Read new_tumbuka_bible Zintharika 7 Bible Online

Zintharika 7 - new_tumbuka_bible bible

Zintharika 7

¹Mwana wane sungilira mazgu ghane, marango ghane ghaŵe usambazi wako.

²Usungenge marango ghane kuti uŵe na umoyo. Visambizgo vyane uvipwererere nga ndi umo ukuchitira na mboni ya jiso lako.

³Visambizgo ivi uvikake pa munwe wako, uvilembe mu mtima wako.

⁴Mahara ughayowoyere kuti, “Iwe ndiwe mudumbu wane.” Umanyi uwuyowoyere kuti, “Iwe ndiwe mubwezi wane mwenemwene.”

⁵Vyeneivi viti vikuvikirire ku mwanakazi muzaghali, ku mwanakazi wakwendendeka, uyo wakuyowoya mazgu ghakumyamyatika.

⁶Zuŵa limoza pa chidangazi cha nyumba yane, nkhalingizga kuwaro pa chidangazi.

⁷Nkhalaŵiska mukati mu ŵanthu waka, nkhawona mukati mu ŵawukirano, muwukirano yumoza wambula mahara.

⁸Iyo wakendanga mu msewu, kurazga ku nyumba ya mwanakazi yura.

⁹Kukati waka zgerere, nyengo ya na mise, nyengo ya usiku pakati na ya mdima.

¹⁰Penepapo mwanakazi wakafuma na kukumana nayo, wakavwara nga ndi hule, wa mtima uryarya.

¹¹Wakaŵa wa pa mlomo na muryarya, wakwendendeka, wambula kukhara pa nyumba.

¹²Nyengo zinyakhe wakusangika pa msewu, panji pa msika, wakukhazga munthu pa chingodya chilichose.

¹³Penepapo wakumukora munyamata yura na kumufyofyontha, wakuyowoya nayo kwambula na soni wakuti,

¹⁴“Nkhenera kupereka sembe za wenenawene, ndipo muhanya uno ndafiska mapangano ghane, mwakuti ndili na nyama yinandi.

¹⁵Ntheura sono ndafuma kuti ndikumane nawe, nkhakupenjanga chomene, sono ndakusanga.

¹⁶Pa chitara chane ndatandikapo mabulangete ghaweme, pali salu za bafuta za kuroŵekaroŵeka za ku Eguputo.

¹⁷Ndaphakazgapo mafuta ghakununkhira gha mure, na gha chinthembwe na gha kinamoni.

¹⁸Zanga tiŵe pamoza mu chitemwa mpaka na mulenje, tikondweskane na chitemwa.

¹⁹Mufumu wane wali mu nyumba chara, wafumapo, waruta pa ulendo utali.

²⁰Watora thumba la ndarama, wawerengeko para mwezi ngwamsuma.”

²¹Wakamukopa munyamata yura na mazgu ghakumyamyatika, wakamukoserezga na mazgu ghakhe ghakunyengelera.

²²Maluŵiro, mwakupusa, wakamurondezga mwanakazi yura nga ndi ng'ombe iyo yikunozgekera kuya kakomeka, panji nga ndi mbaŵara iyo yawira mu chipingo,

²³mpaka muvwi ulase matumbo ghakhe. Iyo wali nga nchiyuni icho chikuchimbilira ku chipingo, kwambula kumanya kuti chimutolerenge ku nyifwa.

²⁴Ntheura sono, mwa ŵana mwe, pulikani kwa ine. Mutegherezge ku ivyo nkhuyowoya.

²⁵Mtima wako ungapurukirangako ku nthowa zakhe chara, ureke kupatukirako ku nthowa za mwanakazi wa ntheura.

²⁶Pakuti mwanakazi uyu wali kuwiska ŵanarume ŵanandi. Inya nadi, wali kukomeska ŵanthu ŵanandinandi.

²⁷Nyumba yakhe ndi nthowa yakuyira ku nyifwa, yakukhilira ku malo gha ŵakufwa.