Read new_tumbuka_bible Sumu Yikuru 4 Bible Online

Sumu Yikuru 4 - new_tumbuka_bible bible

Sumu Yikuru 4

¹Iwe wakutemweka wane, ndiwe wakutowa. Ndiwe wakutowa nadi! Maso ghako ndi nkhunda, kuseri kwa chidiko chako. Sisi lako liri waka lende, nga ndi mskambo wa mbuzi, ukukhira pa Phiri la Gileyadi.

²Mino ghako ghali mbee, nga ndi mberere, iyo yafuma waka kukusukika. Mino gharazgirana makora nga ndi ŵamuleza, palije na limoza apo pali nchende.

³Milomo yako yili nga ndi uzi uswesi, ndipo mlomo wako ukukondweska. Matama ghako ghali nga ndi viŵanduka vya magalagadeya, kuseri kwa chidiko chako.

⁴Singo yako njitali, nga ndi chigongwe cha Davide, wakuzengeka makora. Pa singo iyi pali majuda 1,000, ghose ndi nguru za vinkhara.

⁵Maŵere ghako ghali nga ndi twana tuŵiri twa nyiska, twana twa mleza twa mbaŵara, uto tukurya mukati mu maluŵa.

⁶Pambere kundache, mdima undamare ine nditi ndirute ku mapiri gha mure, mapiri gha sungu liweme.

⁷Wakutemweka wane, ndiwe wakutowa thupi lako lose. Mwa iwe mulije kalema kalikose.

⁸Iwe wa mwali wane, tiye tirute tose kufuma ku Lebanoni, tiye tirute tose kufuma ku Lebanoni. Khira kufuma pachanya pa Phiri la Amana, kufuma pachanya pa Phiri la Seniri na la Heremoni, kufuma mu mphanji za nkharamu na mu mapiri gha ŵanyalubwe.

⁹Watora mtima wane iwe wa mudumbu wane, wa mwali wane. Watora mtima wane, na umo ghakundilaŵiskira maso ghako, na mukanda umoza wa majuda ghako.

¹⁰Kutemwa kwako nkhuweme, iwe wa mudumbu wane, wa mwali wane. Kutemwa kwako nkhuweme kuruska vinyo. Sungu la mafuta ghako, likuruska vyakununkhiskira vyose.

¹¹Iwe wa mwali wane, milomo yako yikuthonya uchi. Mkaka na uchi vili kusi ku lulimi lwako. Sungu la vyakuvwara vyako liri nga ndi la ku Lebanoni.

¹²Wa mudumbu wane, wa mwali wane, ndiwe munda wakuŵighilirika, ndiwe munda wakuŵighilirika, mbwiwi yakujalirika.

¹³Vyakumera vyako ndi munda wa magalagadeya, uwo uli na vipambi viweme chomene, na maluŵa ghaswesi ndiposo na makuni gha narido.

¹⁴Vipambi vya narido na safuroni, vya kalamusi na vya kinamoni, na makuni ghose gha vyakununkhira, makuni gha mure na chinthembwe, na vyakununkhira vyose vyakuzirwa.

¹⁵Ndiwe mbwiwi ya munda, chisimi cha maji gha umoyo, tumironga twa maji kufuma ku Lebanoni.

¹⁶Wuka, iwe mphepo ya ku mpoto, zanga, iwe mphepo ya ku mwera! Puta pa munda wane, kuti sungu lakhe liweme litandazgike. Wakutemweka wane wize ku munda wakhe, warye vipambi vyakhe viweme chomene.