Read new_tumbuka_bible Zintharika 20 Bible Online

Zintharika 20 - new_tumbuka_bible bible

Zintharika 20

¹Vinyo likunyoza, moŵa uli na mbembe. Uyo wakupuruskika na ivi, walije mahara.

²Ukari wa karonga ngwakofya nga ndi kubangura kwa nkharamu. Yose uyo wakumukaripiska wakutaya umoyo wakhe.

³Munthu uyo wakukhara kutali na mphindano ŵati ŵamupe nchindi, kweni chindere chilichose chikutemwa mphindano.

⁴Pa nyengo ya chifuku munthu mukata kuti wakulima chara. Pa nyengo ya kuvuna wizamkupenja kweni wizamkusanga chilichose chara.

⁵Vyakurata vya mtima wa munthu vili nga ndi ndimba ya maji, kweni munthu wa mahara pera ndiyo wangavifumiska.

⁶Ŵanthu ŵanandi ŵakuyowoya kuti mbakugomezgeka, kweni ndi njani wangasanga munthu wakugomezgeka nadi?

⁷Munthu murunji wakwenda mu nthowa zakunyoroka. Mbakutumbikika ŵana ŵakhe, awo ŵakwenda mu nthowa zakhe.

⁸Para karonga wakhara pa chizumbe chakweruzgira, wakumanya na maso pera ŵanthu wose awo mbaheni.

⁹Kasi ndi njani uyo wangayowoya kuti, “Ine ndili kuwutozga mtima wane; ndili wakutowa na wambula kwananga?”

¹⁰Vyakupimira uzitu ivyo vikupambana na vyakupimira vinyakhe ivyo vikupambana, vyose viŵiri wuwo mbukazuzi kwa FUMU.

¹¹Nanga ndi mwana nayo wakumanyikwa na milimo yakhe, kuti ivyo wakuchita nviweme na vyakunyoroka.

¹²Makutu agho tikupulikira na maso agho tikulaŵiskira, vyose FUMU ndiyo yikalenga.

¹³Ungatemwanga kugona tulo chara, mzire ukavuke. Wuka, ndipo uti uŵenge na vyakurya vinandi.

¹⁴Munthu uyo wakugula chinthu wakuti, “Nchiheni, nchiheni.” Kweni para wagula na kufumapo, wakwamba kujikuzga.

¹⁵Pali golide na mawe ghanandi gha mtengo wapatali, kweni mlomo uwo ukuyowoya vya mahara, uli nga ndi libwe lakuzirwa.

¹⁶Umupoke chakuvwara chakhe munthu uyo wakukhalira ukaboni mulendo, ndipo chakuvwara chakhe chiŵenge chikhole para iyo wakhalira ukaboni mlendo.

¹⁷Chakurya chakuchisangira mu uryarya chikunowa nadi, kweni pamanyuma chikuzgoka nga ndi muchenga mu mlomo wakhe.

¹⁸Para ukunozgekera kuchita chinthu udange wafumba. Ungayambanga nkhondo chara kwambula urongozgi wakwenerera.

¹⁹Munthu uyo wakutemwa kusesa, wakuvumbula ivyo vili kubisika. Ntheura ureke kwendezgana na uyo wakuyowoya vya uchindere.

²⁰Usange munthu wakutemba ŵawiske panji ŵanyina, umoyo wakhe umarenge nga ndi nyali iyo yazimwira mu nyengo ya munkhorwe.

²¹Chuma chakuchisanga luŵiro pa kwambilira, kuti chizamkutumbikika pa umaliro chara.

²²Ureke kuyowoya kuti, “Nditi ndiwezgerenge uheni.” Ugomezge FUMU ndipo iyo ndiyo yikovwirenge.

²³Vyakupimira uzitu ivyo vikupambana mbukazuzi kwa FUMU, ndipo miyeso ya utesi kuti njiweme chara.

²⁴Mendero gha munthu ghakurongozgeka na FUMU. Ntheura munthu wangamanya uli nthowa yakhe?

²⁵Nchipingo kupangana luŵiro kuti uperekenge kwa Chiuta ndipo pamanyuma ulanguruke uku wapangana kale.

²⁶Karonga wa mahara wakuŵasanga ŵaheni, ndipo wakuŵalanga kwambula lusungu.

²⁷Mzimu wa munthu ndiyo nyali ya FUMU, iyo yikupenjerezga viŵaro vyose vya mukati.

²⁸Chisungusungu na kugomezgeka ndivyo vikusungilira karonga, ndipo urunji ndiwo ukusungilira chizumbe chakhe.

²⁹Uchindami wa ŵawukirano ndi nkhongono zawo, kweni utozi wa ŵachekuru ndi mbuha zawo.

³⁰Kutimba kwakupweteka kukuwuskapo uheni, kuthyapula kukuchizga viŵaro vyose vya mukati.