Read new_tumbuka_bible Zintharika 21 Bible Online

Zintharika 21 - new_tumbuka_bible bible

Zintharika 21

¹Mtima wa karonga uli nga ndi mronga wa maji mu mawoko gha FUMU. Iyo yikuwurongozgera ku ivyo yikukhumba.

²Mendero ghose gha munthu ngakurunjika kwa iyomwene, kweni FUMU ndiyo yikupima vya mukati mu mtima.

³Kuchita vya urunji na vyakunyoroka, kukukondweska FUMU kuruska kupereka sembe.

⁴Kawonekero ka kujitukumura na mtima wakujikuzga, vikurongora kuti munthu ngwa kubendera, ndipo kukuŵa kwananga.

⁵Unozgero wa munthu wakutokatoka ukumupa chandulo chikuru. Kweni yose uyo wakuchita mwa luŵiro, wakunjira waka mu ukavu.

⁶Vyuma vyakusangira mu utesi vili nga ndi nyathutwe wakupwaralikira, ndipo nga ndi chipingo cha nyifwa.

⁷Vivulupi vya ŵanthu ŵaheni vikukoma iwoŵene, chifukwa ŵakukana kuchita icho nchakurunjika.

⁸Nthowa ya munthu wakwananga njakubendera, kweni nkharo ya munthu murunji njakunyoroka.

⁹Nkhuwemiko kukhara mu chisakasa kuruska kukhara mu nyumba pamoza na muwoli wa mbembe.

¹⁰Mtima wa munthu muheni ukunwekera uheni. Iyo walije lusungu na muzengezgani wakhe.

¹¹Para uyo wakuchonjora wakulangika, awo mbambula mahara wakuŵa ŵamahara. Para munthu wa mahara wakusambizgika, iyo wakusazgirako umanyi.

¹²Chiuta uyo ndi murunji wakumanya ivyo vikuchitika mu nyumba za ŵaheni. Ŵanthu ŵaheni wakuŵawiskira pasi na kuŵamara petu.

¹³Munthu uyo wakujara makutu ghakhe para mukavu wakulira, iyo nayo wizamkulira ndipo ŵizamkumupulika chara.

¹⁴Chawanangwa cha ku ubende chikutuniska ukari, chimbundi cha kubisika chikukanizga ukari wakugolera.

¹⁵Para weruzgi wakunyoroka wachitika ŵarunji ŵakuŵa na chimwemwe, kweni awo ŵakuchita uheni ŵakutenthema.

¹⁶Munthu uyo wakupatukamo mu nthowa ya awo ŵali na umanyi wakwiza kapumulira mukati mu malo gha ŵakufwa.

¹⁷Munthu uyo wakutemwa vyakukondwereska wakavukenge, ndipo uyo wakutemwa vinyo na vya mafuta waŵenge musambazi chara.

¹⁸Ŵanthu ŵaheni ŵajipenge suzgo ilo ŵakakhumbanga kuchitira ŵarunji.

¹⁹Nkhuwemiko kukhara mu chiparamba kuruska kukhara na muwoli wa mbembe na wakukweŵeska.

²⁰Chuma chakuzirwa chikukhalirira mu nyumba ya munthu wa mahara, kweni chindere chikusamphanya chuma chakhe.

²¹Munthu uyo wakurondora urunji na lusungu wasangenge umoyo na nchindi.

²²Munthu wa mahara wakuthereska msumba wa ŵanthu ŵankhongono, ndipo wakubwangandulira pasi linga la kukhora ilo ŵanthu ŵakuligomezga.

²³Uyo wakujikora mu kayowoyero kakhe wakukhara kutali na visuzgo.

²⁴Munthu wakujikuzga na wakujitukumura wakuchemeka na zina lakuti, “Wakunyoza.” Iyo wakukunthirapo pakunyoza.

²⁵Kudokera kwa munthu mukata kukumukoma yekha pakuti wakukana kuteŵeta na mawoko ghakhe.

²⁶Muheni wakutora zuŵa lose pakudokeradokera waka, kweni ŵarunji ŵakupereka waka kwambula kukanilira.

²⁷Sembe iyo muheni wakupereka kwa FUMU mbukazuzi. Yikuŵa yikazuzi kwakuruska para wakuyipereka na maghanoghano ghaheni.

²⁸Kaboni mutesi wati wafwenge, kweni mazgu gha uyo wakuneneska ghakhalirirenge swii.

²⁹Munthu muheni wakurongora chisko cha chikanga, kweni munthu murunji wakulanguruka na mendero ghakhe.

³⁰Kulije mahara panji umanyi nesi urongozgi weneuwo ungimikana na FUMU.

³¹Nanga hachi linganozgekera zuŵa la nkhondo kutonda kukufuma kwa FUMU.