Read new_tumbuka_bible Zintharika 9 Bible Online

Zintharika 9 - new_tumbuka_bible bible

Zintharika 9

¹Mahara ghali kuzenga nyumba yakhe, ghali kwimika mizati yinkhonde na yiŵiri.

²Ghakoma na kuphika nyama yiweme na kupanga vinyo liweme, ndipo ghanozga gome la chiphikiro chakhe.

³Ghatuma ŵateŵeti-kazi ŵakhe kuya kachemerezga pa malo ghakukwera chomene gha mu msumba kuti,

⁴“Yose uyo ndi munthu waka wize kuno.” Kwa uyo ngwambula mahara, mahara ghakuti,

⁵“Zanga urye vyakurya vyane, na kumwa vinyo ilo ndanozga makora.

⁶Reka uchindere kuti uŵe na umoyo, wendenge mu nthowa ya umanyi.”

⁷Uyo wakuchenya munthu wakunyoza, wakutukikirapo waka. Uyo wakususka munthu muheni, wakupwetekekerapo waka.

⁸Ungachenyanga munthu wakunyoza chara, mzire wakutinkhe. Kweni uchenyenge wa mahara, ndipo iyo wati wakutemwe.

⁹Umurongozge munthu wa mahara, ndipo wati waŵenge wa mahara chomene. Sambizga munthu murunji, ndipo wati waŵenge na umanyi unandi.

¹⁰Kopa FUMU ndi jando la mahara, ndipo kumanya Mutuŵa Yura, ndiko kumanyiska nadi.

¹¹Chifukwa cha ine, mazuŵa ghako ghaŵenge ghanandi, ndipo usazgirengeko virimika pa umoyo wako.

¹²Usange uli wa mahara, mahara ghako ghati ghakwandulirenge. Usange uli wakunyoza ŵanyako, iwe wekha ndiwe uti usuzgikenge.

¹³Uchindere ukulingana waka na mwanakazi wa pa mlomo, wakupusa na wambula kumanya kalikose.

¹⁴Wakukhara pa muryango wa nyumba yakhe, na pa malo gha pachanya mu vikaya.

¹⁵Iyo wakuchema ŵanthu awo ŵakujumphapo waka, awo ŵakujiyendera waka mu nthowa kuruta uko ŵapukwa.

¹⁶Mwanakazi yura wakuti, “Yose uyo ndi munthu waka, wapatukire kuno.” Kwa uyo ngwambula mahara, iyo wakuti,

¹⁷“Maji ghakwiba ndigho ghakunowa, chakurya cha kuryera mu udesi ndicho chikunowa.”

¹⁸Kweni iyo wakumanya chara kuti, kwenekura ŵanthu ŵakufwirako, ŵalendo ŵakhe ŵali ku malo gha ŵakufwa.