Read new_tumbuka_bible Zintharika 5 Bible Online

Zintharika 5 - new_tumbuka_bible bible

Zintharika 5

¹Mwana wane, pulikizga ku mahara ghane, tegherezga khutu lako ku ivyo nkhuvimanya ine,

²mwakuti uŵenge na umanyi, ndipo mlomo wako uyowoyenge vya mahara.

³Pakuti pa mlomo wa mwanakazi muzaghali, pakufuma mazgu ghakunowa nga ndi uchi, ndipo mazgu ghakhe ngakunyiririka kuruska mafuta.

⁴Kweni ku umaliro, iyo ngwa kuŵaŵa nga ndi khuni la mulangali, ngwa kuthwa nga ndi lupanga lwa uyi kosekose.

⁵Malundi ghakhe ghakukhilira ku nyifwa. Mendero ghakhe ghakurondezga nthowa yakuruta ku malo gha ŵakufwa.

⁶Iyo wakulorako chara na nthowa ya ku umoyo. Nthowa zakhe nzakuzgombazgomba, kweni kuti wakumanya chara.

⁷Ntheura sono, mwa ŵana ŵane, mundipulike, ndipo mureke kupatukako ku mazgu agho nkhumuyowoyerani.

⁸Uŵenge kutali na mwanakazi muzaghali, ungizanga pafupi na muryango wa nyumba yakhe chara,

⁹mzire uyuyuke waka na ŵanthu ŵanyakhe, na kutaya virimika vyako ku ŵanthu ŵankhaza.

¹⁰Ŵalendo ŵizamkusamphanya usambazi wako, ndipo chandulo cha mlimo wako, chizamkutorekera ku nyumba ya mulendo.

¹¹Ndipo pa umaliro wa umoyo wako uti utamphe, para thupi lako lamalirathu.

¹²Penepapo wizamkuti, “Mbaya mwe, kasi nkhatinkhirangachi visambizgo, mtima wane ukayuyurirangachi kuchenyeka?

¹³Ine nkhakananga kupulikira mazgu, gha awo ŵakandisambizganga, nanga nkhutegherezga makutu ghane, ku awo ŵakandirongozganga.

¹⁴Ine nkhaŵa pafupi na kumalirathu, panthazi pa wumba wa ŵanthu.”

¹⁵Umwenge maji kufuma mu chisimi chako na chako, maji ghakwenda kufumira mu mbwiwi yako na yako.

¹⁶Kasi mbwiwi zako zifurukire bwekabweka, kuŵa tumironga twa maji mu msewu?

¹⁷Mbwiwi zeneizo ziŵe za iwe wekha, zingaŵanga za ŵalendo ŵa pa dera chara.

¹⁸Chiziŵa chako chiŵe chakutumbikika, ndipo ukondwenge na muwoli wa uwukirano wako.

¹⁹Iyo waŵenge wakutemweka nga ndi mphoyo, wakuwoneka makora nga ndi nyiska. Maŵere ghakhe ghakukondweske mazuŵa ghose, ndipo ukopeke na chitemwa chakhe nyengo zose.

²⁰Mwana wane, ukukopekerachi na mwanakazi muzaghali, ndipo ukuvumbatilirachi maŵere gha mwanakazi wakwendendeka?

²¹Pakuti FUMU yikuwona mendero gha munthu, yikulaŵisiska makora nthowa zakhe zose.

²²Milimo yiheni ya munthu wakwananga nchipingo kwa iyomwene. Milimo ya kwananga kwakhe, yikumukora nganganga.

²³Iyo wakufwa pakuti wakureka kujikora, wakutayika chifukwa cha kupusa kwakhe ukuru.