Read new_tumbuka_bible Sumu Yikuru 5 Bible Online

Sumu Yikuru 5 - new_tumbuka_bible bible

Sumu Yikuru 5

¹Ine ndanjira mu munda wane, mudumbu wane, mwali wane. Nkhuwunjika mure wane pamoza na vyakununkhiskira vyane. Nkhurya chisa chane cha uchi pamoza na uchi wane. Nkhumwa vinyo lane pamoza na mkaka wane. Imwe muli pa ubwezi, ryaninge na kumwa. Imwe mukutemwana, mwaninge chomene.

²Nkhagona, kweni nkhaŵa maso. Pulika! Wakutemweka wane wakukhung'uska pa chijaro, wakuti. “Wa mudumbu wane, wa kutemweka wane, ndijulirako, nkhunda yane, wakufikapo nadi, Wona, mutu wane wazumbwa na jumi. Sisi lane lazumbwa na manthonyezi gha usiku.”

³Ine ndavura kale malaya ghane, kasi nchifukwa uli ndivwarengeso? Ine ndasukutula kale malundi ghane, kasi ndighabinkhiskeso na fuvu?

⁴Wakutemweka wane wakanjizga woko lakhe, pa chidorozi cha muryango, ndipo mtima wane ukamba kukhumbira chomene.

⁵Nkhawuka kumujulira wakutemweka wane, Mawoko ghane ghakaŵa bwitubwitu, na mafuta gha mure. Minwe yane yikanthonyanga mure, kunthonyera pa chikolerero cha chijaro.

⁶Nkhamujulirako wakutemweka wane, kweni nkhasanga wafumapo, waruta, nkhathika lusoko, pakuwona kuti wawukapo. Nkhamupenja, kweni kuti nkhamusanga chara, nkhamuchema, kweni kuti wakazgora chara.

⁷Ŵalinda ŵakandiwona, apo ŵakenderanga msumba. Ŵakanditimba na kundipweteka, ŵakandipoka salu yane iyo nkhadika, ŵalinda ŵeneŵara ŵa malinga.

⁸Nkhumurapizgani, mwa ŵamwali ŵa mu Yerusalemu, usange mwamusanga wakutemweka wane, mumuphalire iyo kuti, kutemwa kwandimara nkhongono.

⁹Iwe wa mwanakazi wakutowa kuruska ŵanakazi wose, kasi wakutemweka wako, wakuruska uli wakutemweka munyakhe? Kasi wakutemweka wako, wakuruska uli wakutemweka munyakhe, kuti utirapizge ntheura?

¹⁰Wakutemweka wane ngwa kuŵara ndiposo ndi muswesi. Ngwakumanyikwa mukati mu ŵanarume 10,000.

¹¹Chisko chakhe ndi golide wakung'azima, sisi lakhe ndakupotana makora, ndifipa makora nga ndi chihoŵe.

¹²Maso ghakhe ghali nga ndi gha nkhunda, para zili pa mphepete pa mbwiwi za maji. Ghali nga ndi nkhunda izo zageza mu mkaka, ghakhara makora ghene.

¹³Matama ghakhe ghali nga ndi minda, ya vyakununkhira vyakupereka sungu liweme. Milomo yakhe yili nga ndi maluŵa, yili bwitubwitu na mafuta gha mure.

¹⁴Mawoko ghakhe ghali nga ndi ndodo ya golide, agho gharoŵeka vitowelo. Thupi lakhe liri nga ndi mnyanga wa zovu, ilo laroŵeka na mawe ghakuzirwa gha bululu.

¹⁵Malundi ghakhe ghali nga ndi mizati ya mawe gha sangalawe, agho ghakhazikika pa vikongera vya golide. Kawonekero kakhe kali nga ndi Lebanoni, ngwa kuzirwa nga ndi makuni ghaweme gha milanje.

¹⁶Mlomo wakhe ukundikondweska chomene, ndipo iyo ngwa kukhumbikwa chomene kwa ine. Uyu ndiyo wakutemweka na mubwezi wane, imwe mwa ŵamwali ŵa mu Yerusalemu.