Read new_tumbuka_bible Mupharazgi 4 Bible Online

Mupharazgi 4 - new_tumbuka_bible bible

Mupharazgi 4

¹Ndipo nkhawona kuyuzga kose uko ŵanthu ŵakachitanga pa charu. Nkhawona masozi gha awo ŵakayuzgikanga. Iwo aŵa ŵakaŵavye na yumoza wakuŵasanguruska. Awo ŵakayuzganga ŵanyawo ŵakaŵa na mazaza ghakuwusira. Ntheura pakaŵavye na yumoza wakujipereka kuŵasanguruska.

²Nkhaghanaghana kuti awo ŵali kufwa kale mba mwaŵi kwakuruska awo ŵachali ŵamoyo.

³Kweni uyo wakuruska wose ŵaŵiri ndi uyo wandababike, ŵeneawo ŵandawone milimo yiheni iyo yikuchitika pa charu.

⁴Penepapo nkhawona kuti kutokatoka kose na kuŵa nkhwantha mu milimo, vikufumira mu sanje za munthu na muzengezgani wakhe. Ichi nacho nchawakawaka ndipo ndi kusuzgikirapo waka.

⁵Chindere chikupeteka waka mawoko ghakhe, ndipo chikusoŵa chakurya na kufwa na njara.

⁶Nkhuwemiko kuŵa na umoyo wa mutende wakuzura woko limoza kuruska umoyo wakuzura mawoko ghaŵiri wakutokatoka na mlimo wakuvuska na wakusuzgikirapo waka.

⁷Ndiposo nkhawona chinyakhe icho nchawakawaka pa charu.

⁸Pali munthu uyo wali yekha na yakhe, walije mwana nanga ndi mubali. Iyo wakutokatoka kwambula na kureka. Ndipouli kuti wakukhuta na usambazi wakhe chara, mwakuti wakureka na kujifumba kuti, “Kasi nkhutokatokera njani, apo nkhujinora na vyakukondweska wuwo?” Ichi nacho nchawakawaka na mlimo wambula kukondweska.

⁹Kuŵa ŵaŵiri nkhuweme kuruska kuŵa wekha, chifukwa mu kutokatoka kwawo ŵali na njombe yiweme.

¹⁰Chifukwa usange yumoza wa iwo wawa, munyakhe wati wamuwuske. Kweni soka kwa iyo wali yekha, pakuti para wawa walije munyakhe uyo wangamuwuska.

¹¹Ndiposo, usange ŵaŵiri ŵakugona pamoza ŵakuthukira. Kweni kasi munthu wangathukira uli para wali yekha?

¹²Nangauli munthu wangamanya kumutonda uyo wali yekha kweni para pali ŵaŵiri, iwo ŵangamanya kulimbana nayo. Chingwe chakuposeka na mikusa yitatu kuti chikudumuka luŵiro chara.

¹³Munyamata mukavu uyo ngwa vinjeru ndi muweme kuruska karonga muchekuru uyo nchindere, mweneuyo wakuzomera chara kuti warongozgeke.

¹⁴Munyamata uyu wangaŵa kuti wafuma waka mu gadi na kunjira ufumu panji kuti wakababika mukavu mu charu chakhe mwenemumo wakuwusamo.

¹⁵Ndipo nkhawona ŵamoyo wose awo ŵakukhara pa charu ndiposo na muwukirano mweneuyo wakatenge wahalire karonga.

¹⁶Pakaŵa ŵanthu ŵanandi chomene ŵeneawo iyo wakaŵa murongozgi wawo. Ndipouli awo ŵakaŵa panthazi na pamanyuma pakhe, pakaŵavye na yumoza uyo wakakondwera na muwukirano yura. Nadidi, ichi nacho nchawakawaka ndipo ndi kusuzgikirapo waka.