Read new_tumbuka_bible Sumu Yikuru 1 Bible Online

Sumu Yikuru 1 - new_tumbuka_bible bible

Sumu Yikuru 1

¹Sumu ya Solomoni, sumu iyo njiweme kuruska sumu zose.

²Mwe, mphanyi wandifyofyontha na mlomo wako, pakuti kutemwa kwako nkhuweme kuruska vinyo.

³Mafuta agho waphaka ghakununkhira makora, zina lako liri nga ndi mafuta agho ghathika. Ndicho chifukwa ŵamwali ŵakukutemwa.

⁴Nditore, ndikurondezge, tingachedwanga chara Iwe karonga wane nditorere mu chipinda chako. Titi tikondwe na kusekerera mwa iwe. Titi tirumbe kutemwa kwako kuruska vinyo. Ŵamwali ŵakukutemwa pa unenesko.

⁵Imwe ŵamwali ŵa mu Yerusalemu, ine ndili mufipa, kweni ndili wakutowa. Ndili mufipa nga ndi hema la mu Kedara, kweni wakutowa nga ndi salu ya Solomoni.

⁶Mungandilaŵiskanga pakuti ndine mufipa, ndine mufipa chifukwa cha kocha kwa dazi. Ŵadumbu ŵane ŵakandikwiyira. Ŵakandizgora kuŵa wakuteŵeta mu munda wa mpheska, nkhaŵavye nyengo ya kujipwererera.

⁷Ndiphalire, iwe wakutemweka wane, uko ukuliskira mberere zako, uko ukuzipumuzgira na muhanya pakati. Kasi nchifukwa uli ine nkhwenera kukupenja iwe, mukati mu miskambo ya ŵanyako?

⁸Iwe wa mwanakazi wakutowa kuruska ŵanakazi wose, usange ukumanya chara uko kuli wakutemweka wako, urondezge mzira wa mberere na mbuzi. Uliskenge twana twa mbuzi zako, pafupi na mahema gha ŵaliska.

⁹Wakutemweka wane, nkhukulinganizga iwe, na ŵakavalo ŵa magareta gha Faro.

¹⁰Matama ghako ghakutowa na ndewerewe, singo yako na majuda gha vitowelo.

¹¹Titi tikupangire majuda gha golide ghakuroŵeka na siliva.

¹²Apo karonga wakapumulanga pa chitengo chakhe, mafuta ghane gha narido ghakanunkhira posepose.

¹³Kwa ine wakutemweka wane, wali nga ndi kathumba ka mure, ako kali pakati pa maŵere ghane.

¹⁴Kwa ine wakutemweka wane wali nga ndi makunje gha maluŵa ghaswesi, mu munda wa mpheska wa ku Engedi.

¹⁵Iwe wakutemweka wane, ndiwe wakutowa. Ndiwe wakutowa nadi! Maso ghako ghali nga ndi nkhunda.

¹⁶Wakutemweka wane, ndiwe wakutowa, ndiwe wakutowa nadi! Apo tikugona mpha utheka wa biriŵiri.

¹⁷Michiko ya nyumba yithu ndi makuni gha milanje. Mapaso ghakhe ndi makuni gha mulombwa.