Read new_tumbuka_bible Zintharika 27 Bible Online

Zintharika 27 - new_tumbuka_bible bible

Zintharika 27

¹Ungajikuzganga na vya machero, pakuti ukumanya chara icho zuŵa la machero liti lizenge nacho.

²Munthu munyakhe ndiyo wakurumbenge, kweni mlomo wako na wako chara. Mulendo ndiyo wakurumbenge, kweni milomo yako na yako chara.

³Libwe ndizitu ndipo muchenga nawo ukuzotopa, kweni lwavyo lwa chindere nduzitu kuruska vyose viŵiri wuwo.

⁴Ukari ukwiza na nkhaza ndipo kukaripa kukubwangandula, kweni kasi ndi njani uyo wangimikana na sanje?

⁵Kuchenya kwa pakweru nkhuwemiko kuruska kutemwa uko nkhwakubisika.

⁶Vilonda vyakufumira kwa mubwezi nvyakugomezgeka, kuruska kuvumbatira kwakufumira kwa murwani.

⁷Munthu uyo wakhuta wakukana kurya na uchi wuwo, kweni uyo wali na njara, chose icho chikuŵaŵa chikunowa.

⁸Munthu uyo wakuyingayinga waka kufuma ku nyumba yakhe, wali nga nchiyuni icho chikuyingayinga waka kufuma ku chivimbo chakhe.

⁹Mafuta na vyakununkhira vikukondweska mtima, kweni urongozgi uweme wakufuma ku mubwezi wako ukuŵa uweme chomene.

¹⁰Ungamurekanga chara mubwezi wako, nanga ndi mubwezi wa ŵawuso. Para uli mu visuzgo ureke kuruta ku nyumba ya mubali wako. Muzengezgani wa pafupi ndi muwemiko, kuruska mubali wako uyo wali kutali.

¹¹Mwana wane, uŵe na mahara ndipo undikondweskenge ine, mwakuti ndimuzgorenge makora munthu yose uyo wakundiyowoyera uheni.

¹²Munthu wakuchenjera wakubisama para wawona urwani, kweni chindere chikujendera waka ndipo chikupwetekeka.

¹³Umupoke chakuvwara chakhe munthu uyo wakukhalira ukaboni mulendo, ndipo chakuvwara chakhe chiŵenge chikhole para iyo wakhalira ukaboni mulendo.

¹⁴Munthu wakurumba muzengezgani wakhe na mulenjelenje chomene, wati wapimikenge nga ndi para wakutemba.

¹⁵Muwoli wa mbembe wali nga ndi manthonyezi gha vura ya muswera.

¹⁶Kukuŵa kunonono kumurekeska mwanakazi wa ntheura nga nkhukorera mphepo ya kuputa panji kukorera mafuta mu woko la maryero.

¹⁷Munthu wakusambira mahara kufuma ku munthu munyakhe, nga ndi umo chisulo chikunorera chisulo chinyakhe.

¹⁸Uyo wakupwererera khuni la vipambi wati warye vipambi vyakhe. Uyo wakuvikirira sekuru wakhe wati wachindikikenge.

¹⁹Umo maji ghakurongorera chisko ndimo mtima wa munthu ukurongorera unthu wakhe.

²⁰Malo gha ŵakufwa na pharaniko kuti vikukhuta chara, maso gha munthu nagho kuti ghakukhuta chara.

²¹Chiŵiya nchakuyezgera siliva ndipo ng'anjo ya moto njakuyezgera golide. Ntheuraso munthu wakupimika na lumbiri lwakhe.

²²Nanga wakupusa ungamupula mu thuli na musi pamoza na vingoma kupusa kwakhe kuti ungawukamo mwa iyo chara.

²³Ukwenera kumanya makora kaŵiro ka mberere na mbuzi zako na kupwererera makora vyakuŵeta vyako.

²⁴Pakuti usambazi kuti ukukhalirira kwa muyirayira chara ndipo kasi mphumphu ya ufumu yikukhalira mpaka ku miwiro yose?

²⁵Para utheka wasengeka, ndipo utheka uphya ukumera, ndipo utheka wa ku mapiri ukuwunjikika,

²⁶mwizamkupanga vyakuvwara kufuma ku weya wa ŵana-mberere, ndipo mbuzi zizamkumupani ndarama zakugulira munda,

²⁷ndipo imwe mwizamkuŵa na mkaka wa mbuzi wakukwanira kuŵa chakurya chinu na cha mbumba yinu yose, ndiposo na cha ŵateŵeti-kazi ŵinu wose.