Read new_tumbuka_bible Yesaya 1 Bible Online

Yesaya 1 - new_tumbuka_bible bible

Yesaya 1

¹Iyi ndi mboniwoni ya Yesaya mwana wa Amozi, yeneiyo yikuphara vya charu cha Yuda na msumba wa Yerusalemu mu nyengo ya kuwusa kwa Uziya, Yotamu, Ahazi na Hezekiya mu charu cha Yuda.

²Pulika iwe mtambo, tegherezga iwe charu cha pasi, pakuti FUMU yayowoya kuti, “Ine nkhababa ŵana na kuŵalera, kweni ŵandigarukira.

³Nkhambako yikumanya sekuru wakhe, mbunda nayo yikumanya icho yikuryeramo. Kweni ŵaIsraele kuti ŵakumanya chara, ŵanthu ŵane kuti ŵakupulikiska chara.”

⁴Mbaya mwe, fuko lakwananga, ŵanthu ŵakuzura na zakwananga, ŵa mphapu ya ŵanthu awo ŵakuchita uheni, ŵana awo ŵakuchita vya ubendezi! Iwo ŵali kupata FUMU, ŵali kuyuyura Mutuŵa Yura wa Israele, ndipo ŵarazgira nkhonyoro zawo kwa FUMU yawo.

⁵Kasi nchifukwa uli mukukhumba kutimbikaso? Kasi nchifukwa uli mukurutilira kundigarukira? Mutu winu wose uli na vilonda, ndipo mtima winu wose waropwa.

⁶Kufuma ku chitende cha lundi mpaka ku mutu, palije apo pali makora. Pose pali mathuvya, vilonda na kuchekeka. Vilonda vyakhe vyambula kusukika nesi kukakika, palije mafuta agho ghathirikapo kuti ghawombeskepo.

⁷Charu chinu chakhara mapopa, misumba yinu yocheka na moto, minda yinu yikutoreka na ŵalendo, apo imwe mukulaŵiska, Nadi, charu chinu chakhara mapopa, nga ndi para chathereskeka na ŵalendo.

⁸Msumba wa Ziyoni ndiwo wakharako wambula chivikiriro, nga ndi msasa mu munda wa mpheska, nga ndi chilindo mu munda wa vinkhaka, ndiposo nga ndi msumba uwo wazingilizgika na nkhondo.

⁹FUMU Mwenenkhongono zose yirekenge kutisidira ŵachoko waka kuŵa ŵamoyo, mphanyi ise tili nga ndi Sodomu, na kuŵa nga ndi Gomora.

¹⁰Pulikani sono icho FUMU yikuyowoya, imwe ŵarongozgi ŵa mu Sodomu. Tegherezgani ku ivyo Chiuta withu wakusambizga, imwe ŵanthu ŵa mu Gomora!

¹¹FUMU yikuti, “Sembe zakukoma zinandinandi izo mukupereka, kasi nkhanthu uli kwa ine? Ine ndavuka nazo sembe zakocha mburuma za mberere zanarume, na sembe za mafuta za vyakuŵeta vyakututuŵa. Ine kuti nkhukondwa na ndopa za nkhambako, nesi za ŵana-mberere panji za mbuzi.

¹²Para mukwiza kawoneka panthazi pane, kasi ndi njani wamulangulani kuti mudyakemo mu mphara zane?

¹³Mureke kwiza nazo sembe zawakawaka. Vyakununkhira vyinu mbukazuzi kwa ine, ndiposo na maungano gha pa kuthwasa kwa mwezi na gha maSabata, na agho mukuchema. Ine kuti ndingazizipizga chara uheni pamoza na maungano ghakupatulika.

¹⁴Viphikiro vyinu vya kuthwasa kwa mwezi, na viphikiro vinyakhe sono nkhuvitinkha. Viphikiro vyinu vyazgoka mphingo kwa ine, ndiposo vyandilemera kuzizipizga.

¹⁵Para mukuwuska mawoko ghinu muchanya pakuromba, ine kuti ndilaŵiskengeko chara. Nangauli mungaromba kanandinandi waka, kuti nditi ndimupulikani chara, chifukwa mawoko ghinu nga ndopa pera.

¹⁶Gezani kuti mujitozge. Wuskanipo uheni panthazi pane, mureke kuchita uheni.

¹⁷Sambirani kuchita uweme. Yezgani kupereka weruzgi wakunyoroka. Chenya awo ŵakunyekezga ŵanyawo. Vikirirani ŵalanda, ŵeyererani vyokoro.”

¹⁸FUMU yikuti, “Zaninge sono, tidumbiskane. Nanga zakwananga zinu zingaŵa ziswesi, ziti ziŵenge zituŵa nga ndi nyathutwe, nanga zingaŵa zichesamu, ziti ziŵenge zituŵa nga ndi thonje.

¹⁹Usange mukukhumba kupulikira, muti muryenge viweme vya mu charu.

²⁰Kweni usange mukukana na kugaruka, muti mumarenge na nkhondo, pakuti ntheura ndimo yikuyowoyera FUMU.”

²¹Wonani, msumba wa ŵanthu ŵakugomezgeka, sono ndi msumba wa ŵazaghali. Msumba uwo mukachitanga weruzgi wakunyoroka, urunji ndiwo ukaŵa mu msumba uwu, kweni sono ndimo muli ŵanthu ŵakukoma.

²²Iwe Yerusalemu, ukaŵa nga ndi siliva, kweni sono uli nga ndi murosko, ukaŵa nga ndi vinyo liweme, kweni sono uli nga ndi maji waka.

²³Ŵakaronga ŵako ŵandigarukira ine, ŵaŵa ŵabwezi ŵa ŵankhungu, wose ŵakutemwa vimbundi, ndipo ŵakuchimbilira kuromba vyawanangwa. Ŵalanda kuti ŵakuŵavikirira chara, nanga nkhutegherezga ku madandaulo gha vyokoro.

²⁴Ntheura Chiuta, FUMU Mwenenkhongono zose, Chikurukuru Yura wa Israele wakuti, “Nditi ndipungulire ukari wane pa ŵarwani ŵane, na kuwezgera nduzga pa iwo.

²⁵Nadi nditi ndinyoroske woko lane kulimbana nawe, nditi ndikukweske zakwananga zako, nga ndi umo ŵakukweskera murosko ku visulo.

²⁶Ŵeruzgi ŵako nditi ndiŵawezgeremoso, nga ndi pakudanga para. Ŵarongozgi ŵako nawo nditi ndiŵawezgeremoso, nga ndi pakudanga para. Pamanyuma uti uchemekeso, Msumba wa Urunji, Msumba Wakugomezgeka.”

²⁷Ziyoni wati wawomboleke na weruzgi ŵakunyoroka, ndipo awo ŵakurapa zakwananga zawo, ŵati ŵawomboleke pakuchita vya urunji.

²⁸Kweni ŵachigaruka na ŵakwananga, ŵati ŵamalirenge pamoza. Ndipo awo ŵakuyireka FUMU, ŵati ŵalangike.

²⁹Muti mukhozgekenge nagho soni makuni gha musoro, agho mukakondwanga nayo pakusoperamo vikozgo, ndipo muti mulengeskekenge nayo minda iyo mukasankha kusoperamo vikozgo.

³⁰Mwizamkuŵa nga ndi khuni la musoro ilo mahamba ghakhe ghakufota, nga ndi munda wambula maji.

³¹Munthu wankhongono waŵenge nga ndi nkhuni lakomira, ndipo milimo yakhe yiŵenge nga ndi swatu. Ntheura vyose viti viphyire pamoza, kwambula na yumoza wakuvizimyizga.