Read new_tumbuka_bible Mupharazgi 12 Bible Online

Mupharazgi 12 - new_tumbuka_bible bible

Mupharazgi 12

¹Ukumbukenge Mlengi wako mu nyengo ya uwukirano wako, pambere mazuŵa ghaheni ghandafikepo, apo virimika vindaneng'enere, apo wamkuyowoya kuti, “Nkhukondwera navyo chara.”

²Inya pambere dazi na ungweru, mwezi na nyenyezi vindazgoke chisi na apo maŵingo ghamkwizaso para vura yawa.

³Pa nyengo yira ŵalinda ŵa nyumba ŵamkumbwambwantha, ndipo ŵanthu ŵankhongono ŵakotama, ndipo awo ŵakugaya vyakurya ŵareka chifukwa mbachoko, ndipo awo ŵakulingizga mu vidangazi kuti ŵamkulingizgamoso chara.

⁴Para miryango iyo yikurazga ku ŵagurwe ŵa mu misumba yajarika, para kulira kwa chigayo kwakhirako ndipo munthu wakuwuka chifukwa cha kulira kwa kayuni, ndipo kwimba kwa ŵanthu kukupulikikwa chara.

⁵Pa nyengo iyo kukwera phiri kwamkuŵa kunonono ndipo kwenda nako chamkuŵa chinthu chakutenthemeska, apo sisi ndituŵa nga ndi maluŵa gha khuni la alimondi, apo munthu wakwenda nga ndi phanana uyo wakujiguza waka ndipo makhumbiro ghamara. Chifukwa munthu wakuya ku chikaya chakhe cha muyirayira, ndipo awo wakutengera ŵakuyingisuka waka mu ŵagurwe ŵa mu msumba.

⁶Pambere chingwe cha siliva chindadumuke, panji pambere bakule wa golide wandasweke, panji pambere chiŵiya chindaswekere pa chisimi, panji pambere mukombero wakutorera maji mu chisimi undaphyoke.

⁷Fuvu liwererenge ku dongo nga ndi umo likaŵira, ndipo mzimu nawo uwererenge kwa Chiuta, mweneuyo wakawupereka.

⁸Ndicho chifukwa Mupharazgi wakuti, “Nvya waka nkhanira. Inya vyose nvya wakawaka.”

⁹Pa dera pakuŵa na vinjeru, Mupharazgi yura wakasambizga ŵanthu mahara. Iyo wakapimanga na kusanda ndiposo na kuŵika ntharika mu ndondomeko yiweme na lwana lukuru.

¹⁰Mupharazgi yura wakapenja mazgu gha kukondweska ndipo na mtima uweme wakalemba mazgu gha unenesko.

¹¹Mazgu gha ŵanthu ŵa vinjeru ghali nga ndi malunkhanjo, ndipo ntharika izo zawunjikika zili nga ndi mizumali iyo yanjira chomene. Ntharika izi wakupereka ndi Mliska yumoza pera.

¹²Wa mwana wane uchenjere na chilichose chakujumpha ivi. Nchito yakulemba mabuku ghanandi kuti yikugota chara, ndipo kusambira chomene kukuvuska thupi.

¹³Tiyeni sono tipulike umaliro wa makani ghose, “Umope Chiuta, ndipo usungilire marango ghakhe, pakuti uwu ndiwo mlimo uwo munthu wakwenera kuchita.

¹⁴Pakuti Chiuta wakweruzga mlimo wose wa munthu, na kose ako nkha mu ubende, manyi nguweme panji nguheni.”