Read new_tumbuka_bible Zintharika 29 Bible Online

Zintharika 29 - new_tumbuka_bible bible

Zintharika 29

¹Munthu uyo wakuchenyeka kaŵirikaŵiri, kweni wakunonofya mtima wakhe, mwa mabuchibuchi wati wapwetekeke kwambula kuchizgika.

²Para ŵarunji ŵakuwusa ŵanthu ŵakusekerera, kweni para ŵaheni ŵakuwusa, ŵanthu ŵakutampha.

³Munthu uyo wakutemwa mahara wakukondweska ŵawiske, kweni uyo wakwenda na mahule wakunanga vyuma vyakhe.

⁴Karonga wakukhozga charu chakhe na weruzgi wakunyoroka, kweni uyo wakuŵika mtima pa vimbundi charu chakhe wakuchinanga.

⁵Munthu uyo wakuyowoya mwakumyamyatika kwa munyakhe wakujiŵikira chipingo iyomwene.

⁶Munthu muheni wakujinjizga mu chipingo cha kwananga kwakhe, kweni munthu murunji wakwimba na kusekerera.

⁷Murunji wakumanya wanangwa wa ŵakavu, kweni muheni kuti ŵakuchimanya ichi chara.

⁸Ŵakuchonjora ŵakumanya kocha msumba, kweni ŵamahara ŵakuwezga ukari.

⁹Usange munthu wa mahara wakususkana na chindere, chindere chira chikukaripa na kumuseka waka, ndipo pakuŵavye mutende.

¹⁰Ŵanthu awo ŵakuthiska ndopa ŵakutinkha uyo ngwambula kalema, kweni awo mbarunji ŵakuvikirira umoyo wakhe.

¹¹Chindere chikurongora ukari wakhe wose, kweni munthu wa mahara wakujikora.

¹²Usange munthu wakuwusa wakupulikira mautesi, nduna zakhe zose ziŵenge ziheni.

¹³Munthu mukavu na uyo wakutindiŵizgira pasi ŵanyakhe ŵakukozgana pa ichi, chakuti wose ŵaŵiri FUMU ndiyo yikuŵapa ungweru.

¹⁴Usange karonga wakweruzga ŵakavu mu kugomezgeka ufumu wakhe uti ukhozgekenge kwa muyirayira.

¹⁵Luswazu na kuchenya vikupereka mahara, kweni mwana uyo ŵakumurekerera waka wakukhozga soni ŵanyina.

¹⁶Para ŵaheni ŵakuwusa, kwananga kukwandana. Kweni ŵarunji ŵati ŵawone kuwa kwa ŵaheni.

¹⁷Umuchenyenge mwana wako ndipo iyo wakwizirenge na mutende. Iyo wati wakondweske mtima wako.

¹⁸Uko kulije uvumbuzi wa Chiuta, ŵanthu ŵakuyeruzgika chara. Ngwakutumbikika munthu uyo wakusungilira marango.

¹⁹Muteŵeti wakulangika na mazgu pera chara. Pakuti nanga wangaghapulikiska, iyo warolengeko chara.

²⁰Pali chigomezgo chikuruko kwa chindere kuruska munthu uyo wakuyowoya kwambula kughanaghana

²¹Uyo wakunyengerera muteŵeti wakhe kufuma ku wanichi, pa umaliro muteŵeti yura wizamkumuchitiska chitima.

²²Munthu mukari wakuwuska mphindano, ndipo munthu wakukwiya luŵiro wakwananga vinandi.

²³Kujikuzga kwa munthu ndiko kumukhizgenge. Kweni uyo wakujiyuyura wati wapokerenge nchindi.

²⁴Munthu uyo wakwendezgana na munkhungu wakutinkha umoyo wakhe, pakuti nanga iyo wangachita chirapo mu khoti, kuti wangavumbula chilichose chara.

²⁵Munthu uyo wakopa ŵanthu, ŵakujiŵika mu chipingo. Kweni uyo wakugomezga mwa FUMU ndiyo wakuŵa paweme.

²⁶Ŵanandi ŵakukhumba kuti uyo wakuwusa waŵatemwenge. Kweni munthu wakupokera weruzgi wakunyoroka kufuma kwa FUMU.

²⁷Ŵaheni ŵakuwoneka kuŵa ŵakazuzi ku ŵarunji, ndipo ŵarunji nawo ŵakuwoneka kuŵa ŵakazuzi ku ŵaheni.