthu tulo tuzitu, mulesi wakusuzgika na njara.

¹⁶Uyo wakusungilira marango, wakusungilira umoyo, ndipo wakureka kupulikira wati wafwenge.

¹⁷Uyo wakumuchitira lusungu mukavu wakuyibwerekeska FUMU, iyo yiti yimupe njombe pa mlimo wakhe.

¹⁸Umulangenge mwana wako apo mwaŵi uchalipo. Usange ukumurekerera umunangenge.

¹⁹Munthu mukari chomene, wakwenera kulangika, chifukwa usange ukumuthaska, ipo umovwirenge nyengo yose.

²⁰Mupulikirenge urongozgi na kuzomera kusambizgika, mwakuti kunthazi muŵenge na mahara.

²¹Munthu wakunozgera kuchita vinandi mu mtima wakhe, kweni ivyo FUMU yikukhumba ndivyo viti vichitikenge.

²²Icho chikukhumbikwa chomene ku munthu ndi kugomezgeka, ndipo munthu mukavu ndi muweme kwakuruska mutesi.

²³Kopa FUMU kukurongozgera ku umoyo, ndipo uyo wakopa wati wakhare na kufwasa. Iyo kaheni kuti kamwizirenge chara.

²⁴Munthu mukata wakukovya na woko lakhe mu dira, kweni likumuvuska kuti waliwuskemo na kuliŵika ku mlomo wakhe.

²⁵Usange watimba munthu wakuchonjora, awo mbambula mahara ŵati ŵasambire kuŵa ŵakuchenjera. Usange wachenya uyo wakupulikiska vinthu, iyo wandulengepo mahara.

²⁶Uyo wakusuzga ŵawiske na kuchimbizga ŵanyina, ndi mwana wakukhozga soni na wakulengeska.

²⁷Mwana wane, para wareka kutegherezga ku visambizgo, uti upatukanenge nagho mazgu ghakupa mahara.

²⁸Kaboni wawakawaka wakuyuyura weruzgi wakunyoroka. Munthu muheni ŵakumirimitizga uheni nga ndi para wakumira chakurya.

²⁹Chilango chaŵanozgekera kale ŵanthu awo ŵakuchonjora. Kwanozgeka kale kuti vindere vitimbike pa muwongo.