Read new_tumbuka_bible Zintharika 8 Bible Online

Zintharika 8 - new_tumbuka_bible bible

Zintharika 8

¹Asi mahara ghakuchemerezga? Asi umanyi ukutumphuska mazgu ghakhe?

²Mahara ghakukhara pa malo ghakukwera mu mphepete mwa nthowa, ghakuya kayimilira mu mphatukano za misewu.

³Ghakuchemerezga pafupi na vipata panthazi pa msumba ndiposo ghakuyowoya pa miryango yakunjirira, kuti,

⁴“Imwe mwa ŵanthu, nkhumuchemani, nkhuchemerezga kwa munthu waliyose.

⁵Imwe mwa ŵanthu waka, sambirani mahara. Imwe mwa vindere, kharani maso.

⁶Tegherezgani, pakuti ndiyowoyenge vinthu vyakuzirwa, ndiyowoyenge ivyo nviweme pera.

⁷Pakuti mlomo wane uyowoyenge unenesko pera, kuyowoya viheni mbukazuzi ku milomo yane.

⁸Mazgu ghose gha pa mlomo wane ngakunyoroka, Mu mazgu ghane mulije vyakubendera panji vya uryarya.

⁹Mazgu ghane ngakunyoroka kwa awo ŵali na mahara, ngambula kafukwa ku awo ŵali na umanyi.

¹⁰Sankhani urongozgi wane kuruska siliva. Sankhani umanyi wane kuruska golide.”

¹¹“Pakuti mahara ngaweme kuruska vitowelo. Vyose ivyo ungavidoka kuti vingayana na mahara chara.

¹²Ine mahara, ndili wakuchenjera, ndipo ndili na umanyi na kaghanaghaniro kaweme.

¹³Kopa FUMU ndiko kutinkha na uheni. Ine nkhutinkha vinthu ivi: kujikuzga, kujitemwa, nthowa ziheni, na kuyowoya utesi.

¹⁴Ine ndili na urongozgi na weruzgi wakunyoroka. Ndili na umanyi na nkhongono.

¹⁵Chifukwa cha ine, ŵakaronga ŵakuwusa, ŵeruzgi nawo ŵakwimika marango ghakunyoroka.

¹⁶Chifukwa cha ine, mafumu ghakuwusa, ŵarongozgi nawo ŵakuwusa vyaru.

¹⁷Nkhutemwa awo wakunditemwa, ndipo awo ŵakundipenja na mtima wose ŵakundisanga.

¹⁸Ine ndili na usambazi na nchindi ndiposo na vyuma vyambula na mauweme ghanandi.

¹⁹Vipambi vyakufuma kwa ine nviweme kuruska golide, inya, kuruska golide lakwengeka makora. Ivyo nkhupambika nviweme kuruska siliva lakwengeka makora.

²⁰Ine nkhwenda mu nthowa ya urunji, nkhwenda mu nthowa zakunyoroka.

²¹Nkhupereka usambazi ku awo ŵakunditemwa ndipo nkhuzuzga usambazi mu vyakusungiramo vyawo.”

²²“FUMU yikandilenga ine pa kwambilira pa mlimo wakhe. Ndili wakudanga wa milimo yakhe ya kale.

²³Kufuma papo kale nkhimikika pakudanga, pambere charu cha pasi chindalengeke.

²⁴Ine nkhababika kale pambere ndimba zindaŵeko, pambere mbwiwi za maji ghakubwibwituka zindaŵeko.

²⁵Ine nkhababika pambere mapiri ghandalengeke, pambere tumapiri tundaŵeko,

²⁶pambere charu cha pasi na minda yakhe vindalengeke, pambere dongo lakwamba la pa charu cha pasi lindaŵeko.

²⁷Ine nkhaŵapo para FUMU yikakhazikiskanga mlengalenga, para yikaŵikanga mphaka pachanya pa ndimba,

²⁸para yikaŵikanga maŵingu mu mlengalenga, para yikajulanga mbwiwi za mu ndimba,

²⁹para yikaŵikanga mphaka za nyanja, mwakuti maji ghakhe ghareke kujumpha, para yikaŵikanga malufura gha charu.

³⁰Pa nyengo yira, ine nkhaŵa pafupi na iyo nga ndi nkhwantha yakhe. Nkhayikondweskanga zuŵa lirilose, nkhasekereranga panthazi pakhe nyengo zose.

³¹Nkhasekereranga mu charu chakhe, na kukondwera mu ŵana ŵa ŵanthu.”

³²“Ntheura sono, mwa ŵana ŵane tegherezgani kwa ine. Mbakutumbikika ŵanthu awo ŵakusunga marango ghane.

³³Pulikirani visambizgo vyane kuti muŵe wa mahara, mureke kuvitaya ivyo chara.

³⁴Ngwakutumbikika munthu uyo wakutegherezga kwa ine, mweneuyo zuŵa na zuŵa wakundilindizga pa chipata chane, kundilindirira pa muryango wane.

³⁵Pakuti uyo wakusanga ine wakusanga umoyo, ndipo wakupokera uchizi wa FUMU.

³⁶Kweni uyo wakutondeka kundisanga ine wakujipweteka yekha. Wose awo ŵakunditinkha ine ŵakutemwa nyifwa.”