Read new_tumbuka_bible Zintharika 30 Bible Online

Zintharika 30 - new_tumbuka_bible bible

Zintharika 30

¹Agha ndi mazgu gha uchimi wa Aguru, mwana wa Yake. Ine vyalema, mwe Chiuta, ine vyalema, mwe Chiuta! Ine ndavuka.

²“Nadi, ndili wakupusa kuruska ŵanthu wose. Mahara gha unthu ndilije.

³Ine ndilive kusambirapo mahara nesi kumumanya Mutuŵa Yura.

⁴Kasi ndi njani uyo wali kurutapo kuchanya na kukhiraso? Kasi ndi njani uyo wali kuwunjikapo mphepo mu woko lakhe? Kasi ndi njani uyo wali kuvungapo maji mu malaya ghakhe? Kasi ndi njani uyo wali kukhozga mphererekezgo zose za charu? Kasi zina lakhe ndi njani, ndipo mwana wakhe zina ndi njani? Undiphalire usange ukumanya nadi.”

⁵“Mazgu ghali ghose gha Chiuta ghakuneneska. Chiuta ndiyo nguru yakuvikirira awo ŵakuchimbilira kwa iyo.

⁶Ungasazgirangako kanthu ku mazgu ghakhe chara, mzire wakuchenye ndipo usangike kuŵa mutesi.”

⁷FUMU, pali vinthu viŵiri ivyo nkhumurombani. Mungandikaniranga chara pambere ndindafwe.

⁸Sezgerani kutali nane upusikizgi na utesi. Mungandipanga ukavu chara nesi usambazi, kweni mundipe chakurya chakwenerera cha zuŵa na zuŵa.

⁹Nkhopa kuti para ndingaŵa na vinandi kwakuruska ndingamba kumukanani imwe, na kuyowoya kuti, “Kasi FUMU ndi njani?” Nkhopaso kuti para ndingaŵa mukavu, ndingamba kwiba, na kukhozga soni zina la Chiuta wane.

¹⁰Ungamupusikizgiranga muteŵeti kwa sekuru wakhe, mzire muteŵeti yura wakutembe, ndipo iwe uŵenge na mrandu.

¹¹Ŵalipo ŵanthu ŵanyakhe awo ŵakutemba ŵawiskewo ndipo kuti ŵakutumbika ŵanyinawo chara.

¹²Ŵalipo ŵanthu ŵanyakhe awo ŵakujipima kuti mbaweme, ndipouli kuti ŵali kutozgeka ku uheni wawo chara.

¹³Ŵalipo ŵanthu ŵanyakhe ŵeneawo mbakujikuzga, pakulaŵiska ŵanyawo, ŵanyawo ŵakuwoneka nga mbanthu chara na pachoko pose.

¹⁴Ŵalipo ŵanthu ŵanyakhe awo mba nkhaza ŵeneawo mino ghawo ghali nga lupanga panji chimayi, iwo ukhaliro wawo uli kwima pakumirimitizga ŵakavu pakuŵamara mu charu, ndipo na kuŵamirimitizga ŵasokwano kuti ŵareke kuwoneka mukati mu ŵabali ŵawo.

¹⁵Sundu yili na ŵana ŵanakazi ŵaŵiri ndipo wose ŵakuchemerezga ŵakuti, “Tipe, tipe.” Pali vinthu vitatu ivyo kuti vikukhuta chara, vinayi ivyo vilije kumanya kuyowoya kuti, “Takhuta!”

¹⁶Vinthu ivi ndi malo gha ŵakufwa, nthumbo ya chumba, nthaka yambula maji, na moto wakugolera. Chilichose chikuyowoya chara kuti, “Ndakhuta!”

¹⁷Munthu uyo wakunyoza ŵawiske, panji kuyuyura ŵanyina wamkufwira pa yekha, maso ghakhe ghamkukozomboleka na ŵachihoŵe ŵa mu dambo, ndipo wamkuryeka na makuŵi.

¹⁸Pali vinthu vitatu ivyo vikundizukumiska chomene, vinayi nkhureka na kuvipulikiska wuwo.

¹⁹Nthowa ya nombo mu mlengalenga, nthowa ya njoka pa jarawe, nthowa ya ngaraŵa pa nyanja zikuru, nthowa ya munyamata na msungwana.

²⁰Muwoli muleŵe wakuchita ntheura: Para waleŵa, wakugeza na kuyowoya kuti, “Palije uheni uwo ndachita.”

²¹Pali vinthu vitatu ivyo charu cha pasi chikundindima navyo ndipo pali vinthu vinayi ivyo charu cha pasi chikuzizipizga navyo chara:

²²para muzga wakuŵa karonga, para wakupusa wakuŵa na vyakurya vinandi,

²³para mwanakazi wambula kutemweka watengwa, para muteŵeti-kazi watora malo gha fumukazi yakhe.

²⁴Pali vilengiwa vinayi mu charu ivyo nvichoko, kweni vikuruska pa vinjeru.

²⁵Nyerere nthu vilengiwa uto tulije nkhongono, kweni zikusunga vyakurya vyawo pa nyengo ya chihanya.

²⁶Mbira nthu nyama uto tulije nkhongono kweni zili na nyumba zawo mu zimphanji.

²⁷Zombe walije karonga, ndipouli yose wakwenda mu viwuruviwuru.

²⁸Ungamanya kukora mtondoli mu mawoko ghako, kweni wakukhara mu nyumba za ufumu.

²⁹Pali vinthu vitatu ivyo vikunotheska para vikwenda ndipo pali vilengiwa vinayi ivyo vikukondweska pakwenda:

³⁰Nkharamu, iyo nja nkhongono kuruska nyama zose, ndipo yikopa nyama yiliyose chara.

³¹Tambala, uyo wakutonya pakwenda, pepe, ndiposo na karonga para wakwenda panthazi pa ŵasilikari ŵakhe.

³²“Usange wanguŵa chindere, ndipo wajitukumulanga, panji usange wanozgeranga kuchita uheni, jara mlomo wako.

³³Chifukwa kusunkhunya mkaka, kukupanga mafuta, kufyenya mphuno kukufumiska ndopa, ndipo kukwezga ukari, kukwambiska zawe.”