Read new_tumbuka_bible Zintharika 25 Bible Online

Zintharika 25 - new_tumbuka_bible bible

Zintharika 25

¹Izi ndi ntharika zinyakheso za Solomoni, izo zikaŵikika pamoza na ŵalembi ŵa mu nyumba ya ufumu ya Hezekiya karonga wa charu cha Yuda.

²Ndi uchindami wa Chiuta kubisa vinthu kweni uchindami wa karonga ndi kupenjerera vinthu vira.

³Umo uliri mtambo kuchanya nkhanira, ndipo umo chiliri charu kuzongoka kwakhe, ndimo ghaliri maghanoghano gha ŵakaronga kureka kumanyikwa.

⁴Wuskako makharang'anjo ku siliva ndipo mufuzi wangamanya kupanga chiteŵetero.

⁵Wuskako ŵanthu ŵaheni panthazi pa karonga, ndipo chizumbe cha ufumu wakhe chiti chikhozgekenge mu urunji.

⁶Ungajikuzganga panthazi pa karonga chara nanga nkhwimilira mu malo gha ŵanthu ŵakuzirwa.

⁷Pakuti nkhuwemiko kuphalirika kuti, “Zanga kuno kwa ine,” kuruska kuŵikika pa malo gha pasi panthazi pa karonga. Ivyo maso ghako ghaviwona,

⁸ureke kwiza navyo luŵiro ku mphara. Kasi wizamkuti uli pa umaliro, para munyako wakukukhozga soni pakukususka?

⁹Munyako udumbiskanenge nayo pa mwekha, para mwapambana, ndipo ureke kuvumbula chisisi cha munyako,

¹⁰mzire uyo wapulika mazgu ghako wakukhozge soni, ndipo lumbiri lwako luheni lumarenge chara.

¹¹Mazgu ghakuyowoyeka pa nyengo yakwenerera, ghali nga ndi vyakutozgera vya golide mu chakuŵikamo cha siliva.

¹²Kuchenya kwa munthu wa mahara ku munthu uyo wakupulikiska, kuli nga ndi mphete ya golide panji nga ndi chitoweskero cha golide.

¹³Umo ghaliri maji ghakuzizima mu nyengo ya kuvunira ndimo yiliri nthumi yakugomezgeka ku awo ŵayituma. Yikusisipuska mzimu wa sekuru wakhe.

¹⁴Munthu uyo wakujikuzga na chawanangwa icho kuti wakupereka chara, ŵali nga ndi maŵingu na mphepo ivyo vikutondeka kurokweska vura.

¹⁵Mu kuzizipizga, karonga wakupemberezgeka, ndipo kuyowoya mwanchindi kukuswa mtima unonono.

¹⁶Usange wasanga uchi, uryepo wakukwana nawe pera, mzire ukhute chomene na kuwukura.

¹⁷Ureke kwendako kaŵirikaŵiri ku nyumba ya muzengezgani wako, mzire iyo wavuke nawe na kwamba kukutinkha.

¹⁸Munthu uyo wakumupanikizgira ukaboni wa utesi muzengezgani wakhe, wali nga ndi nthonga, panji lupanga panji muvwi wakuthwa.

¹⁹Kugomezga munthu wambula kugomezgeka mu nyengo ya suzgo, kuli nga ndi kurya na jino lakuvunda panji kwenda na kalundi kakupendera.

²⁰Kumwimbira sumu munthu wa chitima chikuru kuli nga ndi kumuvura malaya pa nyengo ya kuzizima, panji nga ndi kuŵika muchere pa chilonda.

²¹Usange murwani wako wali na njara umupe chakurya warye, ndipo usange womirwa umupe maji wamwe.

²²Pakuchita ntheura uti urundike makara gha moto pa mutu wakhe, ndipo FUMU yiti yikupe njombe.

²³Umo mphepo ya ku mpoto yikwizira na vura, ndimo kusesa kukwizira na mawonekero gha ukari.

²⁴Nkhuwemiko kukhara mu chisakasa kuruska kukhara mu nyumba pamoza na muwoli wa mbembe.

²⁵Uthenga uweme uwo ukufuma ku charu cha kutali, uli nga ndi maji ghakuzizima kwa uyo womirwa.

²⁶Murunji uyo wakuthera kwa muheni, wali nga ndi chisimi chakuvunduka panji nga ndi mbwiwi yakukazuzgika.

²⁷Kurya uchi unandi kuti nkhuweme chara, panji ncha nchindi chara kujipenjera nchindi.

²⁸Munthu wambula kujikora wali nga ndi msumba uwo ŵarwani ŵawubwangandula na kuwureka wambula viliŵa.