Read new_tumbuka_bible Sumu Yikuru 2 Bible Online

Sumu Yikuru 2 - new_tumbuka_bible bible

Sumu Yikuru 2

¹Ine ndine luŵa waka mu Sharoni, luŵa waka la mu madambo.

²Wakutemweka wane ngwa kutowa mukati mu ŵamwali, nga ndi maluŵa mukati mu minga.

³Wakutemweka wane, ndiwe wakutowa mukati mu ŵanyamata. Uli nga ndi vipambi vya mararanje, mukati mu makuni gha mu nkhorongo. Nkhutemwa kukhara mu mufwiri wako, kuti ndiryenge vipambi vyako vyakunowa.

⁴Wakunditorera ku nyumba ya chiphikiro. Ndembera yakhe pa ine ndi kutemwa.

⁵Ndikhozge na vipambi vyakomira, wezgeramo nkhongono zane na vipambi vya mararanje, pakuti kutemwa kwandimara nkhongono.

⁶Woko lakhe la mazere, mphanyi laŵa kusi kwa mutu wane, woko lakhe la maryero landifukatira.

⁷Nkhumurombani, mwa ŵamwali ŵa mu Yerusalemu, murape mu zina la nyiska, panji la mbaŵara[1] ya mu thengere. Mureke kusunkhunya, panji kutimbanizga kutemwa kwithu, mpaka tifwase mwakukwanira.

⁸Tegherezgani mazgu gha wakutemwa wane! Wonani, uyo wakwiza, wakudukaduka mukati mu mapiri, wakujitika mukati mu tumapiri.

⁹Wakutemweka wane wali nga ndi nyiska, panji nga ndi mwana wa mbaŵara. Laŵiskani! Uyo wimilira apo, kuseri kwa chiliŵa. Wali pa chidangazi, wakudodoliska mukati, wakulingizga mu mphowozi za furemu.

¹⁰Wakutemweka wakuti kwa ine. “Wakutemweka wane, Wuka! Swenga yane iwe, tiye tirutenge!

¹¹Wona! Chifuku chamara, vura yamalirathu, yirokwengeso chara.

¹²Maluŵa ghakuwoneka mu charu, nyengo yakwimbira sumu nga ndi yeneiyi. Sumu za njiŵa zikupulikikwa, mu charu chithu chose.

¹³Vikuyu vyamba kupambika vipambi vyakhe, Mpheska nazo zayamba maluŵa, ghakupereka sungu liweme. Wakutemweka wane, wuka! Swenga yane, tiye tirutenge!”

¹⁴Wa nkhunda yane, mu mimwanya ya jarawe, mu zimphanji za mapiri pakusendemuka, reka ndiwone chisko chako, reka ndipulike mazgu ghako. Pakuti mazgu ghako ngaweme, chisko chako nchakutowa chomene.

¹⁵Utikorere ŵakambwe awo, ŵakambwe ŵachokoŵachoko, ŵeneawo ŵakunanga minda yane ya mpheska, pakuti minda yithu ya mpheska yili na maluŵa.

¹⁶Wakutemweka wane ngwane, ine nane ndili wakhe. Wakuliska mberere zakhe mukati mu maluŵa.

¹⁷Pambere kundache, mdima undamare, wakutemweka wane, uwerengeko. Uŵenge nga ndi nyiska, panji nga ndi mbaŵara pa mapiri gha mawe.