Read new_tumbuka_bible Mupharazgi 9 Bible Online

Mupharazgi 9 - new_tumbuka_bible bible

Mupharazgi 9

¹Vyose ivi nkhalanguruka navyo ndipo nkhapanikizga kuti ŵanthu awo ŵakuchita urunji na ŵavinjeru ŵali mu mawoko gha Chiuta pamoza na milimo yawo wuwo. Kweni palije munthu uyo wangamanya ivyo vikumulindirira manyi ndi kutemwa panji tinkho. Vyose ivi vili munthazi.

²Ŵanthu wose ivyo vizamkuŵawonekera vikuyana waka, murunji na wakubendera, muweme na muheni, wakuphotoreka na wambula kuphotoreka, wambula kupereka sembe, na uyo wakureka kupereka. Umo waliri munthu muweme, ndipo waliri na muheni. Uyo wakurapa wakuyana waka na uyo wakureka kurapa.

³Chinthu chiheni chomene pa ivyo vikuchitika pa charu ndi ichi chakuti soka limoza likuwira wose. Mitima ya ŵanthu njakuzura na uheni. Vifusi vili mu mitima yawo apo ŵachali ŵamoyo ndipo pamanyuma pa ichi iwo ŵakufwa ndipera.

⁴Kweni uyo wachali wamoyo wali na chigomezgo chifukwa ncheŵe yamoyo njiwemiko kuruska nkharamu yakufwa.

⁵Ŵamoyo ŵakumanya kuti ŵafwenge kweni ŵakufwa kuti ŵakumanya kanthu chara, ndipo ŵalije njombe yinyakhe yakusazgikirako. Iwo ŵali kuruwika nkhanira.

⁶Kutemwa kwawo, na tinkho lawo ndiposo na sanje yawo, vyose vili kumara kale. Mu vyose ivyo vikuchitika pa charu iwo kuti ŵamkuŵaso na phande chara mpaka muyirayira.

⁷Sono iwe ungopanga chara, ryanga chakurya chako na chimwemwe, ndiposo mwanga vinyo lako na mtima wakucha pakuti Chiuta wazomerezga kale milimo iyo ukuchita.

⁸Uvwarenge vyakuvwara vituŵa nyengo zose. Uphakenge mafuta ku mutu wako nyengo zose.

⁹Ukondwerenge pamoza na muwoli wako uyo ukumutemwa mu mazuŵa ghose gha umoyo wako wa wakawaka uwu, weneuwo Chiuta wakupa pa charu. Pakuti ili ndilo phande lako mu umoyo wako ndiposo mu kutokatoka kwako uko uli nako pa charu.

¹⁰Mlimo wose uwo ukuwusanga, uwuchite na nkhongono zako zose. Pakuti ku malo gha ŵakufwa uku ukuruta kulije mlimo, nesi kughanaghana nesi mahara, nanga ndi vinjeru.

¹¹Nkhawonaso kuti pa charu awo ŵakuruska mu chipharizgano, kuti ndi awo wakuchimbira chomene chara, nanga ndi awo ŵakutonda mu nkhondo kuti ndi awo mbankhongono chara, nanga ndi chakurya kuti ncha ŵamahara pera chara, nesi usambazi kuti ngwa ŵavinjeru pera chara, nanga nkhutemwera kuti nkhwa awo ndi nkhwantha pera chara. Kweni nyengo na soka vikuwira wose.

¹²Munthu kuti wakuyimanya nyengo yakhe chara. Nga ndi umo somba zikukorekera mu chirepa, ndiposo nga ndi umo viyuni vikukorekera mu chipingo, ntheura ndimo ŵanthu nawo ŵakukorekera mu vipingo pa nyengo yiheni, para soka laŵizira mwa mabuchibuchi.

¹³Pa charu nkhawonaso chiyerezgero chinyakhe cha mahara ndipo chikawoneka kuŵa chikuru kwa ine.

¹⁴Kukaŵako kamsumba kachoko ako kakaŵa na ŵanthu ŵachoko waka. Karonga mukuru wakakawukira, wakakajarizga na kukazengera vibumira vikuru vyakukwereramo kuzingirizga kamsumba kara.

¹⁵Kweni mwenemura mukasangika munthu mukavu wa vinjeru, ndipo iyo na vinjeru vyakhe wakathaska kamsumba kara. Ndipouli pakaŵavye na yumoza uyo wakamukumbuka munthu mukavu yura.

¹⁶Sono ine nkhuti, “Vinjeru nviweme kuruska nkhongono, nangauli vinjeru vya munthu mukavu vikuyuyurika ndipo mazgu ghakhe nagho kuti ghakupulikikwa chara.”

¹⁷Mazgu gha munthu wa vinjeru ghakuyowoyeka mwakufwasa, ngaweme kuruska kupoma kwa wakuwusa ku wupu wa vindere.

¹⁸Vinjeru nviweme kuruska mahomwa gha nkhondo, kweni munthu wakwananga yumoza wakunanga viweme vinandi.