Read new_tumbuka_bible Zintharika 24 Bible Online

Zintharika 24 - new_tumbuka_bible bible

Zintharika 24

¹Ureke kuchita sanje na ŵanthu ŵaheni, nanga nkhunwekera kuŵa pamoza nawo.

²Pakuti mitima yawo yikunozgekera kuchita vivulupi pera, ndipo milomo yawo yikuyowoya vya kuchita uheni pera.

³Nyumba yikuzengeka na munthu wa vinjeru, ndipo yikukhozgeka na munthu wa mahara.

⁴Na umanyi munthu wakuzuzga vipinda vyakhe, na usambazi wakukondweska na wakuzirwa.

⁵Munthu wa mahara wakuruska munthu wankhongono za thupi, ndipo munthu wakusambira wakuruska chinkhara cha nkhongono.

⁶Na urongozgi wa mahara ungamanya kukarwa nkhondo, para ŵarongozgi mbanandi, kuvivya kukuŵapo.

⁷Mahara ngapatali chomene kwa uyo nchindere. Pa ungano iyo kuti wakuyowoya kanthu chara.

⁸Munthu uyo wakunozgekera kuchita uheni wati wachemekenge kuti ndi munthu wa chiŵembu.

⁹Kunozgekera kwa wakupusa nkhwananga, ndipo munthu uyo wakunyoza mbukazuzi ku ŵanthu.

¹⁰Usange munthu wakutaya mtima pa zuŵa la visuzgo, ndiko kuti nkhongono zakhe nzichoko.

¹¹Uŵaponoske awo ŵakutorekera ku nyifwa, uŵathaske awo ŵakupenthyapenthya kuya ku kukomeka.

¹²Usange mukuyowoya kuti, “Ise kuti tikuchimanya ichi chara,” kasi wakuchimanya ichi chara Chiuta, uyo wakupima mtima wa munthu. Kasi uyo wakusungilira umoyo wa munthu wakumanya chara? Kasi wawezgerenge munthu kwakuyana na milimo wakhe chara?

¹³Wa mwana wane, uryenge uchi pakuti nguweme, ndipo uchi uwo ukunthonya kufuma mu chisa ndiwo ukunowa mu mlomo wako.

¹⁴Umanye kuti ndimo ghaliri mahara ku mzimu wako. Usange waghasanga, vinthu vikwenderenge makora kunthazi. Chigomezgo chako kuti chiti chimarenge chara.

¹⁵Ungaŵanga nga ndi chigeŵenga icho chikukhazga pa nyumba ya munthu murunji. Ungachitiranga vya nkhaza pa malo apo wakukhara munthu murunji.

¹⁶Pakuti munthu murunji nanga wangawa kanandinandi ndipouli nyengo zose wakuwukaso. Kweni ŵanthu ŵaheni soka likuŵawiskira pasi nkhanira.

¹⁷Ungasekereranga chara para murwani wako wawa. Mtima wako ungakondwanga chara para iyo wakhuŵara.

¹⁸Mzire FUMU yichiwone, ndipo yireke kukondwa nacho, na kuwuskapo ukari wakhe pa muheni yura.

¹⁹Ungakweŵekanga chifukwa cha awo ŵakuchita uheni, panji kuchita sanje na ŵanthu ŵaheni.

²⁰Pakuti muheni walije chigomezgo cha kunthazi, umoyo wa ŵaheni uti uzimyike nga ndi nyali.

²¹Mwana wane, uchindikenge FUMU ndiposo na karonga, ureke kukorerana na awo ŵali na mutafu ku ŵeneaŵa.

²²Pakuti soka liti lizenge mwa mabuchibuchi kufuma kwa iwo, ndi njani wakumanya pharaniko ilo liti likwizire kufumira kwa wose ŵaŵiri wuwo?

²³Izi ndi ntharika zinyakhe za ŵanthu ŵamahara: Nkhuweme chara kutemwera pakweruzga mrandu.

²⁴Uyo wakuphalira munthu wakwananga kuti, “Iwe ulije mrandu,” wati watembenge na ŵanthu, na kutinkhika na mafuko.

²⁵Kweni ŵeruzgi awo ŵakulanga ŵaheni ŵati ŵakhare makora ŵati ŵaŵenge na vitumbiko chomene.

²⁶Munthu uyo wakukuzgora mwa unenesko wakurongora ubwezi wenecho.

²⁷Uchite danga nchito za kuwaro na kunozga minda yinu, pamanyuma ndipo muzengenge nyumba yinu.

²⁸Ungaŵanga kaboni wakumususka munyako kwambula chifukwa, ndipo mlomo wako ureke kuyowoya vya utesi.

²⁹Ureke kuyowoya kuti, “Ndimuchitirenge nga ndi umo iyo wakandichitira, ndimuwezgerenge icho iyo wakandichitira.”

³⁰Nkhenda pa munda wa munthu mukata na pa munda wa mpheska wa chindere.

³¹Wona, minga zikamera mu munda ura posepose. Thondo likataŵana mu munda wose, ndipo luŵigho lwa mawe lukabwangandukira pasi.

³²Sono nkhawona na kulanguruka nacho. Nkhalaŵiska ndipo nkhasambirapo chisambizgo chakuti:

³³Iwe ukuti, “Ndigonepo pachoko waka, ndisiwepo pachoko waka. Ndizingepo mawoko pachoko waka, kuti ndipumulepo.”

³⁴Penepapo ukavu uti ukwizirenge nga ndi muskoghi, usauchi nawo uti ukurotokere nga nchigeŵenga.