Read new_tumbuka_bible Zintharika 31 Bible Online

Zintharika 31 - new_tumbuka_bible bible

Zintharika 31

¹Agha ndi mazgu gha uchimi kwa Karonga Lemuwele, gheneagho nyina wakamusambizga:

²Nkhanthu uli, mwana wane? Nkhanthu uli, mwana wa mu nthumbo yane? Nkhanthu uli, mwana wane, uyo nkharomba pakuchita phangano?

³Ungasakaziranga nkhongono zako pa ŵanakazi chara, nesi mendero ghako pa awo ŵakumara ŵakaronga.

⁴Iwe Lemuwele, ŵakaronga ŵakwenera chara, inya kuti ŵakwenera chara kumwa vinyo. Ŵakuwusa nawo ŵakwenera chara kunwekera kumwa moŵa.

⁵Usange ŵangamwa wangaruwa marango, na kubendezga wanangwa wa ŵasokwano.

⁶Munthu uyo wali pafupi kufwa, umupenge moŵa, ndipo awo ŵali mu visuzgo vikuru, uŵapenge vinyo.

⁷Iwo ŵamwe mwakuti ŵaruweko ukavu wawo, na kureka kukumbukaso visuzgo vyawo.

⁸Ŵa mbuwu, uŵayowoyerenge ndiwe, ŵasokwano uŵavikirire wanangwa wawo.

⁹Uyowoyenge na kweruzga mu urunji, uvikirirenge wanangwa wa ŵakavu na ŵasokwano.

¹⁰Kasi ndi njani uyo wangasanga muwoli wa nkharo yiweme? Iyo ngwa kuzirwa kuruska vitowelo.

¹¹Mufumu wakhe wakumugomezga chomene, ndipo iyo kuti wasoŵenge kalikose chara.

¹²Muwoli uyu wakumuchitira iyo uweme pera, uheni chara, mazuŵa ghose gha umoyo wakhe.

¹³Iyo wakupenja uzi na thonje ndipo wakuchita mlimo na mawoko ghakhe na mtima wose.

¹⁴Muwoli uyu wali nga ndi ngaraŵa za ŵamalonda, wakuya katora vyakurya vyakhe kufuma kutali.

¹⁵Wakuwuka kuchali usiku, ndipo wakuŵanozgera chakurya ŵa mu nyumba yakhe, na kuŵagaŵira mlimo ŵateŵeti-kazi ŵakhe.

¹⁶Wakupenja munda na kuwugula. Wakulima munda wa mpheska na ndarama zakufumira mu nkhongono zakhe.

¹⁷Wakuchita milimo na nkhongono zakhe, ndipo mawoko ghakhe ghakuleghalegha chara.

¹⁸Iyo wakuwona kuti malonda ghakhe ghali na chandulo. Nyali yakhe kuti yikuzimwa chara na usiku.

¹⁹Mu mawoko ghakhe wakukorerera chakuzingiliramo uzi, khuni likuzingirira para wakupanga salu.

²⁰Ŵanthu awo mbakavu wakuŵalengera lusungu ndipo ŵasokwano nawo wakuŵapa vyawanangwa.

²¹Pa nyengo ya mphepo kuti wakwenjerwa na ŵa nyumba yakhe chara chifukwa wose ŵa mu nyumba yakhe ŵali na vyakuvwara viswesi.

²²Wakujirukira yekha salu zakudika ndipo vyakuvwara vyakhe vyose ndi vya bafuta muweme na zichesamu.

²³Mufumu wakhe ngwa kumanyikwa chomene nga ndi yumoza wa ŵarongozgi ŵa mu msumba, para wakukhara pamoza na ŵararaŵarara ŵa msumba weneuwo.

²⁴Muwoli uyu wakupanga malaya gha salu za bafuta na kuziguliska ndiposo wakupanga ŵalamba na kuguliska ku ŵamalonda.

²⁵Nkhongono na nchindi vili nga ndi chakuvwara chakhe, ndipo iyo wakopa chara pakughanaghana na nyengo ya kunthazi.

²⁶Wakuyowoya vya mahara pera, ndipo wakusambizga vya lusungu pera.

²⁷Iyo wakupwererera makora na umo ŵakukhalira ŵa mbumba yakhe. Iyo kuti ndi mukata chara.

²⁸Ŵana ŵakhe ŵakumurumba ndipo ŵakuti ngwa kutumbikika. Mufumu wakhe nayo wakumurumba pakuyowoya kuti:

²⁹“Ŵanakazi ŵanandi ŵakuchita makora nadi, kweni iwe ukuŵaruska wose.”

³⁰Kawonekero kaweme nkhakupusika ndipo kutowa nako nkhwa waka. Kweni mwanakazi uyo wakopa FUMU, ndiyo wakwenera kurumbika.

³¹Mupani mwanakazi uyu njombe ya mawoko ghakhe. Ivyo wachita mwanakazi uyu vimutorere nchindi panthazi pa ŵanthu.