Read new_tumbuka_bible Mupharazgi 7 Bible Online

Mupharazgi 7 - new_tumbuka_bible bible

Mupharazgi 7

¹Lumbiri luweme lukuruska mafuta ghakuzirwa. Zuŵa lakufwira likuruska zuŵa la kubabikira.

²Nkhuweme kuruta ku nyumba ya chitengero kuruska kuruta ku nyumba ya chiphikiro. Pakuti nyifwa ndiwo umaliro wa ŵanthu wose, ipo awo mbamoyo ŵaghanaghane na ichi.

³Chitima nchiweme kuruska chimwemwe. Pakuti nanga chisko chiŵe cha chitima, mtima ukukhwimiskika.

⁴Mtima wa munthu wa vinjeru ukughanaghana vya mu nyumba yakutengera. Kweni mtima wa vindere ukughanaghana vya mu nyumba ya vikondwerero pera.

⁵Nkhuweme kupulika kuchenya kwa munthu wa vinjeru, kuruska kupulika sumu zakurumba za vindere.

⁶Kuseka kwa vindere kuli nga ndi kuthetheka kwa minga pa moto kusi ku chiŵiya. Ichi nacho nchawakawaka.

⁷Kuyuzga munthu kukuzgora wa vinjeru kuŵa chindere, ndipo chimbundi chikwanangiska maghanoghano.

⁸Kumarizga chinthu nkhuwemiko kuruska kuchiyamba. Mtima wakuzizipizga nguwemiko kuruska mtima wakujikuzga.

⁹Ungakaripanga luŵiro chara, pakuti ukari ukukhara mu mtima wa vindere.

¹⁰Ungayowoyanga chara kuti, “Kasi nchifukwa uli mazuŵa gha kale ghakaŵa ghaweme kuruska gha lero?” Fumbo ili likurongora kuti ulije vinjeru.

¹¹Mahara ngaweme nga ndi chiharo, ndipo nga chandulo kwa awo mbamoyo.

¹²Chivikiriro cha mahara chili nga ndi chivikiriro cha usambazi. Kweni kumanya vinthu nkhuweme chomene, pakuti mahara ghakupereka umoyo kwa uyo wali nagho.

¹³Languruka na mlimo wa Chiuta. Ndi njani wangamanya kunyoroska chinthu icho iyo wali kuchibendezga?

¹⁴Para vinthu vikwenda makora usekererenge, ndipo mu nyengo ya soka ulangurukenge. Chiuta wali kuŵika vyose viŵiri wuwo mwakuti munthu wareke kumanya icho chamkuŵako para wafwa.

¹⁵Mu umoyo wane wawakawaka uwo ndawona vinthu vyose. Pali munthu murunji uyo wakufwa luŵiro nangauli ndi murunji. Paliso munthu muheni uyo wakukhara umoyo utali nangauli ndi muheni.

¹⁶Ureke kujumphizga pakuŵa murunji, nanga ndi kujumphizga pakuŵa wa vinjeru. Kasi ukujikomerengechi?

¹⁷Ureke kujumphizga pakuŵa muheni nesi pakuŵa chindere. Kasi ufwirengechi apo nyengo yako yindakwane?

¹⁸Nkhuweme kuti uchikoreske ichi, ndipo chinyakhe ungachirekanga chara. Chifukwa uyo wakumopa Chiuta wati wapone ku vyose viŵiri wuwo.

¹⁹Vinjeru vikumupa munthu mazaza ghakuru kwakuruska agho ghangaperekeka ku ŵanthu khumi awo ŵakuwusa mu msumba.

²⁰Nadi pa charu cha pasi palije na munthu yumoza murunji mweneuyo wakuchita uweme pera kwambula kwanangapo.

²¹Ungakwiyanga bweka mu kanthu kose ako wakapulika pakuti kuŵenge uli para wapulika kuti muteŵeti wako wakukutuka iwe.

²²Pakuti iwe nawe ukumanya pasi pa mu mtima wako kuti nyengo zinandi naweso watembapo ŵanthu ŵanyakhe.

²³Vyose ivi ndili kuvisanda na vinjeru, ndipo nkhadumula kuti, “Nditi ndiŵe wa vinjeru.” Kweni vinjeru vira vikaŵa kutali na ine.

²⁴Icho chiliko chikujumpha kamanyiro kane, nchakunyang'amira ndipo nchinonono chomene. Ndi njani wangachisanga?

²⁵Nkhaŵikapo mtima kuti ndimanye, ndipenjiske na kusanda mahara, na chifukwa icho vinthu viliriko, kuti ndimanye ubendezi wa uchindere, ndiposo na uzereza uwo ndi kufuntha.

²⁶Chinyakhe icho nkhasanga nyengo zose kuti nchakuŵinyiska mtima kwakuruska nyifwa ndi mwanakazi mweneuyo ndi chipingo. Mtima wakhe ndi ukonde, ndiposo para wakukwapatira mu mawoko ghakhe ndi unyoro wambula kusutulika. Munthu uyo wakumukondweska Chiuta wati waponenge ku mwanakazi uyu, kweni wakwananga waponenge na pachoko pose chara.

²⁷Mupharazgi wakuti, “Wonani, ichi ndicho ndachisanga, pakulangurukapo na kanthu aka na aka mwakuti ndisange mwakufikapo umo vinthu viliri nadi.

²⁸Na mu mtima wane wose nkharutilira kupenja, kweni ndilije kusanga ching'anamulo umo vinthu viliri. Ndili kusangamo mwanarume yumoza uyo ngwakwenerera mu ŵanthu chikwi chimoza, kweni mu wose aŵa, ndilije kusangamo na mwanakazi yumoza.

²⁹Kweni, wonani, chinthu chimoza pera ichi ndicho nkhachisanga kuti, Chiuta wakalenga munthu kuŵa wakunyoroka, kweni ŵanthu ŵekha ndiwo ŵajinozgera mauheni ghanandi.”