Read new_tumbuka_bible Zintharika 3 Bible Online

Zintharika 3 - new_tumbuka_bible bible

Zintharika 3

¹Mwana wane, ungaruwanga chisambizgo chane chara, kweni ughasungilirenge marango ghane.

²Pakuti visambizgo vyane viti vikupe umoyo utali, viti vikupe usakati wa vinthu vinandi chomene.

³Chiwuravi na kugomezgeka vireke kupatukana nawe, uvikakilire mu singo yako, ndipo uvilembe mu mtima wako.

⁴Ntheura uti usange uchizi na kuŵa na mbiri yiweme, panthazi pa Chiuta na pa ŵanthu wuwo.

⁵Ugomezgenge FUMU na mtima wako wose, ureke kweghamira ku umanyi wako na wako pera.

⁶Mu milimo yako yose ukumbukenge FUMU, ndipo iyo wati wanyoroske nthowa zako.

⁷Ureke kujipima wekha kuŵa wa mahara, wopenge FUMU ndipo upatukeko ku uheni.

⁸Ichi chiti chipereke umoyo uweme ku thupi lako, chiti chiwezgerenge nkhongono ku viwangwa vyako.

⁹Chindika FUMU na vyuma vyako, ndiposo na vipambi vyakudanga vya vuna yinu.

¹⁰Penepapo nthamba ziti zizurenge na vinandi, viŵiya vyako navyo viti zifurukenge na vinyo.

¹¹Mwana wane, ungayuyuranga kulanga kwa FUMU, nesi kuvuka para yikukuchenya.

¹²Pakuti FUMU yikulanga uyo yikumutemwa, umo dada wakulangira mwana uyo ŵakumutemwa.

¹³Watumbikike munthu uyo wakusanga mahara, munthu mweneuyo wakwandula umanyi.

¹⁴Pakuti mahara ghakuruska chandulo cha siliva, chandulo chakhe chikuruska cha golide.

¹⁵Mahara ngakuzirwa kuruska vitowelo, palije icho ungachidoka chakuyana na mahara.

¹⁶Mahara ghakupereka umoyo utali ku woko limoza, na kupereka usambazi na nchindi ku woko linyakhe.

¹⁷Nthowa za mahara ndi nthowa zakukondweska, ndipo mose umo ghakwenda muli mutende.

¹⁸Mahara ndi khuni la umoyo, ku awo ŵakuskepererana nagho, awo ŵakudemererana nagho ŵakutumbikika,

¹⁹FUMU yikalenga charu cha pasi na mahara ghakhe, yikakhazika mtambo pa malo ghakhe na umanyi wakhe.

²⁰Na mahara ghakhe, ndimba zikaphumuka, ndipo maŵingo ghakarokweska vura.

²¹Mwana wane, sungilira vinjeru viweme na umanyi, vingafumangapo panthazi pako chara.

²²Vinthu ivi viti vikupe umoyo, vitozgenge umoyo wako nga ndi majuda mu singo yako.

²³Ntheura wendenge mu nthowa yako kwambula kaheni, ndipo lundi lako liti likhuŵarenge chara.

²⁴Para ukukhara pasi, uti uŵenge na wofi chara, para ukugona pasi, uti uŵe na tulo tuweme waka.

²⁵Ureke kopa viheni ivyo vikwiza mwa mabuchibuchi, nanga nkhuŵa na wofi pa pankhuro la ŵaheni.

²⁶Pakuti FUMU ndiyo yiŵenge chigomezgo chako, yivikirire malundi ghako, kuti ghareke kukoreka mu chipingo.

²⁷Ungarekanga chara kumuchitira uweme uyo ngwakwenerera, para uli na nkhongono zakuchitira ntheura.

²⁸Ureke kuyowoya ku munyako kuti, “Rutanga, ukawereso, nditi ndikupenge na machero,” apo iwe chinthu chira uli nacho.

²⁹Unganozgeranga kumuchitira chiheni munyako, mweneuyo mwakugomezgeka wakukhara pafupi na iwe.

³⁰Ungasuskananga na munthu kwambula chifukwa chara, para iyo wandakuchitire chinthu chiheni chilichose.

³¹Ungaŵanga na sanje na munthu wa vivulupi, ungatorerangako nanga njimoza ya nthowa zakhe.

³²Munthu muheni mbukazuzi kwa FUMU, kweni munthu murunji yikukondwera nayo.

³³FUMU yikutemba mbumba ya munthu muheni, kweni yikutumbika chikaya cha munthu murunji.

³⁴Awo ŵakuyichonjora, iyo yikuŵachonjora. Kweni awo ŵakujiyuyura, iyo yikuŵalengera lusungu.

³⁵Ŵanthu ŵamahara ŵati ŵahare uchindami, kweni vindere viti vikhozgeke soni.