Read new_tumbuka_bible Zintharika 23 Bible Online

Zintharika 23 - new_tumbuka_bible bible

Zintharika 23

¹Para wakhara pa kurya na uyo wakuwusa, umupanikizge makora uyo wali panthazi pako.

²Pakurya ujikorenge usange ndiwe munthu wa chiryoko chikuru.

³Ungakhumbiranga vyakurya vyakhe vyakunowa chifukwa ndi vyakurya vyakupusika waka.

⁴Ungajivuskanga kuti uŵe na usambazi, uŵenge wa mahara kujikanizga.

⁵Para maso ghako ghawuwona waka, ukuzgeŵerekera waka. Luŵiroluŵiro usambazi ukumera mapapindo na kuwurukira kuchanya nga ndi nombo.

⁶Ungaryanga chakurya cha munthu mukaka chara, nesi kukhumbira vyakurya vyakhe vyakunowa.

⁷Pakuti iyo ndi munthu uyo wakughanaghana za mtengo wa chakurya. Iyo wakuti kwa iwe, “Ryanga ndipo mwanga!” Kweni mu mtima wakhe kuti wakuneneska chara.

⁸Uti uwukure chakurya chichoko icho warya na kunanga mazgu ghako ghaweme.

⁹Ungayowoyanga kwa chindere kuti chipulike chara, pakuti chiyuyurenge mazgu ghako gha mahara.

¹⁰Ureke kusezga chimanyikwiro cha mwaka cha mphaka, panji nesi kutora charu cha awo mbalanda.

¹¹Pakuti Chiuta Muwomboli wawo ngwa nkhongono. Iyo wati waŵe muvikiriri wawo, kwimikana nawe.

¹²Mtima wako uŵenge pa visambizgo, makutu ghako ghategherezge ku mazgu gha mahara.

¹³Ungarekanga kumulanga mwana chara. Usange ukumuthyapula na luswazu iyo wati wafwenge chara.

¹⁴Usange wamuthyapula na luswazu uti uthaske umoyo wakhe ku nyifwa.

¹⁵Mwana wane, usange mtima wako ungaŵa wa mahara, mtima wane nawo uti ukondwenge.

¹⁶Mtima wane usekererenge fikepo para ndingapulika ukuyowoya mazgu gha mahara.

¹⁷Mtima wako ureke kuchita sanje na ŵakwananga kweni urutilire kuchindika FUMU mazuŵa ghose.

¹⁸Nadidi, uŵenge makora kunthazi, ndipo chigomezgo chako kuti chizamkumara chara.

¹⁹Mwana wane, pulika na kuŵa wa mahara, ndipo rongozga mtima wako mu nthowa yiweme.

²⁰Ungakharanga pamoza na awo ŵakumwa vinyo chomene chara, nesi pamoza na awo mbaryezi pa nyama chara.

²¹Pakuti ŵaloŵevu na ŵaryezi ŵati ŵakavukenge, ndipo munthu mukata wati wavwarenge vizwazwa.

²²Upulikirenge ŵawuso ŵeneawo ŵakakubaba, ndipo ureke kuyuyura ŵanyoko para ŵachekura.

²³Ugule unenesko, ndipo ureke kuwuguliska. Ugule mahara, visambizgo, na mtima wakupulikiska vinthu.

²⁴Wiske wa munthu murunji wasekererenge chomene. Munthu uyo wababa mwana wa mahara, wakondwerenge nayo.

²⁵Ŵawuso na ŵanyoko ŵaŵe ŵakukondwa, uyo ŵakakubaba wakondwerenge.

²⁶Mwana wane, mtima wako undipulikirenge ine, ndipo maso ghako ghalaŵiskenge nthowa zane.

²⁷Pakuti mwanakazi muzaghali wali nga ndi khururu lakuzongoka, ndipo mwanakazi muleŵe wali nga ndi mbuna yifinyi.

²⁸Wakukhazga ŵanarume nga ndi munkhungu, ndipo wakusazgirako ŵambula kugomezgeka mukati mu ŵanarume.

²⁹Ndi njani uyo wali na soka? Ndi njani uyo wali na chitima? Ndi njani uyo wakupindana na ŵanyakhe? Ndi njani uyo wakudandaula? Ndi njani uyo wali na vikomokomo vyambula chifukwa? Ndi njani uyo maso ghakhe ngachesama?

³⁰Asi ndi ŵanthu awo ŵakutandalira kumwa vinyo, ŵeneawo ŵakuyezga kumwa vinyo lakusazga?

³¹Ungalaŵiskanga pa vinyo ilo ndiswesi, para likututuka mu mphindi, na kukhilira makoramakora.

³²Pa umaliro vinyo likuluma nga ndi njoka, ndipo likupweteka na urwirwi wakhe nga ndi chipiri.

³³Maso ghako ghati ghawone vinthu vya chilendo, maghanoghano na mazgu ghako ghaŵenge ghakupuruka pera.

³⁴Nadi uti uŵe nga ndi munthu uyo wagona pasi mukati mu nyanja, panji nga ndi munthu uyo wagona pa songo ya mulongoti.

³⁵Wizamkuyowoya kuti, “Ŵakanditimba, kweni kuti nkhapwetekeka chara. Ŵakandithyapula, kweni kuti nkhapulika kanthu chara. Kasi mulenje uti wizenge pauli? Nkhukhumba kuti ndimweso vinyo linyakhe.”