Read new_tumbuka_bible Sumu Yikuru 3 Bible Online

Sumu Yikuru 3 - new_tumbuka_bible bible

Sumu Yikuru 3

¹Usiku uliwose pa chitara chane, nkhamurota uyo ngwa kutemweka wane. 2 nkhamupapaska, kweni nkhamusanga chara.

²Sono nditi ndiwuke, nditi ndendekenge mu msumba, mu misewu na mu mabaraza ghakhe. Nditi ndimupenje uyo ngwa kutemweka wane. Nkhamupenja, kweni kuti nkhumusanga chara.

³Ŵalinda ŵakandiwona, apo ŵakenderanga msumba, nkhaŵafumba nkhati, “Kasi mwamuwonako wakutemweka wane?”

⁴Nkhati ndaŵajumpha pachoko waka, nkhamusanga wakutemweka wane. Nkhaskepererana nayo, kuti nkhatayana nayo chara, mpaka nkhiza nayo mu nyumba ya amama, mu chipinda cha awo ŵakandibaba.

⁵Nkhumurombani, mwa ŵamwali ŵa mu Yerusalemu, murape mu zina la nyiska, panji la mbaŵara ya mu thengere. Mureke kusunkhunya, panji kutimbanizga kutemwa kwithu, mpaka tifwase mwakukwanira.

⁶Nchivichi icho chikwiza kufumira ku mapopa, chili nga ndi josi lati waka pholi. Chikununkhira mure na lubani, pamoza na vyakununkhira vya ŵamalonda.

⁷Wonani, ndi machira gha Karonga Solomoni. Ghazingirizgika na ŵasilikari 60, vinkhara vya charu cha Israele.

⁸Vyose vyakorera malupanga, ndi nkhwantha pakurwa nkhondo. Chose chaŵika lupanga pa chigha chakhe, kunozgekera chakofya na usiku.

⁹Karonga Solomoni wakajipangira machira, na makuni gha mu nkhorongo ya ku Lebanoni.

¹⁰Michiko yakhe wakayiphaka siliva, chakuyagamirapo wakachiphaka golide, ndipo chakukharapo chakhe wakachivungirizga salu yichesamu. Yikaroŵeka makora chomene, na ŵamwali ŵa mu Yerusalemu.

¹¹Fumani, imwe mwa ŵamwali wa mu Ziyoni, wonani, Karonga Solomoni, wavwara mphumphu yakhe, iyo nyina wakamuvwarika, pa zuŵa la ukwati wakhe, ilo wakakondwera chomene.