Read new_tumbuka_bible Zintharika 6 Bible Online

Zintharika 6 - new_tumbuka_bible bible

Zintharika 6

¹Mwana wane, kasi ndiwe chikhole kwa muzengezgani wako, kasi waŵa chakulipira kwa mulendo?

²Kasi wajithya na mazgu gha mlomo wako, panji wawira mu mazgu agho wayowoya?

³Sono, mwana wane, pakuti wajiŵika mu mawoko gha muzengezgani wako uchite ichi kuti ujithaske. Urute luŵiro kwa muzengezgani wako na kumuŵeyerera kuti wakusutule.

⁴Ungagonanga tulo chara nanga nkhusiwa.

⁵Ujithaske, nga ndi umo mbaŵara yikujithaskira kwa chiŵinda, nga ndi umo kayuni kakufwanthamukira ku woko la muthyezi.

⁶Iwe munthu mukata, ruta ku nyerere. Ukalaŵisiske machitiro ghakhe, na kusambirako kanthu.

⁷Yilije murongozgi, nanga ndi mulaŵiliri panji wakuwusa.

⁸Ndipouli yikunozgera vyakurya vyakhe mu nyengo ya chihanya. Yikuronga vyakurya vyakhe mu nyengo ya vuna.

⁹Iwe munthu mukata, kasi ugonenge pasi mpaka pauli? Kasi uwukenge pauli mu tulo twako?

¹⁰Iwe ukuti, “Ndigonepo pachoko waka, ndisiwepo pachoko waka. Ndizingepo mawoko pachoko waka, kuti ndipumulepo.”

¹¹Penepapo ukavu ukwizirenge nga ndi munkhungu, usauchi nawo uti ukurotokere nga nchigeŵenga.

¹²Munthu wawakawaka, munthu muheni, wakuyingayinga waka na kuyowoya mazgu ghakubendera.

¹³Iyo wakusinizga na maso ghakhe na kuskesketa malundi ghakhe ndipo wakuchewuzga na munwe wakhe.

¹⁴Wakunozgera kuchita uheni na mtima wakhe wa nkhaza, na kuŵika mphatukano mu ŵanthu nyengo zose.

¹⁵Ntheura mwa mabuchibuchi soka limwizirenge, mu kanyengo kachoko waka wamarenge petu, kwambula kupona.

¹⁶Pali vinthu vinkhonde na chimoza ivyo FUMU yikutinkha, ndipo vinkhonde na viŵiri ivyo mbukazuzi kwa FUMU:

¹⁷maso ghakujikuzga, lulimi lwa utesi, mawoko agho ghakuthiska ndopa zambula kafukwa,

¹⁸mtima uwo ukwata maghanoghano ghaheni, malundi agho ghakuchimbilira kuya kachita uheni,

¹⁹kaboni wa kupusika uyo wakuyowoya utesi pera, na munthu uyo wakwambiska mphatukano mukati mu ŵabali.

²⁰Mwana wane, pulika marango gha ŵawuso, ungarekanga chara visambizgo vya ŵanyoko.

²¹Ivi uvibatike mu mtima wako nyengo zose, uvikakilire mu singo yako.

²²Para ukwenda, viti vikurongozge. Para ukugona pasi, viti vikuvikirire. Para ukuwuka, viti viyowoye nawe.

²³Pakuti marango agha ndi nyali, visambizgo ivi ndi ungweru. Kuchenya uko nkhwa kulanga ndi nthowa yenecho ya umoyo.

²⁴Visambizgo ivi viti vikusungilire ku mwanakazi muheni. Viti vikuthaske ku mayowoyero ghakumyamyatika gha mwanakazi muleŵe.

²⁵Ungadokeranga kutowa kwakhe chara, panji nesi kukopeka na kalaŵiskiro ka maso ghakhe.

²⁶Pakuti hule lingapusikika na ndarama zakugula chakurya pera, kweni mwanakazi muleŵe wakutengwa wakupoka nanga ndi umoyo wako wuwo.

²⁷Kasi munthu wangakumbatira moto pa chifuŵa chakhe kwambula kuti malaya ghakhe ghaphye.

²⁸Panji kasi munthu wangenda pa makara gha moto kwambula kuti malundi ghakhe ghaphye?

²⁹Ntheura ndimo kukuŵira uyo wakunjira mu muwoli wa muzengezgani wakhe. Yose uyo wakumukhwaska wati walangikenge.

³⁰Ŵankhungu kuti ŵakuyuyurika chara, para ŵiba chifukwa cha njara?

³¹Ndipouli para wakoreka wati walipirepo kankhonde na kaŵiri. Iyo wati wapereke katundu yose wa mu nyumba yakhe.

³²Kweni munthu uyo wakuleŵa nchindere, uyo wakuchita ichi, wakujikoma.

³³Vikomokomo na kuyuyurika ndivyo viti vimuwire ndipo kulengeskeka kwakhe kuti kumarenge chara.

³⁴Pakuti sanje yikukwiyiska mwanarume, ndipo wati wamugowokerenge chara pakuwezgera nduzga.

³⁵Wati wazomere malipo ghali ghose chara, nanga nkhukhorweskeka na vyawanangwa vinandi.