Read new_tumbuka_bible Zintharika 22 Bible Online

Zintharika 22 - new_tumbuka_bible bible

Zintharika 22

¹Lumbiri luweme ndilo lukukhumbikwa chomene kwakuruska usambazi unandi. Kutemweka na ŵanthu nkhuweme kwakuruska golide na siliva.

²Musambazi na mukavu wakukumana pa chinthu chimoza, chakuti wose FUMU ndiyo mlengi wawo.

³Munthu wakuchenjera wakubisama para wawona urwani, kweni chindere chikujendera waka ndipo chikupwetekeka.

⁴Ŵanthu awo ŵakujiyuyura na kuchindika FUMU chandulo chawo ndi usambazi, nchindi na umoyo.

⁵Mu nthowa ya ŵanthu ŵaheni ndimo mukukhara minga na vipingo. Kweni uyo wakusungilira umoyo wakhe wakukhara kutali na vyeneivi.

⁶Umuzgoŵezge mwana mu nthowa iyo wakwenera kwendamo, ndipo para wakura kuti wati wawukengemo chara.

⁷Musambazi wakuwusa mukavu ndipo wakukongora wakuŵa muzga wa uyo wakukongoreska.

⁸Munthu uyo wakumija ubendezi wati wavune visuzgo, ndipo nthonga ya ukari wakhe yiphyokenge.

⁹Munthu uyo ndi mwanangwa wati watumbikike, pakuti ŵakavu wakuŵagaŵirako vyakurya vyakhe.

¹⁰Usange mwachimbizga munthu wakuchonjora, mphindano nayo yiti yimarenge, ndipo kulimbana na musunjiro viti vimarenge.

¹¹Munthu uyo wakutemwa kuŵa na mtima uweme, ndipo uyo mayowoyero ghakhe ngaweme, wati waŵe mubwezi wa karonga.

¹²FUMU yikulaŵiska na kuwona kuti umanyi ukuvikiririka, kweni yikutimbanizga ivyo ŵakunozgera ŵanthu ŵambula magomezgeko.

¹³Munthu mukata wakuti, “Kuli nkharamu kuwaro! Ndingakomeka para ndingakumana nayo mu ŵagurwe.”

¹⁴Mayowoyero gha mwanakazi muzaghali ghali nga ndi khururu lakuzongoka. Munthu uyo Fumu yamutemba wati wawire mwenemumo.

¹⁵Uchindere ukuvungika mu mtima wa mwana, kweni luswazu lwakulangira mwana lukuwuchimbizgira kutali.

¹⁶Munthu uyo wakutindiŵizgira pasi ŵakavu kuti wajisambazge, panji uyo wakupereka vyawanangwa ku ŵasambazi, wati wajikavuskenge.

¹⁷Tegherezga khutu lako, pulika mazgu gha ŵamahara, ŵikapo mtima pa mazgu agho nkhukusambizga.

¹⁸Chiŵenge chakukondweska para ungaghasungilira, na kuŵa wakunozgeka kughayowoya pa nyengo yakhe.

¹⁹Nkhukhumba iwe uŵike chigomezgo chako mwa FUMU. Ndicho chifukwa nditi kusambizge mazgu agha iwe sono.

²⁰Asi ine ndakulembera zintharika 30, zakukurongozga na kukupa vinjeru,

²¹zintharika zakukusambizga icho nchakunyoroka na cha unenesko, mwakuti uŵazgore mwa unenesko awo ŵakakutuma?

²²Ungamwibiranga mukavu chara pa chifukwa chakuti ndi mukavu. Ungatindiŵizgiranga pasi uyo wakusuzgika para wakweruzgika.

²³Pakuti FUMU ndiyo yiti yiŵavikirire pa mirandu yawo, ndipo iyo yiti yipoke umoyo wa awo ŵakupoka vinthu vyawo.

²⁴Ungakorananga ubwezi na munthu uyo ŵali na mtima wa befu chara, ndipo ungatemwananga na munthu uyo wakukaripa luŵiro chara,

²⁵mzire nawe usambireko nthowa zakhe ndipo uwire mu chipingo.

²⁶Ungaŵanga yumoza wa awo ŵakupereka chikhole chara, ŵeneawo ŵakujizgora kuŵa nkhoswe pa ngongole.

²⁷Usange ulije kanthu kakulipa, wizamkutora na chitara chako wuwo?

²⁸Ureke kusezga chimanyikwiro cha mwaka cha mphaka, cheneicho ŵawiskemwekuru ŵakimika.

²⁹Kasi ukumuwona munthu uyo ndi nkhwantha pa mlimo wakhe? Iyo ndiyo wizamkuteŵetera ŵakaronga, kuti wati wateŵetere ŵanthu ŵambula kumanyikwa chara.