Read new_tumbuka_bible Mupharazgi 2 Bible Online

Mupharazgi 2 - new_tumbuka_bible bible

Mupharazgi 2

¹Nkhaghanaghana mu mtima wane, nkhati, “Sono ndirute nkhayezge vya kukondweska na kujisanguruska.”

²Za kuseka nkhati, “Uku nkhufuntha.” Ndipo za kukondwera nkhati, “Chili na chandulo uli?”

³Nkhapenjerera na mtima wane umo ndingajikodweskera na vinyo ndiposo na kuskepererana na uchindere, apo mtima wane ukandirongozganga na mahara. Nkhakhumba kuwona icho chikuŵakondweska ŵanthu na icho ŵanthu ŵakuchita pano pa charu, mu mazuŵa ghachoko waka gha umoyo wawo.

⁴Nkhachita milimo yikuru. Nkhajizengera zinyumba na kulima minda ya mpheska.

⁵Nkhajilimira madimba na minda, mwenemumo nkhapandamo makuni gha vipambi vya mitundu yose.

⁶Nkhajima viziŵa vya maji kuti ndithilirenge thengere la makuni agho ghakameranga.

⁷Nkhagula ŵazga ŵanarume na ŵanakazi ndiposo nkhaŵa na ŵazga ŵeneawo ŵakababiwira mu nyumba yane. Nkhaŵaso na ng'ombe ndiposo na mberere na mbuzi zinandi chomene, kwakuruska wose awo ŵakakharanga mu Yerusalemu pambere ndindaŵeko.

⁸Nkhajiwunjikira siliva na golide ndiposo na usambazi wa ŵakaronga na wa kufuma mu vigaŵa vya charu. Nkhaŵa na ŵanthu ŵakundiyimbira sumu, ŵanarume na ŵanakazi. Nkhaŵaso na ŵawoli ŵachoko ŵanandi, ŵara ŵakukondweska mitima ya ŵanarume, ŵeneawo nkhakhumbanga.

⁹Ntheura nkhaŵa wa lumbiri kwakuruska wose awo ŵakaŵa mu Yerusalemu pakudanga, ndiposo nkharutilira kuŵa na vinjeru vyane.

¹⁰Chose icho maso ghane ghakachikhumba kuti nkhachikana chara. Mtima wane kuti nkhawukanizga chara ku vya kukondweska, pakuti mtima wane ukakondweranga pakutokatoka na milimo yane yose, ndipo iyi ndiyo yikaŵa njombe ya kutokatoka kwane kose.

¹¹Pamanyuma nkhaghanaghana chomene na milimo yose iyo nkhachitanga na umo nkhatokatokera nayo kuti ndiyifiske, ndipo nkhawona kuti vyose vikaŵa vya wakawaka ndipo ndi kusuzgikirapo waka. Pa charu cha pasi pakaŵavye icho chingamupa munthu chandulo.

¹²Penepapo nkhayezgaso kughanaghana kuti kasi vinjeru ndi vichi, uzereza ndi vichi, ndipo kuti uchindere ndi vichi? Kasi munthu uyo waharenge malo gha karonga sono wangachita chivichi chiphya kwakuruska wakudanga yura? Nadi, wachitenge ivyo munyakhe wali kuchitapo kale.

¹³Nkhawona kuti vinjeru vikuruska uchindere nga ndi umo ungweru ukuruskira chisi.

¹⁴Munthu wa vinjeru wakulaŵiska uko wakuruta, kweni chindere chikwenda mu chisi. Ndipouli nkhawona kuti pali chinthu chimoza icho chikuchitikira wose.

¹⁵Ndipo nkhaghanaghana mu mtima wane nkhati, “Icho chikuwira chindere ndicho chiti chindiwirenge na ine wuwo. Sono kasi ndandurapo vichi pakuŵa na vinjeru vinandi?” Penepapo nkhati mu mtima wane, “Ichi nacho nchawakawaka.”

¹⁶Pakuti munthu wa vinjeru pamoza na chindere wuwo, wose ŵakukumbukika kwa nyengo yitali chara, chifukwa mu mazuŵa ghakwiza wose ŵaŵiri ŵakuruwika. Umo wakufwira munthu wa vinjeru ndimo chikufwira chindere.

¹⁷Pa chifukwa ichi nkhatinkha umoyo, chifukwa chose icho chikuchitika pa charu cha pasi chikundipa suzgo. Pakuti vyose nvya wakawaka ndipo ndi kusuzgikirapo waka.

¹⁸Nkhayitinkha milimo yane yose yakuvuska iyo nkhachita pa charu cha pasi pakuwona kuti nkhwenera kumusidira milimo iyi munthu uyo wakwiza pamanyuma zane.

¹⁹Kasi ndi njani wakumanya kuti munthu yura waŵenge wa vinjeru panji chindere? Ndipouli munthu yura wati waŵenge mwenecho wa milimo yane yose yakuvuska iyo nkhachita pa charu cha pasi chifukwa cha vinjeru vyane vyose. Ichi nacho nchawakawaka.

²⁰Ntheura nkhamba kuwa nkhumbi chifukwa cha milimo yose iyo nkhachita mwakusuzgikira pa charu cha pasi.

²¹Pakuti nyengo zinyakhe munthu uyo wakuchita milimo ya kuvuska mu vinjeru, umanyi na mahara, wakwenera kusida vyose kuti munthu uyo wakawura kuvitokatokera ndiyo wakondwere navyo. Ichi nacho nchawakawaka ndipo nchiheni chomene.

²²Kasi munthu wakwandulapo vichi pa milimo yose yakuvuska na yinonono iyo wakuchita pa charu cha pasi?

²³Pakuti mazuŵa ghakhe ghose ghali kuzura na vyakuŵinya pera, ndipo milimo yakhe nja kusuzga pera. Nanga ndi mukati mu usiku mtima wakhe kuti ukupumula chara. Ichi nacho nchawakawaka.

²⁴Kulije kaweme kanyakhe ku munthu kwakuruska kuti warye na kumwa na kukondwera mu milimo yakhe. Ichi nachoso nkhachiwona kuti chikufumira kwa Chiuta.

²⁵Pakuti kwambula Chiuta, kasi ndi njani uyo wangarya, panji ndi njani uyo wangakondwera?

²⁶Pakuti Chiuta wakumupa vinjeru, umanyi na chimwemwe, munthu uyo wakumukondweska. Kweni kwa munthu wakwananga wakumupa mlimo wa kuwunganya na kuwunjika chuma, ndipo pa umaliro chuma icho wakuchipereka kwa munthu wa vinjeru uyo wakukondweska Chiuta. Ichi nacho nchawakawaka ndipo ndi kusuzgikirapo waka.