Read new_tumbuka_bible Zintharika 4 Bible Online

Zintharika 4 - new_tumbuka_bible bible

Zintharika 4

¹Imwe mwa ŵana, pulikani visambizgo, ivyo ŵawiskemwe ŵakumusambizgani. Tegherezgani ku vyeneivyo, kuti mwandure umanyi.

²Ine nkhumupani vilayizgo viweme, mungavirekanga chara ivyo nkhumusambizgani.

³Apo ine nkhaŵa mwana mu nyumba ya ŵadada, apo nkhaŵa mwana muchoko, yekha na yekha wa amama,

⁴ŵadada ŵakandisambizga ndipo ŵakandiphalira kuti, “Ŵikapo mtima pa ivyo nkhukuphalira, sungilira marango ghane kuti uŵe na umoyo.

⁵Ungaruwanga nanga nkhupatukako ku mazgu ghane, pokerera mahara, pokerera umanyi.

⁶Ungarekanga mahara ndipo ghati ghakuvikirire, ughatemwe ndipo ghati ghakusungilire.

⁷Jando la mahara ndi ili: kupoka mahara ighoghene. Pa chilichose icho ukupoka, sanga umanyi.

⁸Mahara ughazirwiskenge chomene, ndipo ghati ghakukwezgenge. Ghati ghakupe nchindi para waghafukatira.

⁹Mahara ghati ghaŵike pa mutu wako nkhata yakutowa ya maluŵa, ndipo ghati ghakuvwarike mphumphu yakutowa.”

¹⁰Mwana wane, pulika, zomerezga mazgu ghane, mwakuti virimika vya umoyo wako viŵenge vinandi.

¹¹Ndakusambizga nthowa za mahara, ndakurongozga mu nthowa za urunji.

¹²Para ukwendamo, kuti ujandizgikenge chara. Para ukuchimbiramo, kuti ukhuŵarenge chara.

¹³Koreska visambizgo, ungavitayanga chara. Uvisungilire, pakuti vyeneivi ndi umoyo wako.

¹⁴Ureke kwendamo mu nthowa za ŵaheni, nanga nkhunjira mu nthowa za ŵakubendera.

¹⁵Uzilambalarenge, ungendangamo chara, upatukemo na kwenda mu nthowa yako na yako.

¹⁶Pakuti ŵaheni ŵakutondeka kugona tulo, mpaka ŵachite chinthu chiheni, tulo tukuŵamo mu maso chara, mpaka ŵawone kuti munyakhe wakhuŵarapo.

¹⁷Pakuti ŵakurya chakurya pakuchita uheni, ndipo ŵakumwa vinyo pakuchita vivulupi.

¹⁸Kweni nthowa ya ŵarunji yili nga ndi marazi gha matandakucha, agho ghakuŵaliraŵalira mpaka muhanya pakati.

¹⁹Kweni nthowa ya ŵaheni yili nga ndi chisi chikuru, ŵakuchimanya chara icho ŵakukhuŵarapo.

²⁰Mwana wane, tegherezga ku mazgu ghane, tegherezga khutu lako ku ivyo nkhuyowoya.

²¹Mazgu ghane ghangafumangapo panthazi pako, ughasungenge mu mtima wako.

²²Pakuti mazgu ghane ndi umoyo kwa uyo wakughasanga, ghakuchizga thupi lakhe lose.

²³Mtima wako uwuvikirirenge chomene, chifukwa mukati mwakhe muli mbwiwi za umoyo.

²⁴Ureke kuyowoya mazgu ghakubendera, mazgu ghakupuruska ghaŵe kutali na iwe.

²⁵Maso ghako ghalaŵiskenge kunthazi pera kwambula kuchita soni, udodoliskenge panthazi pera kwambula kucheukacheuka.

²⁶Upwerererenge nthowa umo malundi ghako ghakwenda, ntheura mendero ghako ghaŵenge ghakufikapo.

²⁷Ungapatukiranga ku maryero panji ku mazere chara, ungendanga mu nthowa ziheni chara.