Read new_tumbuka_bible Mupharazgi 1 Bible Online

Mupharazgi 1 - new_tumbuka_bible bible

Mupharazgi 1

¹Agha ndi mazgu gha Mupharazgi, uyo wakaŵa karonga wa mu Yerusalemu, mwana wa Davide.

²Mupharazgi wakuti, vyose nvya wakawaka. Inya nvya wakawaka vyose, nvya wakawaka nkhanira.

³Kasi munthu chikumwandulirachi kugwira milimo yose yakuvuska, iyo wakutokatoka nayo pa charu?

⁴Muwiro unyakhe ukumara, unyakhe ukwiza, kweni charu chikukhalirira muyirayira.

⁵Dazi likufuma, dazi likunjira, likuwereraso luŵiro uko likufumira.

⁶Mphepo yikuputira ku mwera, yikuzgokera ku mpoto. Yikuputa mwakuzingilirazingirira, yikuwereraso uko yikafumira.

⁷Mironga yose yikuthira mu nyanja, kweni nyanja kuti yikuzura chara. Ku malo uko maji ghakafumira, kwenekuko ndiko ghakuwereraso.

⁸Vinthu vyose vikuvuska, kuvuska kwambula mayowoyeko. Maso ghakukhuta chara na kulaŵiska, makutu nagho ghakukhuta chara na kupulika.

⁹Ivyo vikaŵako kale, ndivyo vyamkuŵakoso. Ivyo vili kuchitikapo kale, ndivyo vyamkuchitikaso. Palije chinthu chiphya pa charu.

¹⁰Kasi chilipo icho tingayowoya kuti, “Wonani, ichi nchiphya?” Chara! Kale napo chikaŵako, apo ise tikaŵa tindaŵeko.

¹¹Ŵanthu ŵa kale kuti ŵakukumbukika chara nanga ndi awo ŵachali kwiza kunthazi kuti ŵizamkumbukika chara na awo ŵizenge pamanyuma.

¹²Ine, Mupharazgi, nkhaŵa karonga wa Israele mu Yerusalemu.

¹³Nkhaŵikapo mtima kupenjisiska na kusanda na vinjeru vyane vyose ivyo vikuchitika pano pa charu. Uwu ndi mlimo wakugongoweska weneuwo Chiuta wali kuŵapa ŵanthu kuti ŵatangwanikenge nawo.

¹⁴Ndawona vyose ivyo vikuchitika pa charu cha pasi. Vyose nvya wakawaka ndipo ndi kusuzgikirapo waka.

¹⁵Icho nchakubendera kuti chinganyororeka chara, icho palije kuti chingapendekerako chara.

¹⁶Nkhayowoya mu mtima wane nkhati, “Ndatora vinjeru vinandi kuruska wose awo ŵakawusanga mu Yerusalemu kale. Mtima wane waŵa na umanyi ukuru chomene wa mahara na vinjeru.”

¹⁷Nkhaŵikapo mtima kuti ndisande vinjeru, na kuti ndimanye uzereza na uchindere. Kweni nkhapanikizga kuti uku nakoso ndi kusuzgikirapo waka.

¹⁸Para vinjeru nvinandi, vyakukweŵeska navyo nvinandi. Para munthu wakusazgirapo mahara, wakusazgiraposo vitima.