Read new_tumbuka_bible Mupharazgi 8 Bible Online

Mupharazgi 8 - new_tumbuka_bible bible

Mupharazgi 8

¹Ndi njani wakulingana na munthu wa vinjeru? Ndi njani wakumanya kung'anamulira vinthu? Munthu vinjeru vyakhe vikungweruska chisko chakhe, mankhwinya ghakufumapo pa chisko chakhe.

²Sunga marango gha karonga, chifukwa Chiuta wali kupangana nayo chirapo!

³Usange vinthu vindamukondwereske karonga, ukapo luŵiro panthazi pakhe pakuti wangachita chose icho wawona kuti nchiweme.

⁴Pakuti lizgu la karonga liri na mazaza chomene ndi njani uyo wangamanya kumufumba kuti, “Kasi ukuchitachi?”

⁵Uyo wakusunga marango kuti wati wakumane na kanthu kaheni chara. Mtima wa munthu wa mahara ukumanya nyengo na nthowa yakuchitira vinthu.

⁶Pakuti kanthu kose kali na nyengo yakhe na nthowa yakhe nanga munthu waŵe mu visuzgo vikuru.

⁷Iyo kuti wakumanya chara icho chiti chiŵengeko, ndipo kasi ndi njani wangamuphalira umo chamkuŵira?

⁸Palije munthu uyo wali na nkhongono za kuwukorerera muvuchi wa umoyo wakhe, panji mazaza ghakukanizgira zuŵa la nyifwa yakhe. Para nkhondo yili pakati palije musilikari uyo wakuwezgeka kuruta ku kaya. Ndipo palije munthu muheni uyo wangajithaska pakuchita uheni.

⁹Vinthu vyose ivi ndili kuviwona para nkhati ndalanguruka mu mtima wane na vyose ivyo vikuchitika pa charu. Pali nyengo apo munthu wakurongora mazaza ghakhe pa ŵanyakhe na kuŵapweteka.

¹⁰Pamanyuma pakhe nkhawona ŵaheni ŵakusungika makora mu dindi. Iwo nyengo zose ŵakanjiranga na kufuma mu malo ghakupatulika ndipo ŵakarumbikanga na ŵanthu mu msumba mwenemumo ŵakachitiranga uheni. Ichi nacho nchawakawaka.

¹¹Pakuti kupereka chilango pa mlimo uheni kuti kukufiskika mwaluŵiro chara, mitima ya ŵanthu njakunwekerathu kuchita uheni.

¹²Nangauli ŵanthu ŵangachita uheni kanandi waka na kuŵa na umoyo utali, ndipouli ine nkhumanya kuti awo ŵakumopa Chiuta ŵati ŵakharenge makora chifukwa ŵakumuchindika iyo.

¹³Kweni ŵanthu ŵaheni kuti kwamkuŵaŵira makora chara, nesi nkhukhara umoyo utali chara, chifukwa iwo kuti ŵakopa Chiuta chara.

¹⁴Kuli chinthu chinyakhe chawakawaka icho chikuchitika pano pasi. Chinthu icho ndi ichi, ŵaliko ŵanthu ŵarunji ŵeneawo ŵakulangika nga ndi para ŵali kuchita uheni, ndiposo ŵalipo ŵanthu ŵaheni ŵeneawo ŵakulangika chara nga ndi para mbarunji. Nkhayowoya kuti ichi nacho nchawakawaka.

¹⁵Ntheura ndili kukhorwa ine, kuti ise, tijikondwereskenge, chifukwa pano pa charu cha pasi tili na kusangwa kumoza pera uko ndi: kurya, kumwa, na kujikondweska. Tingachita ichi para tikutokatoka mu umoyo weneuwu Chiuta wali kutipa.

¹⁶Nkhati ndalanguruka mu mtima wane kuti ndimanye mahara, na kuwona nchito iyo yikuchitika pano pasi, mwenemumo nanga ndi muhanya panji usiku, munthu kuti wakugona tulo chara.

¹⁷Penepapo nkhawona milimo yose ya Chiuta mwakuti munthu kuti wangamanya chara milimo yose iyo yikuchitika pano pa charu. Ndipouli nanga munthu wangayezga kutokatoka pakuvipenjerezga, kuti wangasanga ching'anamulo chakhe chara. Nanga munthu wa mahara wangayowoya kuti wakumanya, iyo kuti wangasanga ching'anamulo chakhe chara.