Read new_tumbuka_bible Sumu Yikuru 8 Bible Online

Sumu Yikuru 8 - new_tumbuka_bible bible

Sumu Yikuru 8

¹Mbaya mwe, ukareka kuŵa mudumbu wane, uyo wakonkha bere pamoza na ine kwa amama! Ndikumanenge nawe kuwaro, mphanyi ndakukufyofyontha pakweru, mphanyi panguŵavye wakundiyuyura.

²Mphanyi ndakukutora na kukunjizga, mu nyumba ya amama, ku chipinda cha uyo wakandibaba. Mphanyi ndakukupa vinyo, wakusazgako vyakununkhira kuti umwe, maji gha vipambi kufuma ku magalagadeya ghane.

³Woko lako la mazere, mphanyi liri kusi kwa mutu wane, woko lako la maryero undifukatire nalo.

⁴Nkhumurombani, mwa ŵamwali ŵa mu Yerusalemu, kuti chitemwa ichi mureke kuchisunkhunya panji kuchiwuska, mpaka apo icho chikhumbirenge.

⁵Kasi ndi njani uyo wakwiza, kufumira ku mapopa, uyo weghamira pa wakutemweka wakhe? Musi mu khuni la mararanje, nkhawuska iwe. Penepara ndipo ŵanyoko, ŵakaŵira mu vyakuŵinya vya pakukubaba iwe. Inya, penepara uyo wakaŵa mu vyakuŵinya, ŵakakubaba iwe.

⁶Undiŵike mu mtima wako kuŵa nga ndi chidindo, nga ndi chidindo pa woko lako, pakuti kutemwa nkhwa nkhongono nga ndi malo gha ŵakufwa, sanje nja nkhaza nga ndi nyifwa. Kocha kwakhe kuli nga ndi makara gha moto, kuli ndi dimi lakofya chomene.

⁷Maji ghanandi kuti ghangazimya kutemwa chara, nanga ndi mironga yakuzura, kuti yingakukura chara. Usange munthu wangapereka vyuma vyose vya mu nyumba yakhe, kuti wagule kutemwa, iyo wangasekeka chomene.

⁸Ise tili na mudumbu withu muchoko, uyo maŵere ghakhe ghachali ghachoko. Kasi tizamkumuchitira vichi mudumbu withu, pa nyengo iyo wizamkujalirika?

⁹Usange iyo wali nga ndi chiliŵa, titi timugulire sindiriya wakuŵa nga msonjo wa siliva. Kweni usange wali nga ndi muryango, titi timujalire na makuni gha milanje.

¹⁰Ine nkhaŵa chiliŵa, maŵere ghane ghakaŵa nga ndi vigongwe vya siliva. Ntheura panthazi pa wakutemweka wane, nkhaŵa nga ndi uyo wakwiza na mutende.

¹¹Solomoni wakaŵa na munda wa mpheska, ku Baala Hamoni. Munda wa mpheska ura wakawubwerekeska ku ŵalimi. Waliyose wakenera kupereka ndarama 1,000 za siliva, kufuma ku vipambi vyakhe.

¹²Iwe Solomoni, ungaŵa na ndarama 1,000 za siliva, ŵalimi ŵa vipambi ŵangaŵa na ndarama 200. Kweni munda wa mpheska ngwane na wane, ngwa ine ndekha.

¹³Iwe ukukhara mu minda, ŵabwezi ŵane ŵakutegherezga kuti ŵapulike lizgu lako. Rekani ine ndilipulike.

¹⁴Endeska, wakutemweka wane, uŵe nga ndi mbaŵara, panji nga ndi kana ka nyiska, pachanya pa mapiri gha vyakununkhira.