Read new_tumbuka_bible Mupharazgi 10 Bible Online

Mupharazgi 10 - new_tumbuka_bible bible

Mupharazgi 10

¹Membe zakufwa zikuŵika sungu liheni mu mafuta gha sungu liweme. Ntheura uchindere uchoko waka ukumanya kwanangiska vinjeru na nchindi.

²Mtima wa munthu wa vinjeru ukumurongozgera ku uweme kweni mtima wa chindere ukumupuruska.

³Chindere para chikwenda mu nthowa chikuŵavye mahara ndipo chikujirongora pakweru kuti nchindere.

⁴Usange uyo wakuwusa wakukaripira ungachimbiranga chara, chifukwa kukhara chete kukuzimya ukari wa ŵakuwusa.

⁵Kuli uheni unyakhe uwo ndauwona pa charu, weneuwo uli nga ndi mphuvya izo zikuchitika na awo ŵakuwusa.

⁶Vindere vikupika nchito za pachanya, ndipo ŵasambazi ŵakupika nchito za pasi.

⁷Ndawona ŵazga ŵakwera pa mahachi, kweni nduna ndizo zikwenda pasi nga mbazga.

⁸Uyo wakujima mbuna wati waŵengemo yekha. Uyo wakudorora chiliŵa njoka yiti yimurume.

⁹Uyo wakugadabula mawe, wati wadinike nagho. Uyo wakuŵandura nkhuni wangamanya kupwetekeka nazo.

¹⁰Usange mbavi njakubumpha, ndipo kuti ŵakunorako chara, iyo wakwenera kutema na nkhongono chomene. Kweni vinjeru vikovwira munthu kuchita makora.

¹¹Palije na chandulo kumanya kuseŵereska njoka para njoka yira yakuluma kale.

¹²Mazgu gha munthu wa vinjeru ghakumupa uchizi, kweni chindere chikukomeka na mlomo wakhe.

¹³Mazgu agho wakwamba kuyowoya ghakuŵa gha uchindere, ndipo mazgu ghakhe gha umaliro ghakurongora kufuntha kuheni.

¹⁴Chindere chikwandaniska mazgu. Kulije munthu uyo wakumanya icho chamkuŵako kunthazi. Kasi ndi njani wangamuphalira munthu icho chamkuŵako para iyo wafwa?

¹⁵Chindere chikujivuska pakuchita nchito, mwakuti chikuyimanya chara nthowa yakuya ku msumba.

¹⁶Ndiwe wa soka, iwe charu, apo karonga wako wachali mwana, ndipo nduna zako zikuŵa na viphikiro na mulenje.

¹⁷Ndiwe wa mwaŵi, iwe charu, para karonga wako ndi mwana wa ŵanthu awo mbanangwa, ndipo nduna zako zikuchita viphikiro pa nyengo yakwenerera, kuti ziŵe za nkhongono, kweni kuti ziroŵere chara.

¹⁸Mtenje ukubwanthuka usange mwenecho wakureka kupwererera nyumba, ndipo nyumba yikusurura usange mwenecho ndi mukata.

¹⁹Chakurya chikunozgeka kuti ŵanthu ŵakondwere, ndipo vinyo likusanguruska umoyo. Kweni vyose ivi, kuti vichitike vikukhumba ndarama.

²⁰Ungatukanga karonga wako chara, inya, nanga ndi mu maghanoghano ghako. Nanga ungaŵa mu chipinda chako cha kugonamo, ureke kuŵatuka ŵasambazi. Nyengo zinyakhe kayuni ka mudera kangayegha mazgu ghako, panji kamoyo kanji ako kakuwuruka mudera kangaya kaphara makani ku awo ukuŵanena.