Read new_tumbuka_bible Mupharazgi 5 Bible Online

Mupharazgi 5 - new_tumbuka_bible bible

Mupharazgi 5

¹Upwerererenge mendero ghako nyengo yose para ukuruta ku Nyumba ya Chiuta. Kuŵa na phamphu kupulika nkhuweme kuruska kupereka sembe iyo vindere vikupereka pakuti vikumanya chara kuti vikuchita uheni.

²Ureke kuyowoya mu luŵiro kwambula kughanaghana, nanga ndi mtima wako nawo ureke kupusumpha kurapa panthazi pa Chiuta, chifukwa wali kuchanya, ndipo iwe uli pano pasi. Ntheura mazgu ghako ghaŵenge ghachoko.

³Vyakuchita vinandi vikwiza na maloto. Kayowoyero ka chindere kakuŵa na mazgu ghanandi.

⁴Para wachita chirapo kwa Chiuta, ungachedwanga kufiska, chifukwa Chiuta kuti wakucha na vindere chara. Ufiske chirapo chako.

⁵Nkhuweme kuti ureke kuchita chirapo kuruska kuti uchite ndipo ureke kufiska.

⁶Mlomo wako ureke kukunangiska na kuyowoya panthazi pa musofi wa Chiuta kuti, “Nkhapuvya waka.” Nchichi chakuti umukalipiskenge Chiuta chifukwa cha mazgu ghako na kuti iyo wanange mlimo uwo uli kuchita?

⁷Para maloto ghazara mazgu ghawakawaka nagho ghakuŵa ghanandi. Kweni iwe umope Chiuta.

⁸Usange ukuwona mu charu chinyakhe ŵakavu ŵakunyekezgeka ndiposo ŵanthu ŵakunangiska weruzgi na urunji wa unenesko, ungazizwanga na ichi chifukwa murongozgi mukuru wakulaŵiskika na uyo ngwa pachanya kwakuruska iyo, ndipouli ŵalikoso ŵanji awo mbapachanya kwakuruska iwo.

⁹Kweni mu vyose karonga ndiyo wakuŵa na chandulo chikuru mu charu icho muli minda yakulimika.

¹⁰Munthu uyo wakutemwa ndarama kuti wati wakhorwe nazo chara. Nanga ndi munthu uyo wakutemwa usambazi kuti wakhorwenge na chandulo chara. Ichi nacho nchawakawaka.

¹¹Para vyuma vyandana, awo ŵakuvirya nawo ŵakuŵa ŵanandi. Kasi sono mwenecho wakuŵa na chandulo uli? Asi kukuŵa kumanya waka kuti ndiwe musambazi?

¹²Munthu uyo wakutokatoka wakugona tulo tuweme chomene nanga warye vichoko panji vinandi. Kweni uzari wa musambazi kuti ukumugoneka tulo chara.

¹³Pano pa charu pali uheni ukuru chomene weneuwo ndawuwona: vyuma ivyo munthu wakajiŵikira ndivyo vikamupweteka,

¹⁴pakuti mwa soka vyuma vira vikamara. Munthu yura wakaŵa na mwana kweni wakaŵavye kalikose kakuti wamupe.

¹⁵Iyo wati warute nkhule, nga ndi umo wakababikira kufuma ku ŵanyina, ndipo kuti wati watorepo kanthu chara pa ivyo wakatokatokanga navyo, keneako wangamanya kuyegha na kuruta nako.

¹⁶Uwu nawo ndi uheni ukuru chomene: kuti munthu warutenge nga ndi umo wakizira. Kasi pakusuzgika na kutokatoka kwa ntheura munthu kukumwandulirachi?

¹⁷Iyo wakumalira mazuŵa ghakhe ghose mu chisi na mu chitima, mu suzgo yikuru, mu urwari, na kuŵinya kwa mtima.

¹⁸Wonani, ichi ndachiwona kuti nchiweme na chakwenerera kuchita ndi kurya, kumwa na kusanga vyakukondweska mu milimo yose yakuvuska iyo munthu wakuchita pa charu, mu mazuŵa ghachoko waka gha umoyo agho Chiuta wakumupa, pakuti iyi ndiyo njombe iyo wakumupa.

¹⁹Ncha wanangwa cha Chiuta kuti munthu waliyose mweneuyo wali kumupa usambazi na vyuma ndiposo na mtima wakukondwera navyo, wakwenera kupokera njombe yakhe na kukondwera mu ivyo wakavitokatokeranga.

²⁰Nadi, munthu uyu kuti waghanaghanenge chomene na za uchoko wa mazuŵa gha umoyo wakhe chara, pakuti Chiuta wamuzuzga na chimwemwe mu mtima wakhe.