Read new_tumbuka_bible Zintharika 2 Bible Online

Zintharika 2 - new_tumbuka_bible bible

Zintharika 2

¹Mwana wane, usange ukupokerera mazgu ghane, na kusungilira marango ghane,

²pakutegherezga makutu ghako ku mahara, na kuŵikapo mtima wako ku umanyi,

³usange ukuromba kuti uŵe na umanyi, na kuromba kuti uŵe wakupulikiska vinthu,

⁴usange ukupenja mahara umo ukupenjera siliva, na kughapenjiska umo ukupenjera usambazi wakubisika,

⁵penepapo uti upulikiske za kuchindika FUMU, ndipo uti usangenge umanyi wa Chiuta.

⁶Pakuti FUMU ndiyo yikupereka mahara, mu mlomo wakhe mukufuma umanyi na kapulikiskiro.

⁷Yikuŵasungira mahara ghenecho awo mbarunji. Iyo ndiyo chiskango cha awo ŵakwenda mu kunyoroka.

⁸Yikusungilira nthowa za weruzgi wakunyoroka, yikuvikirira nthowa za awo mbakugomezgeka kwa iyo.

⁹Ntheura uti umanye vya urunji, weruzgi wakunyoroka, vya kureka kutemwera, na nthowa yiliyose iyo njiweme.

¹⁰Pakuti mahara ghati ghanjire mu mtima wako, kumanya vinthu kuti kukondweske mzimu wako.

¹¹Kaghanaghaniro kaweme kati kaŵe mulinda wako, ndipo umanyi uti ukuvikirire.

¹²Mahara ghati ghakuthaske ku nthowa ziheni, ghakuthaskenge ku ŵakubendera mu kayowoyero,

¹³ŵeneawo ŵakureka nthowa za urunji, na kwenda mu nthowa za mu mdima,

¹⁴awo ŵakukondwa para ŵakuchita uheni, ndipo ŵakusekerera na nthowa zakubendera.

¹⁵Ŵanthu ŵeneaŵa nthowa zawo nzakubendera, ndipo machitiro ghawo ngakupusika.

¹⁶Mahara ghati ghakuthaskeso ku mwanakazi muzaghali, mwanakazi uyo ndi muleŵeleŵe, uyo wakuyowoya mazgu ghakumyamyatika,

¹⁷uyo wakureka mufumu wa pa uwukirano wakhe, na kuruwa phangano ilo wakachita kwa Chiuta wakhe,

¹⁸Pakuti nyumba yakhe yikukhilira ku nyifwa, ndipo nthowa zakhe zikuya ku malo gha ŵakufwa.

¹⁹Pa awo ŵakuruta kwa iyo, palije uyo wakuwerako, nanga nkhuwereraso mu nthowa zakurazga ku umoyo.

²⁰Ntheura iwe wendenge mu nthowa ya ŵaweme, ndipo usungilire mendero gha ŵarunji.

²¹Pakuti ŵarunji ŵati ŵakhare mu charu, ŵakugomezgeka ŵati ŵakhalirire mwenemumo.

²²Kweni ŵaheni ŵati wawuskikengemo mu charu, ŵaryarya ŵati ŵafumiskikengemo mu charu.