Read new_tumbuka_bible Zintharika 26 Bible Online

Zintharika 26 - new_tumbuka_bible bible

Zintharika 26

¹Umo nkhwakwenerera chara kuti kuŵe chiwuvi pa chihanya, panji vura pa nyengo ya kuvuna, ntheuraso kuti nchakwenerera chara kupereka nchindi ku chindere.

²Kutemba kwambula kwenerera kuti kukugwira nchito chara. Kuli nga ndi kampheta ako kakudukaduka waka panji nga ndi kaŵeruŵeru uyo wakuwuruka waka.

³Chikoti tikutimbira mahachi, tuvisulo tikumangira kukolerera mlomo wa mbunda, ndipo luswazu ndwakukwapulira vindere.

⁴Reka kumuzgora munthu uyo nchindere kwakuyana na uchindere wakhe, mzire iwe nawe uŵe chindere nga ndiyo.

⁵Umuzgore munthu uyo nchindere kwakuyana na uchindere wakhe mzire chijipime kuti ncha mahara.

⁶Munthu uyo wakutuma chindere kuyegha uthenga wakujipweteka yekha na kujichemera visuzgo.

⁷Umo malundi gha munthu wakupunduka ghaliri ghambula nchito, ndimo yiliri ntharika yakuyowoyeka na chindere.

⁸Munthu uyo wakuchindika chindere wali nga ndi uyo wakukakilira libwe mu fyata.

⁹Umo ukuchitira munga wakulasa woko la mloŵevu, ndimo yikuŵira ntharika mu mlomo wa chindere.

¹⁰Munthu uyo wakulemba nchito chindere panji mulendo, wali nga ndi munthu uyo wakuponya mivwi na kulasa waliyose.

¹¹Nga ndi umo ncheŵe yikuwerera ku mawukuzi ghakhe ndimo wakupusa nayo wakuwererera ku kupusa kwakhe.

¹²Pali chigomezgo chikuruko kwa chindere kuruska munthu uyo wakujipima kuti wali na mahara.

¹³Mukata wakuti, “Muli nkharamu mu nthowa! Muli nkharamu mu misewu ya msumba.”

¹⁴Nga ndi umo chijaro chikuwerera ku vikolerero vyakhe, ndimo mukata pakuzgokerazgokera pa chitara chakhe.

¹⁵Munthu mukata wakukovya na woko lakhe mu dira, kweni likumuvuska kuti waliwuskemo na kuliŵika ku mlomo wakhe.

¹⁶Munthu mukata wakujipima kuti wali na mahara chomene, kwakuruska ŵanthu ŵankhonde na ŵaŵiri awo ŵangamanya kuzgora mwa vinjeru.

¹⁷Uyo wanjirapo pa mphindano iyo njakhe chara, wali nga ndi uyo wakora makutu gha ncheŵe, iyo yikujumphapo waka.

¹⁸Nga ndi munthu wakufuntha uyo wakuponya visinga vya moto, na mivwi ya ulembe,

¹⁹ndimo waliri uyo wakupusika muzengezgani wakhe na kuyowoya kuti, “Nkhachitanga waka myati.”

²⁰Para kulije nkhuni ku moto, moto ukuzimwa, ndipo para palije mwendanato pakati pa ŵanthu mphindano nazo zikumara.

²¹Nga ndi makara ghawaka pa makara gha moto wakunyeka, ndiposo na nkhuni pa moto wakugolera, ndimo waliri munthu wa zawe pakusonkhezga mphindano.

²²Mazgu gha mwendanato ghali nga ndi chakurya chakunowa, icho chikukhilira mu vigaŵa vya mukati vya thupi.

²³Mazgu ghakuyowoyeka mwakumyamyatika uku uli na mtima uheni ghali nga ndi nkhama iyo ŵakuphaka ku chiŵiya.

²⁴Munthu uyo wali na tinkho wakuyowoya mazgu ghaweme chomene, kweni wakubisa upusikizgi mu mtima wakhe.

²⁵Para wakuyowoya mazgu ghakhe ghakuwoneka nga ngakukhorweska nadi. Kweni iwe ureke kughagomezga, chifukwa mu mtima wakhe muli maukazuzi ghankhonde na ghaŵiri.

²⁶Nanga urwani wakhe wangawubisa na upusikizgi kweni uheni wakhe uli pakweru panthazi pa ŵanthu wose.

²⁷Munthu uyo wakujima mbuna, wati wawirengemo iyomwene. Ndipo uyo wakugadabula libwe, liti limudine iyomwene.

²⁸Munthu uyo ndi mutesi wakutinkha uyo wakumupweteka, ndipo mayowoyero ghakumyamyatika ghakukoma.