Read new_tumbuka_bible Zintharika 28 Bible Online

Zintharika 28 - new_tumbuka_bible bible

Zintharika 28

¹Munthu muheni wakuchimbira na para palije wakumuchimbizga, kweni ŵarunji ŵali na chikanga nga ndi nkharamu.

²Para ŵanthu ŵa mu charu ŵananga, ŵakuchiwusa ŵakuŵa ŵanandi, kweni para chikuwusika na munthu wa mahara na wa umanyi mutende uti urutilirenge nyengo yitali.

³Munthu mukavu uyo wakutindiŵizga ŵakavu, wali nga ndi vura ya chikukura iyo yikwananga vyakurya mu minda.

⁴Ŵanthu awo ŵakureka kupulikira dango, ŵakurumba ŵaheni kweni awo ŵakusungilira dango, ŵakususkana nawo.

⁵Ŵanthu ŵaheni kuti ŵakuwupulikiska weruzgi wakunyoroka chara, kweni ŵateŵeti ŵa FUMU ndiwo ŵakuwupulikiska weruzgi uwu makora.

⁶Munthu mukavu uyo wakwenda mu kunyoroka ndi muwemiko kuruska musambazi uyo ngwa kubendera mu mendero ghakhe.

⁷Uyo wakusunga marango ndi mwana wa mahara, kweni uyo wakwenderana na awo mbaryezi ŵakukhozga soni ŵawiske.

⁸Munthu uyo wakwandaniska usambazi wakhe pakupoka chandulo chikuru wakuwunjikira munthu uyo ngwa lusungu ku ŵakavu.

⁹Usange munthu wakukana kupulikira marango, malurombo ghakhe nagho ghaŵenge gha ukazuzi kwa FUMU.

¹⁰Munthu uyo wakupuruska ŵarunji kuti ŵachitenge uheni wati wawirenge mu mbuna iyo wajima yekha, kweni uyo walije kalema wati waharenge viweme.

¹¹Munthu musambazi wakujipima yekha kuti ngwa mahara, kweni mukavu uyo wali na umanyi, wakumanya kaŵiro kose musambazi.

¹²Para ŵarunji ŵachita makora kukuŵa kusekerera kukuru chomene kweni para ŵanthu ŵaheni ŵakuwusa ŵanthu ŵakubisama.

¹³Munthu uyo wakubisa zakwananga zakhe, wati wawonenge viweme chara. Kweni uyo wakuzomera na kuzireka, Chiuta wati wamuchitire lusungu.

¹⁴Wakutumbikika ndi munthu uyo wakopa FUMU nyengo zose, kweni uyo wakunonofya mtima wakhe wati waŵenge mu visuzgo.

¹⁵Umo yiliri nkharamu yakubangura panji nkharamira yikari ndimo wakuŵira karonga muheni ku ŵanthu awo mbakavu.

¹⁶Karonga uyo wakutondeka kumanyiska vinthu ndi mukari na wakutindiŵizga kweni munthu uyo wakutinkha chandulo cha mu ubendezi ndiyo wati wakharenge umoyo utali.

¹⁷Munthu uyo wali na mrandu wakukoma munthu waŵenge wakuchimbirachimbira mpaka wizakafwe. Paŵavye na yumoza wakumovwira.

¹⁸Munthu uyo mendero ghakhe ngambula kalema, wati wathaskike, kweni uyo mendero ghakhe ngakubendera wati wamare petu.

¹⁹Munthu uyo wakulima munda wakhe wati waŵe na chakurya chinandi, kweni uyo wakurondezga nthowa zawakawaka wati waŵe na ukavu ukuru.

²⁰Munthu uyo ngwa kugomezgeka wati waŵenge na vitumbiko vinandi kweni uyo wakuchimbilira kuŵa musambazi wati warekenge kulangika chara.

²¹Kutemwera nkhuweme chara. Ndipouli ŵanji ŵakweruzga mwakutemwera chifukwa cha kachimenyu ka chingwa.

²²Munthu uyo wakukhumba kusambazgika luŵiro wakumanya chara kuti ukavu ukumulindirira.

²³Munthu uyo wakuchenya munyakhe, pamanyuma wati watemweke chomene kuruska uyo wakumyamyatika mu mayowoyero ghakhe.

²⁴Munthu uyo wakwibira ŵawiske panji ŵanyina na kuyowoya kuti, “Uku nkhwananga chara,” wakwenda pamoza na awo ŵakukoma.

²⁵Munthu uyo ngwa chigoro wakuwuska mphindano, kweni uyo wakugomezga mwa FUMU wati waŵenge na vinandi.

²⁶Munthu uyo wakujigomezga yekha nchindere. Kweni uyo wakuchita vya mahara, wati wathaskikenge.

²⁷Uyo wakupereka ku ŵakavu wati wakavukenge chara. Kweni uyo wakulorako ŵakavu chara, wati watembekenge chomene.

²⁸Para ŵaheni ŵakuwusa, ŵanthu ŵakubisama. Kweni para ŵaheni ŵakuparanyika, ŵarunji ŵakwandana.